Yosua Uram 18

Er Imtamnyi biryi, “Karebkwansin,” ebdeiamwe mutuk tukwe kabloamnyi asi Yosua biryi sun tabaryi yala nang ati bokeibmou deyok

18:1-10

1Ura, sun Israel ninyi nirya ara Silo atei dam bulubmai. Bulubmaici, Er Imtamnyi ai Kemah Suci ai dobmai. Ara, Kanaan mutuk asi sirya arabdamnyi bok, mutuk ton tuba kablobmai. Ura, sun Israel nang nirya Silo dam Er Iya Erebdobnyi urasin dam bulubmaici, keis ol ai Kemah Suci ai dobmai. 2A talak ara Israel ninyi kankan aryi ninyi yala tabaryi asi mutuk ton kum dobmaici, suktalebmai. 3A deyok aryi, Yosua biryi Israel nang asi ato ebmou, “Sun kanya sulbalyi asa kunmarum ara mem. Er Iya Erebdobnyi biryi sun abwe yabwe deici asi ebdeiansou mutuk ara una talak aryi wengbinkwandum do? 4Sun Israel nang yala kundarur tok nirya ninyi winiryi-winiryi kiboka wibdarur! Ba, sun a nang asi niryi bokdonoknyi ba, sun kubdobkwamunyi mutuk tukwe wilimna wilirbinkwaming. Ba, dirbinamingnyi ani, mutuk wilimna sirya kerek sekoka ni dam boyankwaming. 5Sirya boyangnyi ura, a mutuk wiliboka-wiliboka tabaryi wilibdeibkwan. Ura, sun Yehuda yala nang ara dabura tam asi wilibdeibnyi ba, a mutuk iya kubdobkwaming. Ba, sun Yusuf yala nang ara eitam wilibdeibnyi ba, a mutuk iya kubdobkwaming. 6A mutuk bol otong dibdeboka wiliboka kerek sekoka bobmunyi ura, ni dam boyandarur. Ba, niryi nun Nai Iya Erebdobnyi urasin dam aryi yamin deibdeboka a mutuk yuk-yuk bokeibkwansin. 7Bok, Lewi yala nang ara Er Iya Erebdobnyi ai wa ina asi sun mutuk ato kubkwande. Ati, Lewi yala nang ara sun mutuk bongdeirinmasinya kankan dam aryi mutuk ton kum dobkwaming. Ba, Gad yala nang ab, Ruben yala nang ab, Manasye yala meici kukoka dinatam nang ab ara Er Iya Erebdobnyi wa inanyi Musa biryi ebdeiboka bokeiamwe to kuboka, Yordan kouboka yaletam mutuk kubdobkwaming,” ebmou.

8Ani, Yosua biryi ton ato ebdeibmou, “Bindoka mutuk wiliba sengmamunyi ani, ni dam boyamunyi ura, Silo dam Er Iya Erebdobnyi urasintam aryi yamin deiboka sun kubdobkwamunyi to bokeibkwansin,” ebmou. 9Ura, a nang anaboka mutuk wilimna kerek sengna boboka mutuk wilimna yuk-yuk sekde binmai. Bindoka mutuk wilimna sengmai ara tabaryi wiliboka sekmai. Ura, yandoka Yosua bisi keis ol ai dobmai ai Silo atei dam boyanmai. 10Ura, Yosua biryi Silo atei dam Er Iya Erebdobnyi urasin dam aryi yamin deiboka, sun Israel nang mutuk ton kum doamiryi suktaleamnyi nang asi mutuk bokeibmou.

Benyamin yala nang ati mutuk ebmai deyok

18:11-28

11Ura, yuma kobdob ara Benyamin yala nang ati mutuk bokeibmai. A mutuk ara Yehuda yala nang mutuk kan, Yusuf yala nang mutuk kan noutam mutuk asi bokeibmai. 12Eitam wilimna ara Yordan kin aryi kuboka weleboka, Yerikho atei deici tam diniboka, kitingbantam mutuk wilibmai. Akiryi kuboka mutuk konkon akiryi wiliboka, yini mutuk Bet-Awen dam wilibmai. 13Ani, outam kuboka ara mutuk as kaniboka, Lus ara Betel enung mutuk bindoka wilibmai. Ani, a wilimna akwe Atarot-Adar mutuk yurbindoka Bet-Horon youkwetam wilibmai. 14Ani, a wilimna ara kuboka Bet-Horon mutuk bisiboka, me youkwetam wilibmai. Ani, kitingbantam kuboka, Kiryat-Baal dam bindoka sirya wiliboka sirya dakdongobmai. A mutuk Kiryat-Yearim ara Yehuda yala nang mutuk kibdeibmai. Mutuk Kiryat-Baal er yuk si ara Kiryat-Yearim eramnyi. Kitingbantam ara ato kuboka wilibmai. 15Ba, me youkwetam ara Kiryat-Yearim kubkub aryi kuboka, kitingbantam mutuk wilibmai. Akiryi kuboka Me-Neftoah u dam kuboka wilibmai. 16A wilimna akwe mutuk Hinom kon deyok wanwanumna eitam kuboka wilibmai. Ani, Refaim nang mutuk lu tam aryi kuboka yurbindoka, Hinom mutuk dam wilibmai. Ani, Yebus mutuk yim akiryi kuboka ani, me youkwetam yurbindoka En-Rogel dam kuboka wilibmai. 17Ani, kebtamuboka En-Semes tam wiliryanmai. Ani, mutuk Adumim diniboka Gelilot mutuk akiryi kuboka ani, Ruben yala nang mutuk Bohan keil dam wiliboka dimdongorbinmai. 18Akiryi kuboka ani, Bet-Araba diniboka mutuk yim eitam wilibde welebmai ani, tubto yurbindoka, Araba-Yordan duman doboka wilibmai. 19Ani, a wilimna ara Bet-Hogla yim aryi kuboka eitam akwe wilibde welebmai ani, weik me kwan si Laut Asin dam bindoka wilibmai. Ani, me Yordan kin bindoka dibdongobwe mutuk me youkwetam wilibmai. 20Ba, me Yordan duman yaletam wilimna ara Benyamin yala nang mutuk wiliba dinatam-dinatam wilibmai.

21Benyamin yala nang ati ebmai atei si ara: Yerikho ab, Bet-Hogla ab Emek-Kezis ab, 22Bet-Araba ab, Zemaraim ab, Betel ab, 23Haawim ab, Para ab, Ofra ab, 24Kefar-Haamonai ab, Ofni ab, Geba ab ukuboka weik atei amolbaryi ab, mitik-mitik atei ab doramnyi. 25Ani, Gibeon ab, Rama ab, Beerot ab, 26Mizpa ab, Kefira ab, Moza ab, 27Rekem ab, Yirpeel ab, Tarala ab, 28Zela ab, Elef ab, Yebus ab ukuboka ara Yerusalem enung. Ani, Gibeat ab, Kiryat ab ani, weik atei 14 baryi kiboka mitik-mitik atei ab doramnyi. A mutuk ara Benyamin yala nang kunung ara sunti ukuboka ebmai mutuk asi a tuba kunung.

Currently Selected:

Yosua Uram 18: MTG

Highlight

Copy

Compare