Ayub Uram 5
5
Elifas biryi Ayub bisi, “Kan u yikurur ara kanbiramnyi malyi kubumwe deyok aryi u yikurur,” eboka durukmou uram deyok
5:1-27
1“We, Ayub a, kanci uram doboka, ‘Nai ni lebdobnurum,’ eboka molobderum. Ba, ninyi yuk nang aryi kan uram dona kekeboka kansi dekeibkwanking kum?
Kum, lek nang imtam kunung nang asi ninyi tentoknyi bisi kanya deibdongoboka molobdobkwandim kum?
2We, Ayub a, kanda Er Imtamnyi bisi yu bona mem.
Diba ati, sun walwal kanya bon nang ara sun mining yu kanya bon dinyi aryi orminingdanung asi bikwandum.
Ba, sun kisok yunga kat biribdob nang ara sun mining mundu tuluna aryi orminingdanung asi ton bikwandum.
Ati, we, Ayub a, kanda Er Imtamnyi bisi yu bona mem.
3Ni asing kobdob aryi dinmase uca, Er Imtamnyi bukdob bingna dinyi ara, ‘Ni li,’ tenenanyi tentok sasiboka kuramwe asi eibmase.
Ura, niryi kanya bita teneirdena kumkum er kuroramwe ati subdinikmase.
4Anyi er mabwe nermabwe ara ur mangkau ton kum kuronung.
Yuk nang aryi a mabwe nermabwe asi, ‘Tatabdongobkwanub,’ tenen ati, atei wengyangan bisik lika bublan dam bordeiryanganung.
Ura, yuk nang aryi sunsi tatardongonmangnyi ura, sun lebdeibmanto nang kum aryi ton kum lemdeirinung.
5A bukdob bingna dinyi bingdona kumnyi biryi er wa in dam aryi yina kiboka bobdake yanganmaci dinyi ara kwaning atanmaci nang aryi nirya kum danardeirinung.
Ani, kirikna tiling sungsunga kankan kuranci koubdoba ababyi araboka kibde yironung.
Ba, sun bona talena ati me kangkang erande to kurur nang aryi, ‘Anyi er bona ara nun dinyi kibsurur,’ tenen arabde doronung.
6Ninyi orminingna dinyi ara talyitam tukwetam aryi ton kum bukoka anarur.
Ani, ninyi mambul doraming dinyi ara tukwe umbura aryi luk butukoka kum anarur.
7Eda, ninyi mambul donung ara sun mining dam nang aryi mambul borsinirdanung.
Ara, uk dinibmangnyi ba, buk ilinto angnande to kuboka, mambul dinyi borsinirdanung uca mambul donung.
8Bok, nira utotoa diboka bingdona kumnyi kurur to ara ni kum kubkwamatinyi.
Eda, nira Er Imtamnyi bisi ingkirikdobkwamatinyi.
Ani, ni deyok ara Er Imtamnyi taruk dam karebokwamatinyi.
9Er Imtamnyi biryi ilil tenen dinyi kiknirur.
Tonda, ninyi aryi, ‘Er Imtamnyi bira ato kuboka kiknibkwande,’ tenebman kumto dinyi asi kiknirur.
Ani, Erci, ‘Nai,’ tenen dinyi kiknirur ara yubwa ilinto nukiribman kumto kuboka kiknirur.
10Erci tukwe deici asi mo cemdeirirur.
Ani, Erci wa in dam koubdoba deici me turdeirirur.
11Sun luknubdongoboka kuroraming nang ara Erci dobtaleboka ererdeirirur.
Ani, sun boukwe kanya bon nang ara Erci miliboka mikib kimdeirirur.
12Sun etekum kanya bon nang aryi kiknirminingdaming kanya ara Erci bisik sengsinirur.
Ba, sun taruk aryi ukuramingnyi dinyi ara kununa kum kurur.
13Erci sun etekdob kanya bon nang asi sun mining etekdob kanya bon dinyi aryi eboka youninto kurur.
Ba, sun mining etekdob kanya boboka bisik kwanim-kwanim botoboka kikniraming dinyi ara kum danardeirirur.#1Kor. 3:19
14Ba, kitingtam uki bok kunuk dangdeirirur.
Ba, kiting dukduk en tam asi asing kunuk aryi sun baron bisik ati, talerbisinung.
15Bok, Er Imtamnyi biryi, ‘Sun etekdob nang uram ena aryi sun boukwe toto kuroramingnyi nang asi boboka wanikminikingnyei,’ tenen sunsi lemdeirirur.
Ani, sun boukwe toto kuroramingnyi nang asi sunsi mikib nang taruk dam aryi lemdeirirur.
16Ato kurdeirirur ba, sun yuk ukubdobman kum nang ara Er Imtamnyi bisi dibde bunung.
Ba, tola uram en nang ara Er Imtamnyi biryi sun si mourtalerur.
17Sun Er Imtamnyi biryi erekoka wenerur nang ara Erci kisal dangdur nang kunung.
Ati, we, Ayub a, kanda, ‘Er Iya Mikibnyi eterena ara ni li,’ tenena mem.#Ams. 3:11-12; Ibr. 12:5-6
18Ninyi asi Erci dilaka sakeibmariryok,
tubto tamuboka Erci liboka kweterande.
Tonda, Erci kulaboka obmariryok,
tubto tamuboka Er taruk aryi kweterdeirirande.
19Nabaryi mambul dinyi aryi kansi obminikmakin bok asi, Er Imtamnyi biryi kansi a mambul dinyi dam nirya aryi lordeirikurur.
Ani, mambul dinyi tabakdongoboka liki tabaryi dinyi yangarur ababyi kan ton bol kum lirdekurur.
20Kwaning atana li dobci ura, Er Imtamnyi biryi kansi kalikdobkwankir.
Ani, mar ordana kankan ara Er Imtamnyi biryi kansi dukeibkwankir ba, kan kum obkwanking.
21Erci kansi libdobkwankir ba, sun yuk nang uram aryi kansi touboka kum obkwetebkwanking.
Ani, daluboka bongwalwalarsinin dinyi yangaci ura, kanda ilil kukina mem.
22Daluboka bongwalwalarsinin dinyi yangaci ab kwaning atana li dobci ab ara kanda ‘Malyi er yuk a kunmarura,’ tenen aryi akwi tubokwandum.
Ani, bai lulungnande dinyi yu dinyi aryi iyangakina ara kanda ilil kum kunkwankir.
23Ara, ato deyok ati ebman. Wa in dam tukwe ababyi kan tam makibdobkici ba, kan wa in dam tukwe ara keil aryi kum libkwankir.
Ani, bai lulungnande dinyi yu dinyi aryi kansi kum dumyankwanking.
24Kan ai doboka kubkwandim ai ara ur mangkau asa kubdobkwandim.
Ani, kanci kan kuraminyi ai diblilibde yibanmaminyi ura, ukutotoa ton waningna kum kubkwandim.
Eda, nirya kuanci asi asing eibkwandim.
25Kan deibkwandim mabwe nermabwe yaldangna ara nukman kumto kubkwaming asi asing eibkwandim.
Ani, kan yaldangna mabwe aryi deirin mabwe nermabwe ara sungsunga ato kubkwaming.
26Kanda kuraminyi ani, iya wise damincok dibkwandim.
Ara, gandum wa iamingnyi ba, iya wisiboka eng obci asi dakoka atei boyangaraming.
Ato kuboka kanbabyi iya wise damincok tukwe umbura dam wengyurbinkwandim.
27Diba ati, a dinyi nirya nunci diblilibdenmab uca, a ebman to akwe kurur.
Ati, a ebman dinyi nirya ara diboka kekeboka bobdobminyi ura kunubkwandum!”
eboka Elifas biryi Ayub bisi wenebmou.
Currently Selected:
Ayub Uram 5: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
