Ayub Uram 9
9
Ayub biryi, “Er Imtamnyi urasin dam ara ninyi tentok aryi katabdongoboka tikman kumto kurur,” ebmou uram deyok
9:1-35
1-2Ayub biryi er kwit Bildad bisi uram ato eboka dekeibmou,
“Diba ati, ni kwit a, kan teneibmarimci, ebmarim uram ara nibabyi bikman.
Bok, eda, nun ninyi aryi Er Imtamnyi urasin dam asi diboka u dikum dinyi kunun nang kibdankwamatibyi ara kiknibkwamasute do?
3Nun ninyi ab Er Imtamnyi ab uram eboka tatardanmatibyi ura,
Erci nunsi asirdena 1.000 baryi asibdesute ura, nunci Ersi sirik tentok ababyi uram dengna ton kum dekeibtibyi.
4Er Imtamnyi bira bukdob bingnanyi ab, mikibnyi ab kurur.
Er Imtamnyi ab nun ninyi ab tatardanmatibyi ura, ninyi sirik aryi Ersi tatabdongobkwamatibyi do?
Ara, ukubman kum eda, Er Imtamnyi biryi muna tatabdongobkwansurura.
5Er Imtamnyi bira nun ninyi dam asi, ‘Ukubkwan,’ kum ebmariryok mutuk kon lulungsinirur.
Ani, Er yu asa aryi mutuk kon daldaluboka bongsinirur.
6Erci tukwe bukanci mutuk asi kisirdeirirur.
Ba, mutuk sasimna ara lulungdeirirur.
7Erci kiting asi, ‘Belekuna kobdob anamyangana mem,’ eboka bisik sengdur ba, ola kum anamyangarur.
Ani, kurya lukunda talak tilin dinyi asi lika dordeirur.
8Ninyi yuk nang ton milina kum uca, Er tentok aryi im kiknibmou.
Ani, Er tentok asi weik me kwan deibwa malyi kiboka kuruningnande deici lingyibarur.
9Me utam kuboka neik ai torande kurya si Biduk ara Erci tobdeibmou.
Ani, tonda noutam neik ai longororaming kurya si Belantik ara Erci tobdeibmou.
Tonda, noutam neik ai longororaming kurya si Kartika ab, me youkwetam neik ai longororaming kurya si Ruang Selatan ab ara Erci tobdeibmou.
10Nunda, Erci wa iboka kiknibmou dinyi ara, ‘Ato kuboka kiknibmou,’ teneboka bingna kum kunub.
Erci ilil tenen dinyi-ilil tenen dinyi kiknibmou ara nukman kumto kurur.
11Erci ni urasin dam menengbisiroryibanmaci ura, niryi Er asing kum eirinun.
Erci bisiroryibici talak ara ni kum bingnun.
12Er Imtamnyi biryi leboka doronmote ura, unanyi biryi Ersi bisik sekwamote do?
Unanyi biryi Ersi,
‘Kanda una kunmarim do?’ eboka ton erekdobkwamote do?
13Er Imtamnyi bira yu wekmaci ura, Erci darardongona kum kubkwandur.
Ilila kwatima weik me kwan umbura kurande kwatima si Rahab milin nang ababyi Er Imtamnyi mikib amwetam asi amol koubdakoka ngang dangdongoraming.
14Ati, niryi Ersi lebesekoka, ‘Kanda, kikiman kumto kurum,’ eboka tatabkwamatinyi ara wanok, niryi ato ebman kum.
Niryi una uram eboka Ersi tatabkwamatinyi do?
15Niryi malyi kun dinyi ton kum kuranyi ababyi, niryi Ersi kum tatabnun.
Eda, Er Imtamnyi bira ninyi malyi kuna deyok lilinanyi bisi, ‘Ni boukwe kibdobnurur,’ tenen Ersi molobdobkwanun.
16Niryi Ersi, ‘Kanda malyito kurum,’ ebtinyi ura, Erci, ‘Ni malyito ton kum kunun,’ ebnute.
Ani, Erci nisi, ‘Diba, Nira malyito kunun,’ kum ebnute.
Eda, Erci nisi uram muna kibdongobnute.
17Ura, Erci nisi ibalya doboka obminiknute.
Ani, boukwe kum asa aryi nisi dilaka cabminiknute.
18Ani, Erci nisi, ‘Ur isin ton sebdobde bok,’ tenen ton kum lobdeibnute.
Eda, Erci nisi u sik mitik kum dinyi aryi tabakdongoboka bobdeibnute.
19Ba, niryi mikib dinyi ati, uram ebkwamatinyi ara,
mikib ara Er dinyi kurur deyok aryi Erci nisi uram muna tatabdongobnute!
Ba, Erci diboka kikimanto kuboka sekwetebmote dinyi ara,
unanyi biryi Ersi tatabkaboka tubto lukoka elekwamote do?
20Nibiramnyi biryi, ‘Nira malyi dinyi kunubde kum banun asi bingdanun,’ eboka limdaronmatinyi.
Bok, Er Imtamnyi biryi ni mining uram erantinyi dinyi aryi nisi, ‘Kum, kanda malyi dinyi kurum,’ eboka lak kibnute.
Nira malyi kun dinyi ton kum kurantinyi ababyi,
Erci ni malyi kun dinyi lak kibdeibnute.
21Ni malyi kun dinyi ara ton kum kunun asi bingdanun.
Bok, nisi aminda kunubkwanir dinyi ati, ‘Ni talya kubkwanir,’ tenen kum libdanun.
Ni kam kuna ara ni boubdob ati, a dibokmanun.
22A nirya ara neiktoto dinyi akwe kurur.
A deyok aryi niryi ato enun, ‘U dikum dinyi kunun nang babyi, malyi kun dinyi kunun nang babyi nirya ara Erci mambul dinyi babyi, din dinyi babyi nirya Erci karesurur,’ enun.
23Er Imtamnyi biryi sun malyi kun dinyi ton kuna kum nang dam asi mambul dinyi karerur.
Ara, Erci ninyi litungna tabwe aryi lituk-lituk eboka diba oboka mairaming to kurdeirirur.
Ba, sun a mambul dinyi sun dam douryanmaci ati, Erci sunsi boukwe kimna kum uca akwi turur.
24Sun malyi kun nang asi Er Imtamnyi biryi im dangna tukwe dangna mutuk talen nang kimdeirirur.
Ba, diboka kikimanto kuboka lilibdeibmanto ara Erci sun ninyi malyi kuna deyok lilin nang asi asing kurminingdongdur.
Er Imtamnyi biryi ato kum kurante ura, unanyi biryi kurante do?
25We, ni kam kun uki berengdur ara ola bisiroryibarur aryok se.
Ara, cungnaming nang aryi cungnaming olong ara nimalyi cungnaming bok, ni kam kun uki ara iya ola bisiroryibarur aryok se.
A uki ara ni kanya kilkil kanya boboka kun uki ton berengna kum kurur.
Eda, ola berekabci ani, kum danarorur.
26Uki bisiroryibarur dinyi kiklina ara win yok co ngun-ngun aryi me deici ola cungyibarande to kurur.
Ni kam kun uki kum danarorur ara maka bib aryi lena eiboka ola u nunuki yuryibarande to kurur.
27-28Ni kanya aryi, ‘Ni mambul doran dinyi ara luba kibokabniryi,
urasin lengleng eboka si kiriboka akwi tubkwan,’ tenebtinyi.
Ato tenebtiniryok, ton kanya teneirongtinyi uca,
Kanci nisi, ‘“Ayub bira malyi kun dinyi ton kum kurur,” kum ebnurur,’ tenebtinyi ura,
ni kanya mambul aryi ilil mitik kum kubnute.
29Imtamnyi, nira malyi kunanyi kunun ara Kan sirya bingnurum.
Bok, niryi, ‘Nibiramnyi, libdandobkwan,’ tenen talyitam uram aryi eboka limdaronmatinyi ara unatoa dobkwamatinyi ati, ato eboka libdandobkwamatinyi do?
30Ni baramnyi, ‘Ni malyi kun dinyi me ilikabokwan,’ tenen lumtaia kait dinyi aryi ilikdanmatinyi.
Ani, ‘Ni baramnyi libdandobkwan,’ tenen sabun aryi ni taruk me ilingdaronmatinyi.
Niryi ato diba ukubtinyi ababyi talyi ukublobkwamatinyi.
31Niryi ato ukunmatinyi bok, Kanci nisi dobtaleboka mintal umbura yukdongobnutum.
Ba, ni aling kait ongon aling ara mintal dubnute ura, ni alyi mitik kum kubnute.
32Er Imtamnyi bira ninyi ni tonyi kum kurur.
A deyok aryi niryi Ersi uram eboka arukniryi,
‘Nun tonkwa deyok lilirdeisin ai binkwanim,’ eboka arukman kum.
33Ninyi sirik ara unanyi biryi ni ab Er Imtamnyi ab noutam tikoka deyok lilirdeirisinanyi kibkwamasute do?
Ninyi sirik ara nun bitinyi nang deyok ati, noutam tikoka lilibdeibkwamasiting nang ara ton kum kunung.
34Er Imtamnyi biryi nisi, ‘Co balana aryi kulabkwan,’ teneanici dinyi ara taklobnurur.
Ani, Erci nisi, ‘Mambul weik don dinyi karebkwan,’ teneanici dinyi ara kununing kum.
35Ba, niryi ilil kum asa aryi Ersi uram sisikwanun.
Ara, ni damnyi bira ni malyi kunun dinyi ara kum bingdanun deyok aryi akata asa aryi ni damnyi libdandobkwan,” eboka uram dekeibmou.
Currently Selected:
Ayub Uram 9: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
