Ulangan Uram 34
34
Musa dimna uram deyok
34:1-12
1Ura, Musa bira Moab mutuk lu tam aryi kuboka mutuk kon si Pisga dub binkwamouci, Nebo kon welebinmou. Ara, Yerikho atei bok, yaletam asi welebinmou. Sirya welebinmou ura, Er Iya Erebdobnyi biryi Musa bisi Kanaan mutuk nirya ara, “Ounun,” eboka lak kibdeibmou. Ara, Gilead mutuk aryi kuboka Dan mutuk nirya asi lak kibdeibmou. 2Ani, Naftali mutuk ab, Efraim mutuk ab, Manasye mutuk ab, Yehuda mutuk kitingbantam mutuk nirya asi lak kibdeibmou. 3Tonda, Negeb mutuk ab, Yordan mutuk lu ab, co si korma atei Yerikho mutuk lu ab, Zoar tingnande mutuk ab asi lak kibdeibmou ba, eibmou. 4Sirya eibmou ura, Er Iya Erebdobnyi biryi Musa bisi ato ebmou. Ara, “A sirya eibmarim mutuk si Kanaan ara kan abwe yabwe Abraham ab, Ishak ab, Yakub ab asi, ‘A mutuk ara sun deibdoba ati karebkwan,’ ebdeianse mutuk eibmarim. A mutuk ara Niryi kansi sirya lak kibdeibman ba, eibmarim. Bok, kanda a mutuk kum wengbinkwandim,” ebmou.
5Ura, Er Iya Erebdobnyi biryi ebdeiamwe to kuboka, Er Iya Erebdobnyi wa inanyi si Musa Moab mutuk aryi dibmou. 6Ba, Bet-Peor atei Moab mutuk asi Er Imtamnyi biryi a dongobmou. Ba, er a dongobwe ai ara ukubabyi asa dongobwe kum tenenung. 7Ba, Musa er kubde baramwe kwalina nungna ara 120 baryi kam kuamwe. Ba, Musa dibmou ababyi, er mikib ab, er asing ab ara luma ordena kum kubdenmou tok asi dibmou. 8Ba, sun Israel ninyi aryi, Musa diamwe ati engebde buramnyi uki nungna ara uki 30 baryi Moab mutuk lu dam aryi engeamnyi. 9Ba, ninyi si Nun mi si Yosua biryi Israel ninyi sienyi kibmouci, Musa unubmou. Ara, Musa biryi Yosua kisok deici taruk deibdongobokaburyi, “Yosua kanci ni unubkwanirim,” ebdeiamwe aryi erda etekdob kanya boamwe. Ato kuboka boamwe deyok aryi, sun Israel ninyi ara Yosua ebni uram kekeboka, Er Iya Erebdobnyi biryi Musa bisi ebdeiamwe to kuboka kunuramnyi. 10Ba, Musa biryi Er Iya Erebdobnyi urasin dibdandoka sisingnandei to ara sun Israel atei ninyi kankan aryi, Musa bito nabi ton kum unubkwaming. 11Ara, Er Iya Erebdobnyi biryi Musa deici ebdeibnaba, Mesir atei sienyi Firaun ab, er yin doun nang ab, er atei ninyi nirya urasin dam asi Musa biryi iya ilil tenen dinyi kikniramwe to ara yuk nabi nang aryi da ton kum kubdenkwaming. 12Ani, Musa biryi sun Israel ninyi urasintam aryi iya ilil weik tenen dinyi kunuramwe. A iya ilil weik dinyi kunuramwe to ara sun yuk sien nang aryi ton kum kuboka kubdenkwaming.
Currently Selected:
Ulangan Uram 34: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
