Yosua Uram 17

Manasye yala nang asi me Yordan kouboka kitingbantam mutuk ebmai deyok

17:1-18

1Manasye bira Yusuf mi dunyi kuramwe. Ba, Manasye biryi er mi Makhir dunyi deiamwe. Ani, Makhir biryi Gilead deiamwe. Ba, Gilead bira yin dounanyi kuramwe ati, ersi mutuk si Gilead ab Basan ab ebmai ba, er mutuk kibdobmou. 2Ba, me Yordan kouboka kitingbantam ara Yusuf mi Manasye deibdoba mabwe meici kukoka dinatam nang ati ebmai ba, sun mutuk kibdobmai. Ara, Abiezer deibdoba ab, Helek deibdoba ab, Asriel deibdoba ab, Sekhem deibdoba ab, Hefer deibdoba ab, Semida deibdoba ab ati ebmai. 3Sun deirina deyok ara Yusuf biryi Manasye deiamwe. Ba, Manasye biryi Makhir deiamwe. Ba, Makhir biryi Gilead deiamwe. Ba, Gilead biryi Hefer deiamwe. Ba, Hefer biryi Zelafehad deiamwe. Uca, Zelafehad bira sal ton kum deiamwe. Eda, nerabwe akwe yaldakamwe. A deiamwe nerabwe si ara Mahla ab, Noa ab, Hogla ab, Milka ab, Tirza ab ukuboka deiamwe. 4A deyok aryi Er Imtamnyi biti ninyi dama deirinanyi imam si Eleazar ab, ninyi si Nun er mi Yosua ab yuk Israel weik nang ab asi bindoka ato ebmai. “Er Iya Erebdobnyi biryi Musa deici asi ebdeiamwe to kuboka, nun malnang sunbabyi mutuk taleronung to nunbabyi mutuk yuk talebdobkwayeb,” eboka molobmai. Ba, Er Iya Erebdobnyi biryi minob eamwe to kuboka sun malnang kankan aryi sunsi mutuk yuk ebmai. 5Manasye yala ara sal akwe mutuk kum dobmai, eda nerabwe ababyi mutuk dobmai. A deyok aryi Manasye deibdoba yala ara mutuk tukwe takubaryi dobmai. Ba, me Yordan kouboka yaletam Gilead mutuk ab Basan mutuk ab ababyi Manasye deibdoba akwe ebmai mutuk ara mutuk ilinto nukiribman kum. 6A deyok aryi Manasye nermabwe ara sun malnang kankan mutuk tukwe asi ebmai. Ba, Manasye yala meici kukoka ton nang ara Gilead mutuk asi ton ebmai.

7Ani, Manasye yala nang mutuk ara Asyer aryi wiliboka, Mikhmetat dam wiliboka, Sikhem mutuk yaletam ebmai. Ani, me youkwetam wilimna ara En-Tapuah nang mutuk sirya wiliboka eterebmai. 8Tapuah mutuk tukwe ara Manasye yala nang mutuk bok, weik atei Tapuah atei ara Efraim deibdoba nang mutuk dam wilibmai. 9Ani, a mutuk wiliba ara me Kana duman akwe wilibde binmai ani, me youkwetam ara Efraim yala nang mutuk dam wilibmai. A mutuk ara Manasye yala mutuk tukwe bok, Efraim yala nang ababyi atei mikbaryi sun dinyi kiamnyi. Akiryi kuboka tukwe wilimna aryi bisibkaboka ilila me kwan dingibwa dam bindoka wilibmai. 10Ba, me youkwetam ara Efraim yala nang tukwe kibdeibmai. Ura, me utam ara Manasye yala nang tukwe kibmai. Ba, weik me kwan aryi sekoka eitam ara Asyer yala nang tukwe kibdeibmai. Ba, yaletam ara Isakhar mutuk tukwe wiliba kibdeibmai. 11Bok, Isakhar yala nang tukwe ab, Asyer yala nang tukwe kankan ab ababyi Manasye yala nang tukwe a kuamwe. A mutuk weik atei si ara: Bet-Sean ab, mitik-mitik atei nirya ab, Yibleam ab, mitik-mitik atei nirya ab, Dor atei ab, mitik-mitik atei nirya ab, En-Dor ab, mitik-mitik atei nirya ab, Taanakh ab, mitik-mitik atei nirya ab, Megido ab, mitik-mitik atei nirya ab. Ara, a winiryi weik atei ara mutuk konkon dam akwe kuramnyi. 12Anda atei kuramnyi ninyi ara Kanaan yoka nang a tuba kuramnyi. Uca, Manasye yala nang aryi a mutuk nang asi kum yakdonokmai. 13Sun Israel nang iya a kubde baramnyi ani, mikib dongobtabakde baramwe ababyi, Kanaan nang asi kum danardeirina kum kubmai. Eda, sun il arungna nang kiboka wa dimnamnyi ba, sun wa iramnyi.

14Ura, Yusuf yala nang aryi Yosua bisi ato ebmai, “Nun yala ara Er Iya Erebdobnyi biryi kisal dangsur aryi, nun ninyi ilinto kunub bok asi, mutuk tukwe mitikto nun karebsoumwe ara unato ati kubsoumwe do?” ebmai. 15Uca, Yosua biryi ato ebmou, “Sun ninyi ilinto deyok aryi Efraim mutuk konkon ababyi nirya ai dona dukuansici aryi lo ton kum kuanci ura, Feris nang ab, Refaim nang ab mutuk co kankan asi bindobkwandarur. Bindokabmunci, co kweboka ai dobdobmunyi ura, kubdobkwandarur,” ebmou. 16Ba, sun Yusuf yala nang aryi ato ebmai, “Nun Manasye yala ninyi ab, Efraim yala ninyi ab ara ninyi weik aryi nun kun dikum nirya seknebdeibib. Ani, nun bindobman mutuk ara sun Kanaan mutuk nang sun ninyi ordana kereta besi ab mikib weik nang kunung. Akiryi nun ilil kusurur. Sun Kanaan nang tuba a kunung ninyi ara Bet-Sean dam kunung ninyi ababyi, mitik-mitik atei kunung ninyi ababyi, Yizreel kunung ninyi ababyi nirya ara sun kongkong eboka boyiban keica ara kat dinyi aryi kikninung,” ebmai. 17Ura, Yosua biryi Yusuf yala Efraim deibdoba nang ab, Manasye deibdoba akwe bok, kitingbantam kuramnyi nang ab asi ato ebmou, “Diba, sunda ninyi mitik kum kundarurci, sun mikib ababyi mitik kum kusurur ati, sunda mutuk taram tentok ebmasin kum. Eda, sunda weik mutuk asi kuna ara kikiman. 18Ati, a mutuk konkon dam nirya co kankan asi, a mutuk bukwe tok nirya co kweboka sun mutuk kibdobdarur. Ba, Kanaan nang minob a kunung ninyi asi yakdonokdarur. Besi aryi kiknin kongkong ena kikniboka deiramingnyi ababyi, mikib ilinto kuranci ababyi malyi, ur yakdonokwandarur,” ebmou.

Currently Selected:

Yosua Uram 17: MTG

Highlight

Copy

Compare