Ayub Uram 36
36
“Er Imtamnyi biryi, ‘Ninyi sun malyi kun dinyi taklobting,’ tenen ati mambul dinyi kareransir,” ebmou uram deyok
36:1-33
1Ayub er kwit Elihu biryi uram ton ato ebmurubmou,
2“We, Ayub a, Er Imtamnyi si deici aryi, ‘Niryi kansi uram ton ebtabaktinyi,’ tenebman ati, kan iya kekebde bukmarum.
Niryi kansi eterebkwinkin ati, kan kanya darabdeiboka kekebde bukdum.
3Ni bingna dinyi ara era mutuk aryi dobdobse dinyi ara bisibkaboka bukdobtoto bingnun.
Ati, a bingna dinyi biriman aryi niryi, ‘Diba, ni Kwebdeibmanounyi bira kikiman dinyi kiknirurnyi kurur,’ eboka lak kibkwaman.
4Nira toltola uram kum ebkwamanaryi dib uram asi ebkwaman.
Ayub a, ni kan urasin dam a tikmananyi bira iya bukdob bingnanyi kobdob asi tikman.
5Ayub a, Er Imtamnyi bira Iya Mikibnyi kururcok,
Erci, ninyi tentok ababyi, ‘Ara, malya,’ ton kum tenerurnyi kurur.
Erda ninyi kanya teneiboka bingdaming dinyi ara outam kiboka iya bukdob bingnanyi kurur asi bikdobkwandum.
6Sun malyi dinyi kuramingnyi nang ara Erci eiboka tanglona kum kurur, eda sunsi ola orkarongdur.
Bok, Erci sun mambul kanya bobde kuramingnyi nang asi boukwe kiboka kikimanto kuboka lilirdeirirur.
7Er urasin ara u dikum dinyi kunun nang asi dirnilirandiryok takloboka yuk ai ton kum deirirur.
Eda, Erci sunsi iya ati weik sien nang aryi erebdob sokon buraming ato nang kimdeirirur.
Ba, yuk nang aryi sun si asi ererdeirinung.
8Bok, yuk nang aryi sunsi taleboka besi tabwe aryi debingnyi ura,
sunda mambul mitik kum dobkwanung.
9Mambul dinyi biriman aryi, Erci, ‘Sunda malyi kun dinyi kurandum ara taklobdarur,’ eboka sunsi yan memen uram erur.
Ani, ‘Sunda wingdaboka mem en uram asi dangbisirandum ara taklobdarur,’
eboka kalingna uram erur.
10Ba, ‘Sunci wenen uram asi kekebkwanung,’ tenen sun amol kungdeirirur.
Ani, ‘Sunci sun malyi dinyi takloboka tamuboka Ni dam yankwanunga,’ tenen sunsi uram doboka namdur.
11Asi, sunci a uram asi kekeboka kunubingnyi ura,
sunda mangkau kuroramingnyi tok ani wau loboka dibkwanung.
Ani, sun kanya kilkil kanya akwe bobde kuroramingnyi ani, sun sirya kursungban kwalina kimbinkwandur.
12Bok, sunci a uram asi kum kekebingnyi ura,
sun mar ordana nang aryi sunsi te balang taci aryi lukoka obminikwaming.
Ani, sun mining etekum kanya borona kum dinyi aryi sun damnyi obminikdankwaming.
13Er Imtamnyi uram kum kekerana ato kun nang ara yu dinyi asi sun kanya dam deirinung.
Erci sunsi besi tabwe aryi debmaci ura, sunci uram doboka, ‘Nun lebdobsindarur,’ eboka uram kum dobkwaming.
14Sun kanya ara kabir kuronmangnyi talak aryi tunim ebkwande.
Sun kam kun dinyi ara sirya kursungban uki dam kum kubmaribok, ola kum dandobkwande.
Ba, yuk nang aryi sunsi boukwe ton kum kimnung.
15Sun ninyi mambul doramingnyi kankan aryi Erci sunsi etereboka lemdeirirur.
Erci sunsi kulaboka obci biriman aryi, sunsi Er uram keken amol kungdeirirur.
16Ati, Ayub kanbabyi mambul doraminyi ara Erci lebdeibkwankir.
Ura, kansi boboka ur teleb akwe kuron ai kamdeirirbinkwankir ba, utoto mambul dorum to ara kum kubkwandim.
Tonda, kansi boboka yina teleb-yina teleb deiriramingnyi ai kamdeirirbinkwankir.
17Bok, ukura Ayub kanda sun malyi kun nang asi wenerur to wenena asi sirya langdiboka dobdobumwe.
Kanda kan mining malyi kuna aryi dibdeboka kikimanto kuboka wenebkou.
18Kan mining kanya aryi bona talena ati tin bukoka bowanikminikicei ati, kalikdandobdum.
Ani, kan mining bona talena tula kiringna aryi kansi obminikicei ati kalikdandobdum.
19Kan mining uram dona aryi kan mambul doraminyi ai aryi lebdeibkwamakute do?
Kum, kanbiramnyi mikib aryi, ‘Lebdandobkwan,’ tenen kun dinyi aryi lebdandobkwamatum do?
20Sun im dangna mutuk tukwe dangna mutuk nang lukunda talak aryi kum danabseknin bangnyi ati,
kanbabyi, ‘Ni kunuk mutuk bakan dam wengban uki ara ola berekci,’ tenena mem.
21Kan mambul dorum ara kan mining malyi kubumwe deyok aryi u mambul dorum.
Ati, kan kanya ara yu dinyi tam kanya deibkicei ati, kandamnyi diboka kalikdandobkwandum.
22Diba ati, Er Imtamnyi bira Er iya mikibnyi ton iya mililnyi ton kurur.
Er ninyi eterenanyi bikdob kurur ato ara sun yuk nang ton da kunung do?
23Er Imtamnyi binkwamaci bisik ati, unanyi biryi, ‘A bisik asi bindoka ato dinyi asi ukubdum,’ eboka nungkarerur do?
Ani, unanyi biryi ilil kum asa aryi kaibkaboka Ersi, ‘Kanda malyito kubmarim,’ eboka tatabkwamote do?
24Ayub a, diboka kekerandum. Ninyi nirya ara Er Imtamnyi biryi ukurur dinyi ati, mot seboka si weik ererdeirinung.
Ati, kanbabyi Erci ukurur dinyi asi si weik eboka ererdeinkwandum.
25Ninyi nirya Er ukurur dinyi asing eirinung.
Erci ukurur dinyi ara ilinto aryi ninyi aryi a nirya bikdakman kum kurur.
26Diba ati, Er Imtamnyi bira iya mikib weiknyi kurur.
Nun bingna dinyi aryi Er kurur dinyi bikman kum.
Er kurur kwalina yubwa nukman kum.
27Erci me tukwetam akiryi dobtaleboka duwa bum kimdeirande.
Ura, Erci a duwa bum aryok mo kimdeirirande.
28Ukubdeibci ura, duwa sukuboka
ninyi tukwetam nang nirya ilinto ati mo cemdeirirande.
29Unanyi biryi duwa anaboka weik kimnande dinyi ton bingdur do?
Ani, Er Imtamnyi ai dam aryi liman demnande dinyi ton bingdur do?
30Diba ati, Erci bebe liming ebdeiboka boboka aknardeirirdarorur.
Ba, weik me kwan deibwe umbura kobdob ara Erci kunuk dangsinirongdur.
31Erci ato kuboka im dangna tukwe dangna nang asi dibniliboka kalingsurur.
Ani, ato kuboka ninyi asi langkiboka yina yirkaresurur.
32Er taruk bitinyi aryi bebe ling ena dobtalebdobci ura,
Erci, ‘dobkwaman,’ tenebmaci ai asi donongnande.
33Mo yeinya yankwamaci ura, liman demnande.
Ba, ninyi winin dinyi ababyi, kumwe ilinto dobkwamaci dinyi ara minob bingnaming,” ebmou.
Currently Selected:
Ayub Uram 36: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
