Yosua Uram 23
23
Yosua biryi Sun Israel sien nang asi sirya uram ebkarebmou deyok
23:1-16
1Ura, sun Israel nang asi Iya Erebdobnyi biryi dinatam-dinatam kuramnyi nang aryi oryangana kum uca, mangkau kibdeibmou. Ba, a talak ara uki weik kubmai cok asi Yosua wisi danmou. 2Ura, Yosua biryi sun Israel sien wisi yoka nang ab, yuk sien nang ab, malyi kubmangnyi ninyi asi liliboka wenen sien nang ab, yin doun sien nang ab asi ato ebmou, “Ni sirya wisi danman. 3Ati, sun Israel nang asi sun Nai Iya Erebdobnyi biryi sun deyok ati, Kanaan nang asi mar bormilisurur ara sunci sirya eirindarur. 4A mutuk ninyi nirya asi mar boboka, ‘Muna kibdongobtibyi,’ tenen niryi sunsi sienyi kiboka talebsisiryi kunun. Ani, niryi a mutuk ninyi tukwe nirya asi araboka sirya nuksise. Ara, me Yordan yaletam aryi kuboka kitingbantam Laut Besar a nirya araboka bokeibsise. Ani, nunci mar boboka sunsi muna kirdongona kum mutuk ninyi sun mutuk tukwe ababyi sirya yamin deiboka sunti nuksise. 5Nun Nai Iya Erebdobnyi nun molonanyi biryi nunsi minob uca sirya, ‘Ato kubdeibkwansin,’ eansou to kubdeibkwansir. Ara, ‘Ni sun Nai Imtamnyi biryi sunci kum mar boboka arabdobdau mutuk ninyi ababyi yakdonokoka arabdeibkwansin. Ba, sunci sun mutuk kibdobmunci kubdobkwandum,’ eansou. 6Ati, sun kanya dam sasiboka er Musa deici aryi, ‘Ukubdarur-ukuna mem,’ ebdeibsou to akwe kalikoka kunubde bankwandarur! A ebdeiansou uram si konga tentok ababyi dangbisina mem! 7Ara, ninyi oboka yangna kum uca, sun kankan dam a tuba kuraming nang ab, sun ab uram tonkwa sisikoka, sun moloramingnyi dinyi asi sunbabyi a kwemdeina moloboka, ‘Dib,’ tenena ara mem! 8Eda, uku talak aryi sun Nai Iya Erebdobnyi uram akwe kunurandum to akwe, aminda ababyi kunubde binkwandarur. 9Sun weik atei-weik atei, mikib ilila atei ninyi mar borandau ninyi asi, Er Iya Erebdobnyi biryi sirya oboka kum danabdeibwe. Ba, uku talak aryi anda mutuk ninyi aryi sunsi mikib doboka mar iyanmasin kumto kurur. Ba, uku talak ara sunda iya teleb asa akwe kundarur. 10Ara, Er Iya Erebdobnyi nun molonanyi biryi, ‘Sunsi milibkwansin,’ eansou to kuboka miliransou. Ara, sun ninyi tentok aryi ninyi yubwa 1.000 baryi nang asi mar boboka muna kirdongorandau. 11Sun kam iya kubdobkwamunyi ura, sun Nai Iya Erebdobnyi bisi kanyi iya deibkwandarur. 12Bok, a mutuk minob a kuramnyi nang orkiriramoubwe ani, takloamoubwe ba, sun kankan dam tuba kunung nang tam urasin deibmunci, a nang nermabwe doboka, teleb-teleb uram sisingna mem! 13Minob a mutuk yoka nang a kablobyi nang asi Imtamnyi biryi aminda ton kum yakdonokwande ati, diboka bikandarur. Eda, sunsi a nang aryi tabwe bouma kalingdeirininto kuransingnyi ba, tabwe eboka youbkwansing. Ani, sun barwe asi co taci lungninto kuboka u yibdeibkwansing, ani tiling keica aryi asing tulungdeirininto kuboka u yibdeibkwansing. Ato kuransingnyi uca, sun Nai Iya Erebdobnyi biryi tukwe teleb karebsou mutuk dam aryi sun nirya a dibsekwandum. 14Nira sirya wisi danman, ni dibkwaman talak sirya dam kubmar. Ati, sun kanya ab, sun kam kurandum dinyi nirya ab aryi, Er Iya Erebdobnyi nun molonanyi bisi dib tenebmunci, kunubde bindarur! Er Iya Erebdobnyi biryi, ‘Iya teleb dinyi karebkwansin,’ ebdeiansou to nirya kunuboka karebsou. A ebdeiansou uram nirya kunuboka tentok ababyi takloba kum karebsou. A karebsou dinyi asi sunci diboka kalikoka kunubde bindarur! 15Sun dam asi Er Iya Erebdobnyi biryi Er minob, ‘Ukubkwansin,’ eamwe to kuboka teleb-teleb dinyi kunurdeirisurur. Teleb dinyi a kunurdeisurur to akwe malyito dinyi ababyi sun dam asi kunurdeirinkwansurur. Ba, Erci karebsou mutuk dam kuramunyi ani, dibsekwandum. 16Ara, sunci, sun Nai Iya Erebdobnyi ebdeiansici to kum kunuramunci, sun yuk lebesekoka yuk nang moloramingnyi kwemdeina asi molomunyi ura, Er Iya Erebdobnyi yu kubkwande. Yu kubci ura, Erci mutuk teleb kareansici mutuk dam kuramunyi asi obkiriboka kum dandeibkwansurur,” ebmou.
Currently Selected:
Yosua Uram 23: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
