Ayub Uram 10
10
Ayub biryi, “Er Imtamnyi bira u dikum dinyi kunun nang asi mambul dinyi karesurur ara kikiman kum bok karesurur,” ebmou uram deyok
10:1-22
1Ayub biryi uram ato ton ebmou,
“Ni kunun ara ura sirya boubmanir.
Ati, ‘Niryi ni mambul donun dinyi ati, Er Imtamnyi urasintam asi angabkabokwan,’ tenebman.
Ani, ‘Ni kanyatam u sik bukdob yinurur dinyi ati, Er dam uram ebkwan,’ tenebman.
2Niryi Er Imtamnyi bisi uram ato ebkwan.
Kanci nisi, ‘Kanda malyi kurumnyi,’ eboka durukdongobniminyei.
Kanci nisi, ‘Ato deyok aryi Niryi kansi mar bobkise,’ eboka lak eboknurum.
3Kanci nisi mambul bordeirinurum ara Kan kanya teleb kukurur do?
Ani, nira Kan taruk aryi kiknibmanoumwe dinyi asi bai donongdongnina ara Kan kanya teleb tenerum do?
Ura, Kanda unatoa ati, sun malyi kun nang aryi kiknirminingnung malyi tenen dinyi asi makirorum do?
4Imtamnyi, Kan asing ara nun ninyi sirik bonub ato asing borum do?
Kum, Imtamnyi, Kan tenen dinyi ara yuk ba, nun ninyi tenen dinyi ara yuk.
5Imtamnyi, Kanda nun ninyi tiya ati kam kunub atonyi kurum do?
Kanda nun ninyi tukwetam nang aryi tiya atikwe kam kunub atonyi kum kurum.
6Kanda iya kamnyi kurum cok, Kanda unatoa ati, ni tiya kam kununyi malyi kun dinyi ati lilib-lilib eboka ingkiringmaniminci, Kan uki kum danardeirirum do?
Ani, ni malyi dinyi asi lilim-lilim enurum do?
7Kanda niryi malyi kun dinyi ara ni ton kum kunun ara sirya bingnurumcok asi Kanda nisi, ‘Ayub a, kanda malyi kurumnyi,’ enurum do?
Ani, tonda Kan taruk aryi nisi kulanmaniminyi ura, ninyi tentok aryi nisi lobdeibman kum kurur.
Ato kurur ara Kanda sirya bingnurumcok, asi Kanda unatoa ati ni malyi kun dinyi ingkiringnurum do?
8Nira Kan taruk kobdob aryi kiknibmanoumcok,
tubto danguboka Kanci nisi, ‘Obkabokwan,’ tenen kunurum do?
9Kanci nisi ngat tukwe aryi kiknibnoumwe asi kanya teneibdenkwandum.
Nira Kanci kiknibnoumcok, Kanda unatoa ati, nisi, ‘Tubto tamuboka tukwe borbosa daneibkwan,’ tenenurum do?
10Kanci nisi ni nong ninyi ining aryi ni kiknibmanoumwe.
Ani, Kanci nisi ni kwin mundu umbura aryi nebdeibmanoumwe.
11Kanci nisi bol ab tub ab kiknibmanoumwe.
Ani, Kanci nisi yok ab melmel ab laboka denebdongobmanoumwe.
12Kan busul dinyi aryi nisi boukwe kiboka kam kun dinyi karebmanoumwe.
Ani, Kan kalingnina mikib aryi ni kanya asi dirniliroranoumwe.
13Bok, a kubde yanganyi talak aryi inibdeibnoumwe dinyi ara ukura sirya bikdongobmakin.
Kanci nisi, ‘Mambul dinyi bobdeibkwan,’ teneboknoumwe dinyi ara ukura ni sirya bikdongobmakin.
14Niryi malyi kun dinyi kurantinyi asi Kanci lilim-lilim eranutum ara kikiman.
Ani, Kanci ni mining malyi kun dinyi ati weneranutum ara kikiman.
15Niryi malyi kun dinyi ukuranyi ura, ni damnyi orminingdaraniryi.
Ba, nira malyi deyok ton kum kunun bok, yuk nang aryi ni durungdonung.
A deyok aryi ni akata kuboka ngang ereboka dibwelebdenman kumto kunurur.
Ani, ni mambul donun dinyi dirdena ara nisi orminingna dinyi akwe kimdur ngang erebokman kum kunurur.
16Bok, niryi, ‘Ni damnyi libdandobkwan,’ tenen ngang ererongnyi ura,
Kanci nisi bai kam si singa kuna domkiringdoranirim.
Ani, tonda niryi Kansi, ‘Nira malyi dinyi ton kum kunun,’ ebnyi ura, Kan mikib aryi nisi tubto mar boranirim.
17Kanci nisi tatab-tatab erdongnin nang yuk nang ton ingkirikoka tabangdongoryangarandim.
Kanci nisi yu boranirim dinyi ara tutukdongoboka iya yu bormururanirim.
Ani, ukuryok yin doun nang tabangdorandim.
Ani, nisi mar bonunung nang yin doun nang yubwa arungdongonurum.
18Ni kwin biryi ni deirinmanou tum ara Kanda unatoa ati, ni kwin bisi deibmilibmanoumwe do?
Kanci nisi oubokanutum ba, yuk nang aryi ni kum eibmanei talak aryi minob dibokantinyi.
19Ba, ni kwin mundu umbura aryi anamyangana kum uca, tukwe ungdona umbura wengdorbinantinyi.
Ba, nira ni kwin biryi ton kum deiana ato kuanute ura teleb.
20We, ni kam kuron uki ara uki mitikanun kubmar.
Ati, Kanci nisi mundu lobdeibmaniminyi ba,
uki mitikanun ara ni kilkil asa kuronmanyi ani, dibdongobkwan.
21Niryi kunuk atei dam asi ilil tenen mutuk bakan dam kabul kum binabnyi talak aryi teleb asa kunmanyi ani,
ni bindobnyi ura, aminda tubto kum tamuryankwan ati ebman.
22Ni wengbinkwan mutuk dam ara kunuk ilinto mutuk dam asi wengbinkwan.
Ani, ilil tenento mutuk asi diboka liliboka kurona kum mutuk dam asi wengbinkwan.
Din nang wengbaraming mutuk dam ara berengna ababyi kunuk ato kurur mutuk dam asi wengyurbinkwan ati ebman,” ebmou.
Currently Selected:
Ayub Uram 10: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
