Ayub Uram 31
31
Ayub biryi tubto er kwit yabwe urasin dam asi, “Nira malyi dinyi ton kum kubse,” eboka lak ebmou uram deyok
31:1-40
1Ayub biryi ato ebmou,
“Niryi ni mining asing asi sirya ato ebkarebdananse.
‘Niryi kabir nerabwe asing eibnyi atikwe ni kanya aryi, “A ner ukula yobtinyi,” kum tenenkwan,’ ebdananse to kuboka kalingdanun.
2Ara ato ati ebman, nun ninyi aryi Er Imtamnyi urasin dam asi malyi kuramibyi ura, Erci nunsi una kubkwansurur do?
Er Iya Mikibnyi biryi imtam aryi kiknibminikansici ani, nun malyi kun nang ati, karebkwansir dinyi ara unatoa asi karebkwansir do?
3Sun yuk nang asi u dikum kum dinyi kunun nang Erci sunsi kum daneibkwande.
Ba, sun malyi dinyi kunun nang ara wenen dinyi karebkwande.
4Er Imtamnyi bira ni kunun dinyi nirya bingnurur.
Ani, ni yan yaninun dinyi nirya ara Erci nungnurur.
5-6Niryi yuk nang asi tola uram ton eranyi kum,
niryi dib kum dinyi asi uram eboka yuk nang tangminingnanyi kum ura,
Er Imtamnyi biryi ni malyi kurantinyi dinyi eiboka bikwamanute to,
Erci ni kun dinyi asi ikin dinyi kiklina bikdob dinyi aryi kiklibkwamanute ara mem kuma.
7Niryi Er bisik u dikum bisik asi iririkna dakbisiboka ni tenen dinyi akwe kunuranyi ura,
Er Imtamnyi biryi nisi wenebnici ababyi mem kuma.
Ani, ni mining kanya aryi malyi dinyi ati kanya teneinmanyi uca, asing kursinirdaninto kuranyi ura Erci nisi da wenebnurura.
Tonda, ni mining malyi kun dinyi aryi ni taruk dam duranici ati, Erci nisi obnici ara ur da ukubnurura.
8Niryi malyi kun dinyi dib ukuranyi ura, niryi wa iboka kouranyi dinyi ara yuk nang aryi ur da kiboka yibdobnunga.
Ba, ni wa in dam koubdoba kuranci ara ur da kwinibkaboknunga.
9-10Ni kanyatam aryi yuk nerabwe asi kanya nunuknici ura,
niryi er aitam bukmaci asi iniboka ai kinkin bisik kuboka dirdongorderanyi ura,
ni dobdanyi ner ara yuk nang ati kwaning yubdeibci ara ur da ukubdura.
Ani, yuk nang aryi ersi yobdobingnyi ababyi ur da ukubnunga.
11Niryi talyi ukubman kum dinyi asi ukubmanyi ura, ninyi malyi kuna deyok lilin nang aryi nisi ura da wenebnununga.
12Diba ati, ato malyi kun dinyi aryi nisi uk yirkarongnande to kubkwamanute ura, mem kuma.
Ani, ni dinyi nirya ara uk yiboka kolom bukwamote ara kikiman.
13Niryi sun ni wa irmilin nang sal kum ner kum asi diboka kikiman kum kurdeirirantinyi ati wenebkwamanute ara mem kuma.
Sunci nisi, ‘Nun dobdobmanto dinyi asi mininga kungsurum,’ eraniting ati, deyok lilibkwamanute ara kikiman.
14Niryi malyi kun dinyi asi diba kuranyi ati, Er Imtamnyi biryi tikalaboka deyok lilinici ura, niryi una eboka libdandobkwanun do?
Erci ninyi malyi kuna deyok lilibkwansir tum ara niryi una eboka libdandobkwanun do?
15Nira, ni kwin mundu umtamon aryi Er Imtamnyi biryi kiknibmanou.
Ercok sun yuk nang ababyi kiknibmou.
Tonda, Er tentok aryok nun nirya kiknibmasou.
16Niryi sun utotoa kum nang tenen dinyi asi dongdonongnanyi ati, wenebkwanici ura kikiman.
Tonda, niryi sun sulyi nerabwe asi mundu tulursiniranyi ati, Er Imtamnyi biryi nisi deyok lilibkwamanici ara kikiman.
17Tonda, kwaknamni mabwe nermabwe asi yina dirnilina kum uca
yina ni yuk yiranyi ati, Erci nisi lilibkwamanici ara kikiman.
18Bok, niryi sun kwaknamni mabwe nermabwe ab sulyi nerabwe ab asi sun mitik talak aryi niryi sun nong ninyi kuna taleanse.
Niryi sunsi dirniliranse ara ni kabir kuranse talak aryi kuboka wise dase talak ababyi iya dirnilinun.
19Niryi dinmanyi uca, sun kaluna kum nang ara kaluna kalurdeiriranse.
A kum ura, ongon aling kum aryi sirim taleboka dibmanto kunmangnyi nang ara ongon aling ongordeiriranse.
20Ara, niryi sunsi bisam domba otong ongon aling tin aling asi ongordeiriranse.
Ba, sun kanya kilkil aryi nisi kiroranei.
21Niryi, ‘Malyi, akatei sien nang ara ni tam makibdobkwamaningca,’ tenen
atei wengyangan bisik lika bublan dam aryi kwanamni mabwe nermabwe asi kularantinyi ati wenebkwamanute ura kikiman.
22Niryi atoto dinyi kuboka malyi kuranyi ati, ni taruk takonya kusaksakwamanute ara teleb aryi ukubkwamanute.
Tonda, ni taruk dina-dina bulaksakwamanute ababyi da ukubnuta.
23Ara, ato ati ebman. Er Imtamnyi biryi mambul bordeirinin dinyi asi ni ilil kunurur ati ebman.
Erci nisi mambul bordeirinin dinyi ara ni bobman kum kunurur ati ebman.
24Nira mil dangding erande keil si emas asi kanya kum deiriranse.
Ani, a keil asi uram doboka, ‘Kanda, ni kanya deirikunun dinyi,’ kum eranse.
25Niryi ni mining bona talena ati ni dub kum wenerdaranse.
Tonda, ni bona talena lamtaleranse dinyi ati, ‘Ni bikdobnyi biryi kunun,’ kum tenerdaranse.
26Niryi kiting sinarya ukuryok anamtingyangarande dinyi asi ton kum moloranse.
Ani, wala lukunda telebto tilil imnande dinyi asi ton kum moloranse.
27Ni kanya aryi iniboka kwemdeina dinyi asi ni kanya ton kum kwatirdongoranse.
Ani, ni taruk mamun mulakdandoka kwemdeina dinyi nirya ati, luknubdongoboka si weik ton kum eranse.
28Niryi ato malyi kun dinyi ton kurantinyi ura,
ninyi kuna deyok diboka lilinanyi biryi liliboka wenebkwamanute ara kikiman.
Ara, niryi Er Imtamnyi biryi wenen uram asi dakbisiantinyi deyok ati ur wenen dinyi dobkwamatinyi.
29Nisi yu boranei nang sun mambul dinyi donmangnyi ura, niryi kilkil kanya ton kum boranse.
Ani, sunda mambul weik donmangnyi talak ara, ni teleb kanya ton kum boranse.
30Nibiramnyi deiblobdanmanyi ba, ni si bambol aryi malyi uram ton kum anaranou.
Ani, niryi ni mar ordana nang ati, ‘Ola dibnung,’ eboka ton kum sumnanse.
31Ni ai umbura dam kuramnyi ninyi aryi dinmanabok, yuk nang yanman asi yina boubdeibnaba, baroramnyi asi eiriramnyi.
32Ani, ni ai bisik bublan ara bisik ai yiban nang ati bublan kungloranse.
Ati, sun ninyi atei nang ababyi wanok niryi taklobmanba, baitam ton kum maramnyi.
33Nira, sun yuk nang aryi sun malyi kun dinyi limdaroraming to kum kuranse.
Nira ni malyi kun dinyi ara kanyatam inirdarona ton kum kuranse.
34Ara, ninyi ilinto kun ai lak kimdana ara ni ilil kuranou.
Ani, ni mining ai ninyi aryi ina ngilingdonin dinyi ara ni lungdana kum kuranse.
A deyok aryi nira aitam bukokman ura, baitam ton sakweteboka yibana kum kuranse.
35Ah, yuk nang aryi nisi tatardongonin kerek sengna ara ton kum sekeibmaning bok,
niryi ni damnyi limdaron uram ebde yanganman ara a sirya eryanman.
Niryi a sisikde yanman uram a nirya ara dib kobdob uram akwe sisikde yanman.
Ati, Er Iya Erebdobnyi bira Iya Mikibnyi biryi ni molona kekeboka, ni dam asi ni malyi kuranyi dinyi lak ebnici ababyi mem kuma.
36Ba, niryi malyi kun dinyi diba ati ton kurantinyi ba, yuk nang aryi nisi tatardongon kerek sengna kerek sekeibmaniting ura, niryi boboka yuk nang urasin dam boyibinkwantinya.
Ni alyi kum kubkwamanute. Niryi a kerek sengna asi, weik sien nang aryi sun weik sien nang kuramingnyi to lak kimna kisok kaluna kaluraming to kuboka yibinkwantinya.
37Er Imtamnyi biryi nisi naboka asibdenute ura,
niryi dubnyi kuboka Er urasin dam asi tingbinkwantinyi.
Ura, ni kunurantinyi dinyi nirya ara Er dam asi lak enkwantinyi.
38Niryi yuk nang tukwe asi araboka wa iranyi ati, Er Imtamnyi biryi nisi wenebkwamanici ababyi mem kuma.
39Niryi yuk nang koubdoba asi dengna kumkum talyi kiboka yibkabokanyi ura, Erci nisi ur da wenebnurura.
Ani, wa iboka kouramingnyi nang asi kwaning atana bukingnyi ura, Erci nisi ur da kulaboka wenebnurura.
40Ba, ni wa in dam ara gandum yala kum abkwande, eda, kirikna asi abkwande ara mem kuma.
Ani, jelai yala kum abkwande, eda, alingkweia yala asi abkwande ababyi teleba,” ebmou.
Ayub biryi sisikde yanabwe ani, a sirya eryanmou.
Currently Selected:
Ayub Uram 31: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
