Ayub Uram 35
35
Ayub erdamnyi libdandobmou asi er kwit Elihu biryi tatabkaboka durukmou uram deyok
35:1-16
1-2Ura, Elihu biryi Ayub bisi uram enmouci, ato ebmurubmou,
“Ayub a, kanci, ‘Nira, Er Imtamnyi urasin dam ara malyi kun dinyi ton kum kunun dinyi asi Erci dibdeboka kunurur,’ erdarum dinyi ara a darib?
Ato kurum dinyi ara diboka kurum darib?
3Kanci ato eboka asibdetum, ‘Niryi malyi kun dinyi kum kunuranyi ura, Er Imtamnyi biryi nisi kisal daknute do, kum do?
Niryi Er Imtamnyi uram kum kekeranyi ura, niryi teleb dinyi dobdobtinyi do, kum do?’ eboka asibdetum.
4Ura, niryi kansi ato eboka dekeibkwamakitinyi.
Ani, niryi kan kwit yabwe ab Ayub kan ab sun tonkwa ati uram dekeibkwansin.
5Sun urasin erebokmunyi ura, im asi bita dibdendarur.
Sunci dinmamunyi ura, sun tukwetam kibkweteboka duwa bum imtam bunmaci asi dibdendarur.
6Sunci malyi kun dinyi kuramunyi aryi Er Imtamnyi iya mikibnyi kurur dinyi kum dobkwetebdaute.
Sunci mem en dinyi ilinto dangbisiramunyi aryi, sunci Ersi kum boboka libdaute.
7Ba, sunci u dikum dinyi kunuramunyi aryi, Er Imtamnyi iya mikibnyi kurur dinyi asi kum tabakdongobdaute.
Sun taruk dam aryi utotoa Erti karebdaute ura, Erda bona bonanyi kum kibte.
8Eda, ninyi malyi kun dinyi ara ninyi mamun asi bordongordanub.
Tonda, ninyi aryi u dikum dinyi kununa aryi yuk nang asi kanya teleb bordeirirdanub.
9Ninyi ngalungnung ara yuk nang aryi mambul mitik kum wa kareamingnyi ba, iramingiryi ngalungnung.
Ani, uram doboka ngolongdoraming ara mutuk talen mikib bobdob nang aryi ikin wa takurdeirinung deyok aryi uram doboka ngolongdonung.
10Bok, sunci sun kiknibmounyi Er Imtamnyi bisi, ‘Ni lemdeinina bira dantam kurur do?’ eboka ton asirdena kum kunung.
Ani, sun mambul kanya bobmangnyi talak asi lengleng erdeirirurnyi bisi sun kanya kilkil aryi mot kum semdeirinung.
11Ani, etekum eboka bingna dinyi ara ninyi asi erebkaboka karesurur. Ba, tukwetam kuboka lulungdur dinyi asi bingna dinyi mitikanun outamtoto karerur.
Ani, maka im karin langlang eryibarande dinyi bingna dinyi ababyi outam kibkweteboka iya bukdob bingna dinyi ara ninyi ati erebkaboka karesururnyi bisi ton kum moloronung.
12Yuk nang aryi mambul wa bordeiriramingnyi nang aryi ngalukoka uram doramingnyi bok, Erci sun uram ngalungna ton kum dengdeirirur.
Ara, sun yu kanya bon nang ara wingdan kanya bon deyok aryi sun uram kum kekeana ato kurongdur.
13Diba ati, talyitam uram doboka ngolongna dinyi ara Er Imtamnyi biryi kum kekebkwansurur.
Ani, Iya Mikibnyi bira kum kekeana ato kubkwansurur.
14Ati, Ayub a, kanda wanok, ‘Er Imtamnyi bira ni ton kum eirinun,’ erum ati, Erci kansi kum dekeibkurur.
Tonda, kanci, ‘Erci, ni deyok ati uram ton kum sekwetebkwanir bok, ni talyitam dibde bunun do?’ tenerum ati, Erci kan deyok ara kum lilibdeibkurur.
15Kanda ato kurum cok, ukuryok kan kanya ara, ‘Er Imtamnyi bira Er yu aryi ninyi ton kum wenerur.
Ani, ninyi malyi kunung dinyi asi Erci ton kanya kum teneirderur,’ tenerum.
16Ayub kanda ato tenerumci, kan si ila lilibdobminyi ura, manmalyi uram asi wamlibde sisingdum.
Ani, kan sisingdum uram ara, ‘Ato ati enmar,’ tenebman kum uram akwe erum,” eboka durukmou.
Currently Selected:
Ayub Uram 35: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
