Yosua Uram 1
1
Er Iya Erebdobnyi biryi Yosua bisi, “Kanaan mutuk araboka wengbirum,” eboka arukmou deyok
1:1-18
1Minob talak aryi Musa bira Er Iya Erebdobnyi wa irmilinanyi kuramwe. Ani, Musa sirya dibmou talak aryi Er Iya Erebdobnyi biryi Nun mi Yosua bisi ato ebmou, 2“Ni wa irmilinanyi Musa bira sirya dibmar ati, Yosua kan ab, sun Israel nang nirya ab kiknirminingdonmandarur. Sirya kiknibminikdobmunyi ura, anabdakabmunci, me Yordan kouboka Niryi sun Israel nang ati karebkwamasin mutuk dam asi wengbindarur. 3Niryi sun abwe Musa bisi minob ebdeianse to kuboka, sunci Kanaan mutuk yan yaniboka binkwandum tukwe nirya ara sun dinyi akwe kibkwansir. 4Ara, yini mutuk me youkwetam akiryi kuboka ani, Libanon mutuk kon sekoka me utam ara sun mutuk kibdeibkwansin. Tonda, me si Efrat duman yaletam akiryi kuboka ilila me kwan dingibwa dam kitingbantam mutuk nirya ara Het yala nang mutuk bok asi sun mutuk akwe kibdobkwandum. 5Kan kam kuraminyi talak ara yuk nang aryi mikib yaboka sasibdiryi, kansi mar iboka obkwankiranyi ton kum kubkwande. Eda, kansi Musa bisi tanglona kum uca, tuba miliranse to, kanbabyi tanglona kum uca, iya milinkwankin. 6Ati, kan kanyatam aryi ato tenebkwandum, ‘Er Iya Erebdobnyi biryi nisi iya milinkwanir,’ tenen mikib doboka kanya sasibdobkwandum. Ara, Niryi sun abwe yabwe ati, iya dib en uram aryi ebdeiansise mutuk bindoka sun mutuk kibdobkwandum. Sirya a mutuk bindoka sun mutuk kibdobmunyi ura, Yosua kanda Israel nang sun sienyi kibminci talebkwandim ati ebman,” ebmou. 7Ebmou cok, Er Iya Erebdobnyi biryi tubto ato ebmou, “Kanci, ‘Er Imtamnyi biryi nisi iya milinkwanir,’ tenen kanya bobminci, mikib kiboka kanya sasibdobkwandum. Ani, tonda diboka-diboka Ni wa irmilinanyi Musa bisi, ‘Ukubdarur-ukuna mem,’ ebdeianse uram nirya liliboka kununkwandum. Kanci siriktam babyi, kwanimtam babyi dirkingkaningna mem. Erda, Niryi, ‘Ukubdarur-ukuna mem,’ ebdeianse to akwe tuba teneiboka kununkwandum. Ba, dantam-dantam yibaminyi ababyi, telebto dinyi akwe kunubkwandim. 8Ani, kanci, Er Iya Erebdobnyi biryi, ‘Ukubdarur-ukuna mem,’ en uram nirya tuba nukoka ninyi eterena luba kimna mem. Eda, lukunda kitingtam nirya, ‘Ato ebwe-ato ebwe,’ eboka eterenkwandum. Ba, ‘Ukubdarur-ukuna mem,’ en uram ebdeibsise dinyi kerek sekanci to akwe kunubde binkwandum. Ato kuraminyi ura, kanci, ‘Ukuboka binkwan,’ teneboka baraminyi dikum teleb kuboka wengbinkwandum. Ani, teleb dinyi dobdobkwandim. 9‘Mikib kibdobminci, kanya sasibdobdum,’ sirya ebmakin. Ati, kan kanya ilil kuboka sulbalyi kanya bona mem. Ni Er Iya Erebdobnyi kan Nai Imtamnyi biryi kan dantam-dantam yibanmaminya nirya ara Ni kum takwankin iya milibkwankin,” ebmou.
10Ato ebmou ura, Yosua biryi sun Israel weik nang asi ato ebmou, 11“Sun Israel nang keis ol ai dobde kunung tok nirya asi yibinkirikoka ato ebde yibirum! ‘Er Iya Erebdobnyi biryi sunti eterebsici ba, kubdobkwandum mutuk wengbinkwamarum. Ara, me Yordan kouboka uki winiryi bisik dam banmamunyi ani, a mutuk binkwandum ati, bisik kona kiknirminingdonmandarur,’ ebdum,” ebmou.
12Ba, Israel nang yala ara yala amolbaryi kuramnyi. Uca, Ruben yala nang ab, Gad yala nang ab, Manasye yala dinatam nang ab ara me Yordan kouboka dinatam mutuk sun mutuk kibdobmai. Ura, Yosua biryi sunsi ato ebmou, 13“Er Iya Erebdobnyi wa inanyi Musa biryi sunti minob ebdeiansou to asi diboka teneibdarur. Ara, me Yordan kouboka yaletam lingkwa ara Er Iya Erebdobnyi biryi sun mutuk kibdobkwandum ati karebkwamasir. 14Ati, sun nerabwe mabwe ab, sun bisam yabwe ab ara Musa biryi minob eansou mutuk Yordan kouboka sun mutuk yaletam bindoka kabdeibkwandum. Ba, a kurongnyi ura, sun sal mar ordana kikiman nang ara minob menekoka sun kwit yabwe toubnibaryi yala nang ab, Manasye yala meici kukoka ton dinatam nang ab asi mar bobmiliboka me Yordan koubdeibkwandum. 15Milibmamunyi ura, tonkwa binmamunyi ani, Er Iya Erebdobnyi biryi sun winiryi yala nang asi minob lebdeibsouci, mangkau dinyi karebsou to sun kwit yabwe toubnibaryi yala nang ababyi Er Iya Erebdobnyi biryi lebdeiboka mangkau dinyi karebci bok asi, sun tamuboka Musa biryi sunti karebsou mutuk dam Yordan kouboka yaletam yandobmunci, sun mutuk kuronkwandarur,” ebmou. 16Ba, Ruben yala nang ab, Gad yala nang ab, Manasye yala dinatam nang ab aryi Yosua bisi ato ebmai, “Kanci ebmarim to kunubkwamab. Dantam-dantam bindarur ebsiminyi ababyi, kan ebminyi tok kunubkwanuba. 17Minob talak Musa biryi arungnansou ba, kunuramoubwe to, uku talak ababyi kanci aruksiminyi tok kununkwayeb. Nun Nai, Er Iya Erebdobnyi biryi Musa miliramwe to, kanbabyi Er Iya Erebdobnyi miliboka kisal dangkwankir. 18Kan ebmaminyi uram nirya dangabingnyi nang ab, kan uram kum kekebingnyi nang ab ara obkwaming! Ati, mikib asa aryi kan kanya wisibdobdum,” ebmai.
Currently Selected:
Yosua Uram 1: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
