Ayub Uram 6
6
Ayub biryi er kwit yabwe asi, “Teleb,” kum tenebmou uram deyok
6:1-30
1-2Ura, Ayub biryi uram dobdobmou ura, ato ebmou,
“Niryi ni mambul donun dinyi asi ikin erebdetibyi ura, ikin mitik kum kunurura lak kibte.
Ani, nisi obminikmaninto dinyi ni dam yangarur ara ikin dinyi kiklin keica deici deibdongoboka ikin erebdetibyi ura, lak kibte.
3Ara, me wininga ikin kurande dinyi ara outam kiboka ni malyi kun dinyi asi ikin mitik kum kunurur lak kibte.
Ati, niryi uram loberekanikoka sisingmanyi ura, sunda kanya mambul kusina mem.
4Ara, Er Iya Mikibnyi mar aryi ni nong ai kulubmanici ba, ukunun.
Ba, Erci nisi iba sik dinyi yibkarebnou ba, ni kanya aryi yirur.
Er Imtamnyi biryi ilil tenen dinyi kiknirur dinyi ara nisi mar bonin nang ato kunung.
5Ukuryok nerbalbalinglon bisam keledai ara sungsunga teleb ai kaibmangnyi ura, ton ngwe-ngwe erur do?
Kum, bisam lembu ara yina karebingnyi ura, ton bimdur do?
Nibabyi nong teleb kuboka mambul kum dorantinyi ura, kum ngalukde burantinyi.
Eda, mambul donun deyok aryi ngalukde bunun.
6We, Elifas a, minmin en dinyi dongona kum buna yina ara ton talyi lubtabde yinung do?
Ani, kirim du ara kait dinyi dem yiraming ara to ton erur do?
A neiktoto nibabyi kan uram enmarima a nirya ara to kum ati, ni kum kekebkunun.
7Atoto yina nirya ara nira duknasi kuranir deyok aryi,
‘Ni ton yibtinyi,’ tenen aryi maka kondok-kondok ena kum kubtinyi.
Ato kuboka sun enmarum uram a nirya ara ni kum kekebsunun.
8-9Er Imtamnyi biryi nisi, ‘Obkabokwan,’ teneboka obnici ababyi teleb.
Erci nisi, ‘Er kam kuna ara kum daneibokwan,’ teneboka Er taruk lakoka ni deici deibdongobnici ababyi teleba.
Se, Er Imtamnyi biryi ni molona kekeboka kunubdeibnute ura teleb.
Ani, Er Imtamnyi biryi ni dibde bunun dinyi din dinyi karebnute ura teleb.
10Nira ato kurdeirinin dinyi asi ni asimaka kilinin dinyi kimnurur.
Ba, ni kanya kilkil aryi mereboka dakdobkwanun.
U mambul mitik kum dinyi ni dam yangarur ababyi,
niryi ilil weik kuboka Ererdeirinanyi uram asi, busul kuboka talernururonun.
A deyok aryi mambul dinyi ababyi to dinyi ato kuboka nisi kanya lengleng erdeirinurur.
11Ni kam tuba kunun ara dan mikib bobse aryi kunun do?
Niryi lamabdongoboka kubkwamatinyi ara unatoa asi dibde bukwamatiniryi lamabdongobkwamatinyi do?
12Ni mikib ara keil kat mikib ato bobse do?
Ni nong tub kiknibnou ara keil si tembaga kat aryi kiknibnou do?
13Niryi nisi lebdeibmaninto nang ingkiringdorantinyi uca, ni mikib kum danabdobnute.
Ani, niryi, ‘Lemna dinyi dobdobtinyi,’ tenen ingkiringdorantinyi uca,
lemna dinyi ara ni dam aryi kebdobnute.
14Unanyi biryi sun kwit yabwe u mambul dororante bok, ‘A dororandur,’ teneboka deiblobkwamote do? Ato ara kum ukubte.
Ato kubingnyi nang ara Er Iya Mikibnyi uram asi lebesekmariryi, ukubmarur.
15Ni kwit yabwe e, sunda me u doboka yibaranci me asi mo ton kum cemnanci talak aryi me dala dem kurande to nang kundarur.
Ati, niryi sunsi kanya deibmasin kum.
16Sun kundarur ati kiklina ara ato nang kundarur.
Me u doboka yibaranci ai asi lumtaia deiboka siklianci ba, me kat birirande.
Ani, kiting deibmaci tum ara kiting tin aryi a lumtaia nyolokci ura, me tubto orande.
17Ani, tubto dou li dobci ura, me kum danarorande.
Ba, a me yibaranci ai asi kiting ebci ura, me dala ilim sererorande.
18A me ara kebdei-mobdei yuryibarande.
Yuryibaranci ani, kum dandoka keil yoka dem tanglorande ato nang kundarur.
19Tema mutuk bisam unta bon nang aryi yuk bisik kirikaboka me kin bindoka dirderbaraming.
Ani, Syeba mutuk bisam unta mer bon nang aryi, ‘Me yibkwanuba,’ tenen me yibaranci ai, dirderbaraming.
20Dirderbaramingnyi uca, sun tenebmangiryi banmangnyi dinyi kum eibingnyi ura, mundu tulurande.
Sun, ‘Yibkwayeb,’ teneboka banmangnyi me ara kum yibaranci ura, ‘Se,’ teneraming.
21Sunda dala dem kurande me ato kuboka sunci nisi kanya teleb ton kum kurdeirinindarur.
Eda, sunci yandoka nisi diranindau uca, nira ilil tenento dinyi kubnou asi eibnindau ura, sunda ilil kusurur.
22Niryi sunsi uram eboka, ‘Sunci nisi ukutotoa ton karebnindarur,’ eboka molosunun kum?
Ani, ‘A mabwe a, yuk nang aryi nisi boukwe bormilinina ati, sunci co bok yuk nang asi ton karebdarur,’ eboka ton molosunun kum?
23Ani, niryi sunsi, ‘A mabwe e, ni mar ordana nang aryi nisi obningnyei ati, sunci ni lebdobnindarur,’ ton esunun kum?
‘Nisi yu boraning nang asi dekoka sun taruk dam aryi lebdeibnindarur,’ ton esunun kum?
Niryi sunsi ato ton kum esunun asi bikwandarur.
24Sunci nisi diboka eterebnumunyi ura, ni kilikokwan.
Ani, sunci ni malyi kun dinyi asi, ‘Kan malyi kun dinyi ara atiba,’ eboka lak ebnindarur.
25Uram teleb ena ara yuk mi asi er kanya iya katabum erdeirin dinyi kurur!
Bok, sunci nisi durungnindarur uram aryi ni malyi kun dinyi lak ton kum kimdur bok unatoa ati, taba uram eboka durungnindarur do?
26Sunda ni mining enun uram ati, ‘Ersi wenebkwayeb,’ tenen enindarur kum?
Ani, ni mambul kanya bonunyi biryi enun uram ara, ‘Talyi wamlibde burorura,’ tenenindarur kum?
27Sunda kwaknamni mabwe nermabwe asi boukwe ton tenena kum uca, ‘Unanyi mi nebnyi kibkwande do?’ tenen lemkusungdaraming ato nang kundarur.
Ani, sunda sun mining kwit yabwe kobdoba asi dengna doboka kikiraming ato nang kundarur.
Akiryi sunci nisi boukwe ton tenenina kum uca, nisi mambul kiminingnindarur.
28Bok, ukura ni uram ton ebkwan ati, ni tam urasin deibdarur.
Niryi sun urasin dam asi uram ebkwaman ara tola uram ton ebkwan kum sun kekendarur do?
29Sunda kikimanto kum uram endarur ara taba ermuruna mem, takokdarur.
Niryi sun dam asi enun uram ara iya dib uram asi enun.
Ati, sunci kanya bita teneibdenkwandarur.
30We, sunci ni uram enun asi kekendarur
ara ni si bambul donun ai aryi kiknibman kum uram ton ananurur asi kekendarur do?
Ni silalum dam aryi, ‘A uram si konga ara ur mangkau kun talak aryi eraming.
Ba, ato uram si konga ara mambul doramingnyi talak aryi eraming,’ tenento kum uca talyi enun asi ton kekenindarur kum?” eboka Ayub biryi er kwit yabwe asi ato ebmou.
Currently Selected:
Ayub Uram 6: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
