Ayub Uram 8
8
Ayub er kwit si Bildad biryi, “Er Imtamnyi biryi wenerur dinyi ara kikimanto kuboka wenerur,” ebmou uram deyok
8:1-22
1-2Ura, Ayub er kwit Suah ateinyi si Bildad biryi Ayub bisi ato ebmou,
“A mi, Ayub a, ato uram ena ara takokdum, iya ebmurubde biminyei.
Kan si angdona aryi uram erum dinyi ara mikib weik bok, kumwe mikib talyi karin uu eryibarande to uram asi erum.
3Nun Nai Imtamnyi bira kikiman kum dinyi ton karesurur do?
Er Iya Mikibnyi bira dib kum dinyi ton karesurur do?
4Kan mabwe aryi Er urasin dam asi malyito kurdongoramnyi.
Ba, Erci sunsi taklobninto kubmou ba, sun mining malyi kun dinyi aryi sunsi obminikmou.
5Bok, kanda nun Nai Imtamnyi bisi ingkirikdobdum.
Ani, tonda kanci Er Iya Mikibnyi biryi boukwe kimna dinyi asi molobdobminyi ura,
Erci tanglona kum kubkurur.
6Ani, kanda teleb kuboka inina dongna kum kuraminyi ura,
Erci kanti ola tikalaboka
kan ai dam kuramwe dinyi asi kum danamwe ara tubto tamubkarebkwankir.
7Ba, minob kuramoumwe dinyi kanya teneibde, aminda kubkwandim dinyi kanya teneibde kibkwandim.
Uca, ‘Minob ababyi teleb kuranse bok, ukuryok kuran dinyi asi iya teleb kuran,’ teneboka kan kanya iya kilkil mitik kum kubkwankir.
8Sun minob talak kuramnyi dinyi deyok ati kanya teneibderum.
Ani, nun abwe yabwe kuramnyi talak aryi liliramnyi dinyi asi tamuboka dibderum.
9Nunda ukuryok ambutum deibmasungwe mabwe ato nang kunub.
Ati, nun ukutoto iya mitika ton kum bingdonuba asi kanci tamuboka dibderum.
Nun tukwetam nang kam kun uki ara kukumna akubiting erande to kurur deyok asi dibderum.
10Ba, nun abwe yabwe aryi minob bukdob bingna dinyi etereramnyi uram asi kanci kanya teneiboka bikdobkwamatum ara kikiman.
Ato kubtum uca kanci uram bikdob ebkwamatum.
11Win ara tukwe keta ai tikanci ura, imtam ton lomdur do?
Ba, me nunia ababyi me kin ai kum tikanci ura, lukluk eboka ton arur do?
12A me nunia ara yok katana kum kuanci bok, kwinibmangnyi ura,
yuk sungsung kabul kum tumakmaci bok a me nunia asi minob tumangnande.
13Ato kuboka sun Er Imtamnyi bisi ilil kum kuramingnyi nang nirya ara me nunia ato nang kunung.
Ba, sun malyi kun nang aryi, ‘Aminda ara teleb kubde binkwamib,’ tenen dibde buraming dinyi ara kum danarorur.
14Sunda katabdob kum dinyi, ambaroka ai dorande tabwe ato dinyi iya kanya deirinung.
Sun kanya deirin dinyi ara iya kat kum dinyi ambaroka ai karin noutam biribdeiboka kurande ato dinyi asi kanya deirinung.
15Sunda sun bobde ai miningdamingnyi dinyi asi kanya dorwelenung.
Bok, a dinyi nirya ara kat iya kum kubkwande.
Sunci, ‘Nun bona talena asi iya taruk talebnurubdobkwayeb,’ tenenung.
Bok, sun ai dinyi ara iya kum kubmurubkwande.
16Er Imtamnyi bisi diba tenena kum nang dika ara sungsunga kiting deibmaci bok, lukluk eboka arande to kunung.
A nang dika sun kuraming ara maning aryi wa in dam aboka a nirya obninikoka limnande to kunung.
17Maning ara keil bukanci dub ai lambindoka iya kwatibokabdiryi,
yating keil telerona bisik asi wengbindoka iya armururande.
18Bok, a bukanci ai akiryi kwinibkabokingnyi ura,
a bukanci dikum ara ninyi aryi, ‘A dinyi ara a dikum ato kuboka aamwe,’ ton kum tenenung.
19Ato kuboka sun malyi kun nang ara tiya ati teleb kanya boboka kuramingnyi ani, dimdongnaming.
Sirya dibokingnyi ura, yuk nang aryi sun kuramingnyi olong unuraming.
20Er Imtamnyi bira sun Ersi diboka dib teneramingnyi nang ara, ‘Ni li,’ eboka ton kum bai dongdonongdur.
Bok, sun yu dinyi akwe kunuramingnyi nang ara Erci sunsi taruk taleboka ton boyibana kum kurur.
Ati, a dinyi ara diboka bikdobkwandum.
21Ato ebnaryok, kansi ebkwinkin ara ato. Erci kansi kanya kilkil kun dinyi karebkwankir.
Ba, kanda kanya kilkil aryi akwi tubkwandim.
Tonda, kan kanya kilkil aryi kan si bambol dam ara mot seboka dangna dinyi akwe bobkwandim.
22Kansi yu borankingnyi nang ara sun alyi aryi wimum-wamum ebdankwaming.
Ba, yu dinyi akwe kunuramingnyi nang sun atei ara dakoka kum daneibkwande,” eboka Bildad biryi Ayub bisi ato ebmou.
Currently Selected:
Ayub Uram 8: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
