Ayub Uram 34
34
“Er Imtamnyi bira kikimanto dinyi akwe kunurdeirur,” ebmou uram deyok
34:1-37
1Ayub Er kwit Elihu biryi Ayub ab, er kwit yabwe winiryi nang ab asi uram enmouci, ato ebmou,
2“Sun bukdob dinyi bingna nang e, sunci ni ebkwaman uram asi diboka kekenmanindarur.
Sun kisok yunga yongon ton kuansici nang e, sunci ni tam asi amol cangubdeiboka kekenmanindarur.
3Ara ato ati ebman, yina to erande dinyi babyi to kum erande dinyi babyi bingnamib ara silalum deici aryi bingnamib.
A neiktoto yuk nang uram kekeboka, ‘Dib ati ebmar do, tola ati ebmar do?’ tenen bingnamib ara amol aryi kekeboka bingnamib.
4Ati, ukuryok akira nun tonkwa bukoka, ‘Una deyok asi kikimanto dinyi kurur?’ eboka lilibdob deibkwayeb.
‘Unato dinyi asi kikimanto kurur do?’ tenen uram sisikoka toubdeibkwayeb.
5Ara, Ayub biryi ato erur ati, ‘Nira dib dinyi akwe kununun.
Bok, Er Imtamnyi biryi nisi kikimanto kum dinyi asi karebnou.
6“Niryi malyi kun dinyi ton kum kunun,” erdanun bok, “Ara, tola ati erur,” tenenurur.
Nira mem en dinyi ara ton dangbisina kum kunun bok, Er Imtamnyi mar aryi nisi kulubloboknou uca, ni susa eibnou ara ton nimdonina kum kunurur,’ erdarur.
7A mabwa a, unanyi bisi Ayub kurur atonyi ton kurur do?
Ara, Ayub bira Er Imtamnyi si asi tuba-tuba talyitam si dabli semerur ato nang ton da kunung do?
8Ani, Ayub bira sun yu dinyi akwe kunung nang ab ninyi bun urubdandoka tonkwa kunungnyi kurur.
Ani, erda sun malyi kun nang ab antaniboka tonkwa kunungnyi kurur.
9Ara ato ati ebman. Ayub biryi ato erur, ‘Nun ninyi aryi Er Imtamnyi kanya teleb kurdeirin dinyi kunuramibyi ababyi,
Er Imtamnyi biryi kisal dangna dinyi kum karebkwansir,’ erur.
10Ati, sun kisok yunga teleb bobdob nang e, sunci ni ebkwaman uram asi diboka kekendarur.
Er Imtamnyi bira malyi kun dinyi kuna kumnyi kurur.
Ani, Er Iya Mikibnyi bira kikimanto dinyi ukururnyi kurur.
11Er Imtamnyi bira ninyi sun kuramingnyi to dibdeboka dengdeirur.
Ani, ninyi yuk-yuk sun kuramingnyi to dibdeboka kurdeirirur.
12Diba ati, Er Imtamnyi bira sun ninyi asi kikimanto dinyi akwe kunurdeirur
Er Iya Mikibnyi bira dibdeboka kikimanto kuboka wenen dinyi ara tingimkwalim ena kum kurur.
13Unanyi biryi Er Imtamnyi bisi tukwetam talen mikib karebmou do?
Tonda, unanyi biryi im ab tukwe ab kalingna mikib Er dam takubdeibmou do?
14Erci Er Kanya ninyi kam kurdeirin dinyi karebmou asi tubto tamuboka dobdobte ababyi kikiman.
Ani, isin nebneb erkaren dinyi ninyi ati karebmou dinyi asi tubto tamuboka Erdamnyi dobdobte ababyi mem kuma.
15Er Imtamnyi biryi ato kubdobte ba, kam kuramingnyi dinyi nirya ara kum danabdobting.
Ani, ninyi ara tubto tamuboka tukwe borbosa danabdobting.
16Sun kisok yunga ton bororamunyi ura, ni a ebkwaman uram asi diboka kekebdobdarur.
Sun amol ara ni uram ebkwan tam asi deibdongoboka bita kekebdobdarur.
17Sun kikimanto kuboka kunun dinyi asi li kuranci nang ara mutuk talen mikib dobkwamating ara kiknibkwamote do?
Ani, Er Imtamnyi bira Er iya mikib dinyi aryi kikimanto dinyi kunurdeirirurnyi bisi, ‘Ara, malyito ukurum,’ eboka durukwamatum do?
18Er Imtamnyi biryi sun tukwetam weik sien nang asi, ‘Sunda malyi dinyi kun nang kundarur,’ ebkwamote ara kikiman.
Ani, atei sien nang asi, ‘Sunda yu dinyi kun nang kundarur,’ ebkwamaci ababyi mem kum.
19Er Imtamnyi bira weik sien nang asi makina kum kurur.
Ani, Erda sun atei dua kibdeiboka sien nang kimdeiraming nang asi nunukdeiboka ur nang malyi kimna kum kurur.
Sunsi ato kurur ara sun nirya Er taruk kobdob aryi kiknibmou deyok aryi ato kurur.
20Yo, sun bona bon nang babyi utotoa kum nang babyi nirya asing kublabumto aryi dimdongnung.
Yo, ara lukunda talak aryi Erci ninyi asi du kanya yakeiboka kum danardeirirur.
Sun mikib ibarya ilinto asi kum danardeirirur ara ninyi taruk mikib aryi kuma.
Eda, Er Imtamnyi taruk aryi kum danardeirirur.
21Ara, ninyi yiban bisik nirya ara Erci dirnilisurur deyok aryi ato kurur.
Ani, Erci ninyi yan dorona a nirya diransir deyok aryi ato kurur.
22Er Imtamnyi urasin dam ara ninyi malyi kun dinyi inirdongon dinyi ton kum kurur.
Kunuk tilib dinyi kum duwa tilib dinyi kum aryi inibdongobmanto dinyi ton kum kurur.
23Er Imtamnyi biryi ninyi kunuba iya dirnilisurur ati Erci deyok lilin tum uki lingdeirina kum kubsute.
Ara, ‘A talak aryi Ni urasin dam tingyankwandum ba, Niryi sunsi malyi kuna deyok lilibkwansin,’ kum esurur.
24Eda, sun mikib ibarya ilinto nang ara sun malyi kuna deyok lilina kumkum orminingdur.
Ba, sun iramingnyi wa ara yuk nang asi erebdeiboka unurdeirirur.
25Ati, sun kun deyok nirya ara Er bingdur.
Akiryi lukunda talak aryok Erci sunsi oboka mairirur ba, sunda lubde burur.
26Sun mining malyi kun deyok aryi yuk nang urasintam aryi
Erci sunsi kulaboka wenerur.
27Ara, sunci Ersi deirirlonung deyok aryi ato kurur.
Ani, Er bisik tentok sirik ababyi ton milirdena kum kunung deyok aryi Erci sunsi wenerur.
28Sun yu dinyi kuraming nang aryi sun utotoa kum nang asi mambul kanya bordeirinung.
Ba, sun utotoa kum nang aryi ngalungna ara Er Imtamnyi amol dam wengbarur.
Ani, sun mambul ilinto dorangmingnyi nang ngalungna ara Erci kekerur.
29Bok, Erci sun molona kum kekeana ato kuboka ur dem dungdung ebokte ura,
unanyi biryi ilil kum asa aryi Ersi erekdobkwamote do?
Ba, Erci Er urasin dokom eboka urasin inibokte ura, unanyi biryi Ersi dibdenkwamote do?
Er Imtamnyi bira im dangna mutuk tukwe dangna mutuk talen nang Weik Sienyi kurur ati, unanyi biryi ersi tatabkwamote do?
30Ba, Erci, ‘Sun malyi kun nang asi weik sienyi kimna ara
yuk nang asi eboka youninto kubingnyei,’ tenen sun mambul doramingnyi nang aryi molon dinyi ara Er Imtamnyi biryi kekerur.
31Bok, ninyi tentok aryi Er Imtamnyi bisi ato ebte,
‘Nira wingdan kanya bonun bok, nira yu dinyi ara ni ton kum kunkwan.
32Ati, ni kum bingdanyi malyi kun dinyi ara Kanci nisi lak ebnurum.
Ba, niryi kikimanto kum dinyi asi ukuranyi ura, niryi ato dinyi ara ni tubto kum kunkwan,’ ebte.
33Ati, Ayub a, kanci Er Imtamnyi biryi ukun dinyi ara, ‘Ni li,’ tenebmarim cok,
kanda, ‘Er Imtamnyi biryi ni tenen dinyi nirya dekeibkwanir,’ tenebmarim do?
Ati, a uram dengna ara niryi kum ebkwaman ati, ukura kanci a uram dengna ebderum.
Kanci a uram dengna bikmaminyi ura ebderum.
34Ba, sun kanya otokanci nang ara niryi kansi enmakinyi uram bikwamaning.
Ani, sun etekum kanya boramingnyi nang aryi niryi kansi enmakinyi uram ara sun kekebkwamaning.
35Ura, sunci nisi ato ebkwamaning, ‘Ayub er erur uram ara diboka kanya teneibde kum erur.
Ani, er erur uram a nirya ara, “Ato ati ebmar,” tenebman kum uram akwe erur.
36Ayub erur uram asi bita kanya teneirden ura,
Erci erur uram ara yu kasak biribdob nang uram ato akwe erur asi bingnub.
37Erbiramnyi aryi mem en uram dakbisiboka malyi kurdongordarur.
Ara, Ayub biryi Imtamnyi urasintam asi uram ilinto eboka
nun urasintam asi Er Imtamnyi bisi lebesengdur asi eirinub,’ ebkwamating,” ebmou.
Currently Selected:
Ayub Uram 34: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
