Yosua Uram 2

Sun Israel nang wengbindoka kubkwamnyi mutuk si Kanaan mutuk dam asi dirmeimbinmai deyok

2:1-24

1Ninyi si Nun biryi mi si Yosua deiamwe. Anyi Yosua biryi ninyi bitinyi kunusa dokoka nabmou. Nabmou ura, erci sunsi Sitim atei dam aryi bokdonokmou. Bokdonokou ura, ato ebmou. “Kanaan mutuk nirya ab, weik atei Yerikho ab asi biti dirmeimbirurum,” ebmou. Ato ebmou ura, anabdobmareici, binmarei. Bindoka dirmeimkiringmarei ani, talyi yortamni ner si Rahab ai bindoka mabmarei. 2Bindoka mabmarei bok, Yerikho nang bikmaici, sun weik sienyi bisi ato ebmai, “Israel nang sal bitinyi arub lukunda a mutuk dirmeimyanmasiring,” ebmai. 3Ato ebmai ba, Yerikho weik sienyi biryi Rahab bisi ninyi bokdonokmouci, ato ebdeibmou, “Rahab kan ai yandoka mabmaring nang ara nunsi dobkwetebsurum. A nang ara a mutuk nirya, ‘Ninyi obkaboka mutuk arabdobkwayeb,’ tenen dirmeimyanmasiring ati ebman,” ebmou. 4Ato ebmou bok, Rahab biryi a dirmeimyanmarei bitinyi nang asi inibdeibokmou. Ura, Rahab biryi ingkirikde yanganmai nang asi tola ati ato ebmou, “A yanmarungwe nang ara, ‘Israel nang yanmaring,’ kum tenebmonwe,” ebmou. 5“A nang ara inibdoroban lika bublan kum tirikabungwe uca, minob anaboka bindobmaring. Sun bindobmaring bisik ara ni kum bikman ati, ukuca dombindarur dam seknebkundumca,” ebmou. 6Ato ebmou bok, a bitinyi nang asi Rahab biryi, “Ni ai dub ei yangabyi ai asi weleboka subla ato keica, ‘Ilim alakci ba, ongon aling wibkwanuna,’ tenen labdeibse kankan asi inibdobdurum,” ebmou. Ba, inibdobmarei. 7Inibdobmarei ba, “Dib ebda,” tenen dombanmai nang ara Yerikho atei lika sirya bisiboka binsekmai ura, akatei nang aryi bublan tirikdongobmai. Dombanmai nang ara ingkirikde binmai ani, me Yordan kouramnyi dikum nirya bindoka dibdenmai.

8A lukunda ara a bitinyi nang kum maabdei talak aryi Rahab biryi ei yangaamnyi ai sunsi welebinmou. 9Welebinmou ura, ato ebmou, “A mutuk ara Er Iya Erebdobnyi biryi sun Israel nang ati, ‘Sunsi karebkwansin,’ ebsou dinyi ara ni bingnun. Akiryi nun a mutuk ninyi nirya ara sun Israel nang asi ilil mitik kum kusururci, kanya ululumna talesurur. 10Ara, nun kekenub uca, ‘Iya Erebdobnyi biryi ilila me kwan si Teberau ebok Kolsom ebok kimnung me kwan sun urasin dam cebdeibmou ba, Mesir kuramnyi ani, yanamnyi,’ ena kekenub. Ton kekenub ara, ‘Yordan kouboka yaletam mutuk si Amori sien nang bitinyi si Sihon ab, Og ab obkabyi,’ ena bingnub. 11Ato eboka nungnung ba, kekenubci, nun ilil mitik kum kusurur. Ani, sun ab ordana ara nun kanya ninika dongoransir. Ara, sun Nai Iya Erebdobnyi bira imtam babyi, tukwetam babyi Er dinyi akwe kurur deyok aryi nun ilil mitik kum kusurur. 12A deyok aryi Er Iya Erebdobnyi si deici aryi ato ebnururum, ‘Kanci nunbabyi lebdobmasirim deyok aryi, nunci kanbabyi lebdobkwankinim,’ ebnururum. Ani, ni ai ninyi nirya lebdobkwansururum,” Rahab biryi ebmou. 13“Ara, ni kwin ab, ni nai ab, ni malnang ab, ni ka yabwe ab sun ai ninyi nirya kum obkwansumunyi ura, si darabdeiboka, ‘Kum obkwansib,’ ebdeibnururumci, birurum,” Rahab biryi ato ebmou. 14Ebmou ba, a bitinyi nang aryi ato ebmarei, “Nunsi dukdobmasirim a kunum. Kanci a bukmaring ebde yibisiminyei. Er Imtamnyi biryi a mutuk nun Israel nang ati karebkwinsici ura, nunci kansi busul asa aryi lebdobkwankinim,” ebmarei. 15Ato ebmarei ura, Rahab biryi boton bisik tabwe biriboka dobkwetebmou. Er atei ara ilila keil lika wiliboka doamnya deici kuramwe aryi tabwe dem baitam biriboka dobkweteblobmou. 16Dobkwetebmou ura, ato ebmou, “Sun ingkiringmasing nang asing eibsingnyei ati mutuk konkon eitam bindobdurum. Bindoka uki winiryi kuronmarurumnyi ba, ingkiringmasingnyi nang tamuboka atei yangnyi ura, me kouboka bindobkwandurum,” ebmou. 17Ebmou ba, a bitinyi nang aryi ato ebmarei, “Kan molobmarim to kunubkwankinim. Bok, kanci nun ebmanim to kum kunubmaminyi ura, nunci kan molobmarim dinyi kum kunubkwankinim. 18A diboka bikandum nun akatei wengyangabyi ura, nun a dobkwetebmasirim bi bol tabwe ara tuba a biriboka dolobkweteblobkwandum. Ukubmaminyi ura, kan ai ninyi nirya, kan kwin ab, kan nai ab, kan weit yabwe ab, kan du yabwe ab, sun ai ninyi nirya kan ai akwe buluboka wekdobkwandarur! A ebmanim to kum kunubmaminyi ura, a lebkwankinim ebmanim dinyi kum kunubkwankinim. 19Kan ai umbura aryi anaboka yibangnyi ba, obmabyi ninyi ara erdamnyi obdanmariryi, ato kuboka obdanmarinyi bira nun dam deyok kum yankwande. Bok, akai umbura obdongobingnyi nang asi ara nun dam deyok kubkwande. 20Bok, kanci si daraboka iya dib en uram eboka molobmarim to ara nunsi lak, ‘A nang ara a bukmaring,’ ebde yibisiminyi ura, a ebmarim to ara kum kunubkwande,” ebmarei. 21Sirya ebmarei ura, Rahab biryi ato ebmou, “Sun ebmarurum to kunubkwaman,” ebmou. Ura, a nang bitinyi asi, “Ur birirum,” eboka bokeibmou. Ba, bindobmarei. Sirya bindobmarei ura, a bi bol tabwe boton bisik aryi tuba biriboka dolobkweteblobmou. 22A dirmeimyanandei nang ara eitam mutuk kon tam bindoka uki winiryi kunmarei ba, sun ingkiringmai nang ara a mutuk nirya ingkiringdenmai uca, asing kum eibmai. 23Asing kum eibmai ura, a bitinyi nang ara mutuk kon aryi anaboka, me Yordan koubmareici, ninyi si Nun mi Yosua bisi sun ukubmarei to bindoka nukmarei. 24Yosua bisi ato ebmarei, “Nun Nai Iya Erebdobnyi biryi Kanaan mutuk nirya ara nunti karebsou. Ani, nun ab ordana ababyi a mutuk nang nirya sun sirim talerur,” ebmarei.

Currently Selected:

Yosua Uram 2: MTG

Highlight

Copy

Compare