Ayub Uram 30
30
Ayub er mambul doramwe uram deyok
30:1-31
1Ayub biryi uram ato ebmurubmou,
“Minob ura, ni si ererdeiriranei bok, ukuryok ara ninyi ilinto aryi nisi akwi tununung.
Sun ni deibmanei amwetam deibmai nang aryi nisi ina ngilingnunung.
Sun nai yabwe ara niryi, ‘Sunsi wa karena ara kikiman kum,’ tenen ni bisam kambing domba kalingni kam yabwe ab tonkwa kalingna nang kum kimdeiriranse. Sun a nang mabwe aryi nisi akwi tununung.
2Sun nai yabwe ara wa ina daldala biribdob nang aryi ni wa ibkwamaniting do?
Sun mikib ara kum danamwe deyok aryi ni wa irmilin nang kibman kum kuramwe.
3Ani, sunda iya kwaning atarmururamwe deyok aryi sun nong ara yila biribminikamwe ba, mambul doramnyi.
Ura, yinimwe mutuk asi co kala kokyibde kuramnyi.
Ani, yinimwe mutuk dam asi tiling-tilinga co yating asi yibde kuramnyi.
4Sunda tiling-tilinga kankan aryi sun yina ingkirikoka dobde yiramnyi.
Ani, co si arar yating asi sun yina kimnamnyi.
5Sunda yuk nang ab uruna kun ai aryi yakdonokamnyi.
Ani, sunda ukula don nang kuna, ikik eboka yangnaming to kuramnyi.
6Sunda kunuk ilinto dangdur mutuk bakan asi kuramnyi.
Ani, keil umbong ab, keil deyok ab asi sun kuron atei kimdoramnyi.
7Bai kankan asi bai kam aryi kamubde kurande to kuramnyi.
Sunda mer dakmanaryi kirikna kankan asi ngalukde wengnamnyi.
8Sun ukuramnyi nang ara okoloma kanya boramnyi nang ara yuk nang aryi kum nungnamnyi nang deici kuramnyi.
Yuk nang aryi sunsi, ‘Atei kuna mem,’ eboka yangdonongnamnyi.
9Bok, ukuryok ara okoloma kanya bon nang mabwe aryi nisi nunung sengna kibdeiboka akwi tununung.
Sunci nisi ina ngilingnunung.
10Sunci nisi asing dirdenina ara duknasi kimdur ba, nisi leimdonunung.
Ba, sunci nisi urasin si maka tulurdeinunung.
11Ato kununung ara Er Imtamnyi biryi nisi mitang kibsiniboka dobkwetebnou deyok aryi ukununung.
Ani, sunci nisi yu boranei dinyi ara ura labasinunung.
12Minob ni kwit yabwe kobdoba kimdanse nang aryi danguboka nisi mar ordana nang kibdeiboka mar bonunungci,
ni yan tabwe yurdongonunung.
Ura, sunci niti, ‘Obkwayeb,’ tenen kiknirminingnunung.
13Sunci nisi, ‘Sakeibtibyi,’ tenen ni yiban bisik sengminingnunung.
Sunci ato kununung asi, ‘Sun ato kundarura mem,’ eboka nisi lemdonin nang ton kum kunung.
14Sunci nisi iyanganunung ara atei lika akdonokoka iyangaraming to kununung.
Sun yanganung ara atei dakdoba kankan asi ninyi yubwa ton deici nang iyanabningnyi ani, ton yuk deici nang iyanabningnyi ani kimnunung.
15Ilil tenento dinyi aryi ni dam asi douryanou.
Ba, nisi kisal dakoka si ererdeirinin dinyi ara kumwe aryi bokeki barande to kubnou.
Ani, tonda ni kilkil kanya bobde kuroranse dinyi ara duwa bum asi kum danarorande to kubnou.
16Ati ukuryok ara ni isin nebneb en dinyi sekwetebmanto kunurur.
Ni mambul donun dinyi aryi uki berengdura nirya nisi talernuruninto kunurur.
17Lukunda ara mambul dinyi aryi ni yok asi si toboka lingdoninto kunurur.
Ba, u yin dinyi aryi nisi nong lungdonmanici ara lobmanin kumto kuboka lungnurur.
18Er Imtamnyi biryi nisi mikib yaboka talernururongnin deyok aryi ni tub ara ongon aling kwilingsangnande to kunurur.
Er Imtamnyi biryi ni nong asi ongon aling ngang bilul libtaleboka kularaming to kunurur.
19Er Imtamnyi biryi nisi yu yaboka mintal umbura kankan donoknou.
Ba, nira sirya tukwe borbosa ato, uk sici ato kubnou.
20Niryi Imtamnyi Kansi uram doboka molorokunun.
Bok, Kanci nisi uram dengdeirinina ton kum kunurum.
Niryi Kan lemdeirinina ati dibde bunun uca, Kanci nisi boukwe kimnina ton kum kunurum.
21Eda, Kanci nisi yu boboka weneronurum.
Kan taruk mikib aryi nisi mar boronurum.
22Kanci nisi dobtaleboka ibalya ilinto donmaci kankan kekwelebniminyi ura, yuk mutuk urdonongnurum.
Ani, Kanci nisi ibalya ilinto donmaci kankan kekdonokoka urkarongnurum.
23Yo, ni sirya bingkunun. Kanci nisi dobtaleboka din mutuk dam boyurbanurum ara bingkunun.
Ani, ninyi kam kunub nang nirya binkwayeb mutuk dam boyurbanurum ara sirya bingkunun.
24Diba ati, ninyi tentok obmaturyi tukwe ai maryurbinmote ura, er kwit biryi taruk donokoka lemdeirina ara kum kubkwamote do?
Ura, maryurbinmatunyi bira bukokman kum kubmote asi taruk donokoka kum tikeibkwamating do?
Ara, kum deiblobte, eda er kwit bisi tikeibkwamote bok, Kanda nisi eiboka deirlorongnurum.
25Minob ura, niryi sun mambul donman nang eibne ura, nibabyi mambul dormiliranse.
Niryi dinman uca, sun utotoa kum aryi mambul kanya boramnyi ura, nibabyi mambul bormiliranse.
26Bok, ukuryok ara ni mambul donun talak aryi teleb dinyi ati dibde bunun uca, yu dinyi asi ni dam douryanganurur.
Niryi berengna dinyi ati dibde bunun uca, kunuk dinyi asi ni dam douryanganurur.
27Uki berengdura nirya mambul don dinyi akwe ni dam yangarur.
Ba, ni kanyatam ara ebduk-ebduk enurur ara dakdobman kum kunurur.
28Ni engen asimaka biribmanici tok yibarkiringnun.
Niryi ninyi kankan tikirikoka, ‘Se, ni lebdobnindarur,’ eboka molorkiringdonun.
Uca, nisi onoboka lemdeirinina ton kum kununung.
29Ba, nira bai kam kamurkiringnande to kunun.
Ani, nira maka solman aryi baitam kurande to ninyi kun kum ai asi kuronun.
30Ni nong bol a nirya ara sukuboka bol kwirkwiribde bunurur.
Ba, ni yok ara ukaruma aryi ilim serebnou.
31Minob talak ara ni kanya kilkil asa aryi gitar ato dinyi si kecapi oboka but dakdoba uboka mot semnanse.
Bok, ukuryok talak ara engena kanya akwe boboka engebde kunun,” ebmou.
Currently Selected:
Ayub Uram 30: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
