Ayub Uram 7
7
Ayub biryi, “Ninyi kam kunuba ara ikin dinyi kurur,” ebmou uram deyok
7:1-21
1“Nun ninyi tukwetam kam kunub ara il weik doboka mambul donub.
Ani, nun kam kun uki berengdura a nirya ara dengna wa in nang aryi uki diboka bingna kum uca mambul kirikde iraming to kunub.
2Yuk nang aryi il weik wa arungnaming ba, iraming nang aryi kiting tin ati, ‘Kiting koka ai ton bukoktinyi,’ teneraming to kunub.
Ani, tonda dengna wa in nang aryi wa damnyi biryi dengna karena ati kalikoka dibde buraming to kunub.
3Ato aryi niryi, ‘Ato mambul don dinyi karebnute,’ tenen wimna ton kum kunun.
Asi ni mablikibde yanganun wala a nirya ara mambul weik dinyi asi karenurur ba, mambul dobdoro yanganun.
Ani, ni mabde yanganun tam lukunda inirur ara niryi, ‘Nira mambul dinyi ton dobdobtinyi,’ ton kum tenenun.
Bok, ni mambul dobkwanse ati kanya teneianou to mambul weik doronun.
4Ni wi marbinmanyi ai aryi ato kanya teneibde manun, ‘Kiting yakna unabaryi aryi bukokwaman do?’ tenenun.
Uca, lukunda inibmaci ura inina cang kimdur.
Ba, ni wi mablukman kum kunmanici ura, ‘Se, minola berekci e,’ tenebde manun.
5Ni nong bobdobse tok a nirya ara ku aryi nalilikde sangnururci, sici borbosa akwe deibnou.
Ni bol ara bukam biribmanici ani, botobnici ura, yabung obde sangnurur.
6Ni kam kun uki ola kum danarorur ara ongon aling denen keica olong kongkaning-kongkaning eryibarande to ara bisibkaboka iya ola nun yibindoka kum danarorur.
Ani, niryi dibde bunun dinyi kum dobdobmanyi bok, ola kum danarorur.
7Ati, Nai Imtamnyi, ni kam kunun ara isin ut erkarongnaming ato dinyi dem aryok kam kunun.
Aminda ara niryi ur mangkau kuboka teleb kun dinyi tubto do ton kum kubkwan. Ati, Kanci nisi boukwe kibdobnurum.
8Nai, ukuryok talak ni asing eiriraningnyi nang ababyi do talak ara sunci nisi tuba kum eibkwaning.
Ukuryok ara Kanci nisi eiriraniminyi ani, do talak ara a tuba kum kuranyi asi ingkiriklobkwanirim.
9Ninyi dinung nang wengbanung ai bingnyi ura, tubto tamuryangana kum kunung.
Ara, duwa aryi ibmaci ani lakoka kum danarorande to kunung.
10Ba, diamingnyi nang ara tubto tamuboka er kuranci ai yangana ton kum kunung.
Ani, er minob kuranci ai kuramingnyi nang ara ersi kum bingnung.
11A deyok aryi nibabyi uram kilikoka kum kunkwan.
Eda, ni kanya mambul doranyi talak ara uram tuba ebde kunkwan.
Niryi ni kanya u yiranci talak ara ngalukde kunkwan.
12We, Nai Imtamnyi, Kanda nisi, ‘Ayub bira yunyi kurur ati, tabwe birikeibkwan,’ tenenurum do?
‘Erda, weik me kwan atonyi kurur ati bisik sekwan,’ tenen kunurum do?
Ani, nisi, ‘Erda yu ilila kwatima korotnyi bitonyi kurur ati, tabwe birikeibkwan,’ tenen ukunurum do?
13Ni kanya aryi, ‘Mabokmanyi talak aryi ni mambul donun dinyi kum dankwanir do?’ tenen mabdenmanyi uca, mambul dinyi kum danarona ton kum kurur.
Tonda, ‘Ni mambul kiringdonun dinyi ara marongbinyi uca, luba kibokwan do?’ tenen mardenun uca, luba ton kum kimnun.
14Bok, Kanci nisi ilil tenento lengdera kareboka du kanya yangdeiriranirim.
Ani, nira a dinyi akwe teneim-teneim ena aryi ni kanya ara ilil weik kunurur.
15Ati, ni u dobde kuran dinyi ara mambul dorona ni li kunurur.
Eda, Kanci nisi ngang kotoka obkaboknutum ba, dirongna dinyi asi ni teleb teneran.
16Kam kuna ara ni boubdob aryi ni li kunurur ati, ‘Ni ola diboktinyi,’ tenenun.
Ni kam kun uki ara isin ut erkarongnaming ato kunurur.
Ati, ni ola dibokwan ati, Imtamnyi Kan taruk ara ni taruk ur lobdongobnurum.
17We, nun ninyi tukwetam nang ara talyitam nang kunub.
Bok, Kanda unatoa ato ati, teleba ato dinyi kibdeiboka ererdeirisurum do?
Ani, unatoa ati nun ninyi asi, iya dirburusurum do?
18Kanda unato ati, belekuna tuba-tuba dirongyangasurum do?
Ani, uki ton dangbisina kum uca, Kanci nunsi tuba-tuba ukurdesurum do?
19Una talak aryi Kan urasin dangubokminyi ba, ni si maka yibkweteboka isin ton tebdobkwan do?
Nai a, Kan urasin ni tam deiboumwe ara ola tamuboka yuk tam deibdum o.
20We, nun tukwetam nang Kalingsurumnyi e.
Niryi malyi kun dinyi ton kuranyi ura, Kan urasintam asi ni malyi kun dinyi ara una kubdongobkise do?
Nira unatoa ati, Kan mar irdeirongninanyi kibdeiboknoumwe uca, ni mambul mitik kum doronun do?
Nira, ‘Ola, diboktinyi,’ tenenun.
21Nira tukwe borbosa kankan sirya marongbinkwaman talak dam kubmar.
Ati, Kanci nisi ingkiringmaniminyi ura, nira kam tuba kum kuranyi asi ingkiriklobkwanirim.
Kanci ni malyi kun dinyi kuanyi ton bikaniminyi ura, unatoa ati, kum siklibdongoboka luba kibnoumwe do?
Ani, tonda niryi mem en uram asi ton dakbisianyi asi bikaniminyi ura, unatoa ati kum kilibnoumwe do?” eboka Ayub biryi ato ebmou.
Currently Selected:
Ayub Uram 7: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
