Ayub Uram 29
29
Ayub biryi er yuma ara teleb kuramwe ani, aminda ara mambul dinyi doramwe ati ebmou uram deyok
29:1-25
1Ayub biryi er uram tuba liliboka ebmurubmou,
2“We, ni kam kuron uki asi minob mabisibde yase wala kuranse to akwe kurmururorantinyi.
Er Imtamnyi biryi nisi kalingdoranou ba, kuranse uki ato akwe kurorantinyi.
3Er Imtamnyi uk ubna milil ni kisok dub ai ararkareranou ba, kuranse to akwe kurantinyi.
Ani, kunuk kankan yibanmana ababyi Er berengna milil aryi ararkareranou ba, yibaranse to akwe kurorantinyi.
4Ni ukuryok neronmase talak kuroranse ato akwe kurorantinyi.
Er Imtamnyi biryi ni ai umbura uruna kuroranoumwe to akwe iya kurorantinimnyi ura teleb.
5Er Iya Mikibnyi ni ab tonkwa kuranoumwe to akwe kurorantinyi ura teleb e.
Ani, ni mabwe nermabwe kankan noutam kuroranse to iya kurorantinyi.
6Minob ura, ni yan iboka yibin ai nirya ara ni winin dinyi moum yung aryi me kengninto kuranse.
Ani, keil kon mutuk aryi co zaitun du yung me ilinto yibarmuruninto kuranou ato akwe kurorantinyi.
7Ba, nira akatei dua kibdob nang tonkwa akatei wengyangan bisik bublan dam uram sisingna keta bukoka uram sisingnamoubwe.
Ura, nibabyi sun sien nang kankan asi burbaranse.
8Ba, akatei kabir nang aryi dinmangnyi uca, ni bukmanyi asi asing eibningnyi ura, sun tubto dongtam der deib liroramnyi.
Ba, wise nang ara luknubdongoboka tikokni ai aryi nisi kiroranei.
9Ba, akatei sien nang ara niti, ‘Nun nai,’ tenen sun ilil ati, sun uram ena ara kilingloramnyi.
Sun si bama ara sun mining taruk aryi mourtalerdaroramnyi.
10Akatei dam dub nang ababyi sunci uram ena kum dandoka ur dem burloramnyi.
Ba, sun silalum ara uram ebman kum aryi si karata deici deneroramwe.
11Sunci ni deyok kekebnin ura niti, ‘Erda Er Imtamnyi biryi kisal dangdurnyi kurur,’ eranei.
Ani, sunci ni asing eibnin ura, nisi kisal dangdoranei.
12Ara, ato deyok aryi kuranei. Sun mambul doramnyi nang aryi nisi moloramnyi dinyi asi miliboka lemdeiriranse ati kuranei.
Tonda, sun nai yabwe kum, sun kwin yabwe kum deibloboka diamingnyi mabwe nermabwe boukwe dam deiboka kwaknabmanto nang ton kum asi niryi lemdeiranse deyok aryi ato ukuranei.
13Niryi sun dibokmanto kuramnyi nang asi dibniliboka boukwe kimnanse deyok aryi sunci nisi kisal dangdoranei.
Niryi sun sulyi nerabwe asi miliranse ba, sun kanya kilkil kuramwe.
14Nira yuk nang urasin dam asi teleb kun dinyi asi ongon aling kuna ongororanse.
Ba, alib ongon aling ongoninto kuranse ara kikimanto kun dinyi asi kunuranse.
15Ara, nira sun asing kuan nang sun asing kimnanse.
Ba, yan malyi kuan nang ara sun yan kimnanse.
16Sun utotoa kum nang ara nira sun nai kimnanse.
Ba, sun ninyi atei aryi tingyangan nang ara nira sunsi limdonanyi kimnanse.
17Bok, sun yu nang mikib ara niryi si kankanya deldelekdonokoka mikib yala langdeiriranse.
Ba, sun yu nang aryi, ‘Oyibkwamab,’ tenen kunmangnyi nang ara niryi lemdeiriranse.
18Niryi ato teneranse, ‘Ni kam kun uki ara uki weikanun kubtabakdobkwan.
Ani, ni dibokunyi ura, ni ai umbura dam asi ur mangkau asa aryi dibokwan,’ teneranse.
19Tonda, ‘Ni kam kuran ara co aryi yating me kin bolirande co aryi telebto kuboka arande to kuronkwan,’ teneranse.
Ani, ‘Nira lukunda mo doun aryi bok deici orande co ato akwe kuronkwan,’ teneranse.
20Ba, ton teneranse ara, ‘Yuk nang aryi nisi iya kisal dangmurunkwaning.
Ba, ni mikib asa kunun dinyi ara mitang ton kurdena kum uca, iya mikib akwe kurmurunkwanir,’ teneranse.
21Yuk nang ara ni uram ena akwe kekebde buramnyi.
Ani, sun uram ena kum uca, niryi yan memen uram ena akwe kekeramnyi.
22Ni uram enmanyi ani sirya ebni ura, yuk nang aryi ton kum tabakdongoboka uram eramnyi.
Ni uram eranse sun kanya dam wengbaramwe ara mo doun aryi daksakoka utotoa dub maryurbarande to kuramwe.
23Yuk nang aryi ni uram ena ati dibde buranei ara mo cemna ati dibde buraming to kuranei.
Ani, sunci niti si akeiboka dibde buranei ara mo cemna talak ati, si akeiboka dibde buraming to kuranei.
24Tonda, sunci, ‘Se,’ tenen kanya boboka mambul kanya bobmangnyi ura, niryi sunsi si kirirdeiriranse.
Ba, ni lengleng en urasin deibmanici ura, sunbabyi lengleng ermururamnyi.
25Ni minob kuranse talak ara sun bobde menengnanyi kuransiryi, ‘Ato kubkwayeb-ato kubkwayeb,’ eranse.
Tonda, nira weik sienyi nang aryi yuk nang kankan kuboka kalingnaming to kuranse.
Ani, engen kanya bobmangnyi asi urum bukmiliboka kanya lengleng erdeirinanyi kuranse,” ebmou.
Currently Selected:
Ayub Uram 29: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
