Ayub Uram 33
33
Er Imtamnyi biryi uram tuba-tuba erur ara bisik yubwa biriman aryi uram erur deyok
33:1-33
1Ayub er kwit Elihu biryi Ayub bisi uram enmouci, ton ato ebmou,
“We, Ayub a, ukura ni uram ebkwan ati kan diboka-diboka kekenmarum.
Ani, kan amol ara diboka o cang ebdeiboka ni uram enkwamana a nirya bita kekenmarum.
2Ni uram ton ebkunaryi si akokun ati kan kekerum.
Kanda ni silalum lulungna asi dibde bukdum.
3Ni uram ebkwaman ara tola uram en kanya kum boboka sisikwaman.
Ani, ni si bambol dam aryi anabkwamanir uram ara ni bingnun dinyi ara ton kum inibdongobkwaman.
A nirya kan dam lak yoklobkwaman.
4Nira Er Imtamnyi Kanya Roh Kudus aryi kiknibnou.
Ura, Er Iya Mikibnyi isin aryi nisi kam kubdeibnouci, eterenurur.
5Ati, kanci uram dekeibmaninto ura, nisi uram dekeibnurum.
Kanci nisi uram dengdeirinina ati kalikeiboka bukdum.
Kan kanya katabdeiboka bukdum.
6Diba ati, Er Imtamnyi urasintam ara nibabyi kan kurum atonyi kunun.
Nibabyi ko tukwe aryi kiknianounyi kunun.
7Ati, kanda nisi ilil kukina mem.
Niryi kansi uram ebkwaman ara kan ikin kiminingni uram asi kum ebkwamakin.
8Bok, kan uram ebmarim ara ni keken ai asi sirya ebmarim.
Ani, kan en uram ara ni sirya kekebmakin.
9Ara, ato ebmarim, ‘Nira leknyi kunun aryi malyi dinyi ton kum kunun,’ ebmarim.
Tonda, ‘Nira mem en uram ton kum dangbisinun,’ ebmarim.
Ba, tonda ‘Nira, malyi dinyi ton kum kunun, ati malyi dinyi ara ni dam ton kum kunurur.
10Bok, Er Imtamnyi biryi nisi, “Wenebkwan,” tenen ati ni deyok ingkiringnurur.
Erci nira Er mar bonanyi bitonyi kimdeinurur.
11Ura, Erci ni yan dobtaleboka besi tabwe biringdongonurur.
Birikdongobnici ura, Erci ni yan irongna nirya dirburunurur,’ ebdanmarim.
12Ato ebdanmarim bok, we, Ayub a, diba ati, Er Imtamnyi bira nun ninyi kunuba ara bisibkaboka Erda Iya Erebdobnyi kurur.
A deyok aryi kan ebmarim uram a nirya ara diboka kum ebmarim.
Ati, nibabyi, ‘Malyito ebmar,’ tenebmakin.
13Kanda unatoa ati, Ersi durukdongobmarimci,
‘Erci ni uram a nirya kum dengdeinurur,’ ebmarim do?
14Er Imtamnyi biryi uram tuba-tuba erur ara bisik yubwa biriman aryi erur.
Bok, nun ninyi aryi Er uram erur asi diboka dirlilina kum kunub deyok aryi Er uram bingna kum kunub.
15Erci uram erur ara ninyi lukunda wi mablukmangnyi talak lengdera biriman aryi ton erur.
Tonda, lukunda karin aryi kunumna deib aryi ton erur.
16A talak aryi Er Imtamnyi biryi, ‘Ni uram kekebting,’ tenen sunsi arungnande.
Ani, Erci ninyi asi erengdorande ba, sun ilil kurande.
17Ara, ato ati kurande, ‘Sunci sun malyi kun dinyi deiblobting,’ tenen erengdorande.
Tonda, ‘Sun wingdan kanya boraming dinyi asi taklobting,’ tenen erande.
18Tonda, ‘Dibingnyei,’ tenen ati bisik sengninto kurande.
Tonda, ‘Sun kam kuronmanto asi te balang taci dam karebdandoka obdangnyei,’ tenen lengdera karerande.
19Er Imtamnyi biryi ninyi asi u yin dinyi kareanci ba, u dobde maramingnyi biriman aryi sunsi wenerande.
Uca, sun nong yok a nirya ara sirim talermururande.
20Ba, sun mundu ara kwaning yina li kimsinirande.
Tonda, to teleb erande yina ababyi, ‘Ton yibtinyi,’ tenebman kum kursinirande.
21Sun nong tub ara kum dandoka nyelersinirande.
Ba, sun yok ara lak kum kurande dinyi asi yok lak belerande.
22Ba, sun nong ara dibmanto kunung.
Ani, sun kam kuron dinyi ara din nang wengbaraming mutuk bakan dam wengbinmanto kunung.
23Asi, Er Imtamnyi uram eryuryangan nang ara yubwa-yubwa 1.000 baryi nang kunung.
A kunung nang kankan aryi tentoknyi bira noutamnyi kibokabturyi,
yandoka bisik u dikum teleb eterebte.
24Ura, anyi biryi boukwe kiboka Er Imtamnyi bisi ato eboka molobliknibte,
‘Taibwe biribumnyi er malyi kuna dengna co bok ara Ni sirya talebman.
Ati, anyi tukwe umbura kum wengyurbinkwande ati, lobdeibdum,’ ebte.
25Ba, anyi er nong bol ara kabir nang boraming bol ato deibdur.
Ani, er minob kabir nebloboka kunmou ato kubdur.
26Erci Er Imtamnyi bisi molobdobci ura, kanya teleb kuboka er molona kekebkwande.
Ba, erci kanya karyi asa aryi Er Imtamnyi bisi si weik ebdobkwande.
Ati, Er Imtamnyi biryi er minob kuramwe to dinyi tamubdeibkwande.
27Ba, erci ninyi ilinto wekmangnyi urasintam asi mot semna deib aryi erci kuanci dinyi lak ebkwande.
Ara, ato ebkwande, ‘Niryi malyi kun dinyi kuboka bisik iririkna dakyanibse.
Bok, ni malyi kubse dinyi ara Er Imtamnyi biryi tamuboka nisi kum wenebnou.
28Eda, nira tukwe ungdona umbura wengyurbinmanto asi Erci bisik sekoka nisi lebdeibnou.
Ba, nira uku talak ababyi kam tuba kuronman.
29Diba ati, ato kun dinyi ara Er Imtamnyi biryi
nun ninyi ati, liki tentok kum kurdeisurur, eda, liki bitinyi winiryi ato akwe kusurur.
30Ara, ninyi kam kun dinyi ara tukwe ungdona umbura dam wengyurbinmanto bok, Erci lebdeiboka tamurdeirirur.
Ba, kam kun milil aryi anyi bisi berengdeirirur,’ ebte.
31We, Ayub a, ni uram asi kan diboka kekenmarum.
Kan uram kilikoka bukmaminci ni uram asi kekenmanurum.
32Kanci, ‘Ni uram ton ebtinyi,’ tenebmaminyi ura, ni uram asi dekeibnurum.
Uram ur ebduma, kanci diboka ebminyi ura, niryi kan ebmaminyi uram asi, ‘Ara, diboka ebmarim,’ ebkwamakin.
33Bok, kan uram ton kum ebkwamaminyi ura, kanda nisi diboka kekenmanurum.
Niryi kansi bukdob bingna dinyi eterebkwamakin.
Ati, kanda uram kum kilikoka ur bukmaminci nisi kekenmanurum,”
eboka Elihu biryi Ayub bisi ato ebmou.
Currently Selected:
Ayub Uram 33: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
