Ayub Uram 28
28
“Bukdob bingna dinyi ara ninyi aryi im dangna tukwe dangna mutuk dam ingkirikoka ton kum donung,” ebmou uram deyok
28:1-28
1Ayub biryi tubto ato eboka ebmurubmou,
“Dengna weik si perak ab emas ab tukwe kurukoka donung ai ara a kurur.
Ani, dengna weik keil si perak ab emas ab uk daboka bitanung ai ababyi a donung.
2Tonda, kat dinyi besi ara tukwe umbura aryi kurukoka donung.
Ba, keil aryi uk daboka nunuboka kat dinyi si tembaga kikninung.
3Ninyi aryi kunuk ilinto kuranci ai ababyi wengyurbaraming.
Ani, tukwe umbura wengyurbindoka keil du ati ingkiringnung.
Kunuk ilinto dangnande ai ababyi wengyurbindoka dengna weik keil wininga ati ingkiringnung.
4Me wininga ati ingkiringnung ai ara ninyi kuna dam ai kuma, eda, eratoto yuk mutuk asi kurukoka ingkiringnung.
Sun wengyurbaraming ai ara minob ninyi ton kum wengderbaramingnyi ai asi wengyurbanung.
Sunda karin noutam asi bomteng-bomteng eboka wengyurbanung.
5Tukwe aryi ninyi ati yin-yina anardeirirur.
A tukwe akiryok amwetam ara ninyi aryi kurukoka uk sekoka dengna weik keil donung.
6Tukwe umbura ara dengna weik keil si lazurit kurur.
Tonda dengna weik keil si emas ababyi marur.
7A tukwe kurungdona umbura dam ara maka langlang eryibarande ababyi binman kum kurur.
A dikum ara maka bib ababyi ton kum eirirur.
8Bai kurande dinyi yu dinyi ababyi a mutuk dam ara yan yanirderbana kum kurur.
Ani, a dikum ara bai kam si singa ababyi ton kum yan yanirderbarur.
9Keil don nang taruk dem aryok kurukoka keil kat dinyi asi kum telenung. Eda, keil telena aryi telenung.
Ura, mutuk kon amwetam asi botoboka kurukde baramingnyi ani, mutuk dika nong asi wengyurbanung.
10Ninyi aryi mutuk kon umbura asi ungnung.
Uca, a mutuk kon amwetam kurur dinyi dengna weik keil iya bikdob dinyi yala amuma ababyi lak eiboka doronung.
11Ani, kurukde baramingnyi uca, me irdongona kungnung ba, ya orur.
Ba, tukwe umbura iniboka dou kurande dinyi ababyi boweleyandoka lak kimdeirinung.
12Bok, bukdob bingna dinyi ara dantam aryi donung do?
Ani, kanya diboka etekum eboka bingna dinyi ara dantam kurur do?
13Iya bukdob bingna dinyi kurur ai ban bisik ara ninyi aryi ton kum bingnung.
Ani, bukdob bingna dinyi ara ninyi kam kununga dam ara ton kum kurur.
14Me deiboka sasibwe aryi, ‘Iya bukdob bingna dinyi ara ni dam a kurur,’ ton kum erur.
Ba, weik me kwan deibwe aryi, ‘Ni dam ababyi a kurur,’ ton kum erur.
15Dengna weik keil si emas teleb dinyi aryi bukdob bingna dinyi kum unubte.
Ani, bukdob bingna dinyi ati, dengna weik keil si perak aryi kum dekwamating.
16Bingna dinyi ati, dengna weik keil emas mutuk si Ofir era mutuk dam kurur dinyi aryi dekman kum.
Ani, asing lotongdon keil si krisopras dengna weik dinyi aryi dekman kum.
Tonda asing lotongdon keil si lazurit aryi kikliboka dekman kum.
17Bukdob bingna dinyi ara keil si emas atoa kibdeibman kum.
Ani, kaca keil atoa ababyi kibdeibman kum.
Wise dananci keil emas atoa ababyi kibdeibman kum.
18Ninyi ara, ‘Dengna weik keil si mutiara ab, gewang ab hablur ab asi bikdob dinyi kurur,’ tenenung.
Bok, bikdob dinyi ara bukdob bingna dinyi asi iya bikdob dinyi kurur.
19Bukdob bingna dinyi ara Etiopia mutuk dam kurur keil si krisolit ababyi kiklibman kum.
Bukdob bingna dinyi ara tabtabingna kum dengna weik keil si emas teleb dinyi ababyi dekman kum.
20Bukdob bingna dinyi ara dan mutuk aryi yangarur do?
Ba, kanya etekum bingna dinyi er kurur ai ara dantam kurur do?
21Bukdob bingna dinyi ara kam kuboka lulungna dinyi urasin dam ara inirorur.
Maka imtam langlang eryibarande dinyi urasin dam ababyi inirorur.
22Dirminingni dinyi ab orminingni dinyi ab aryi ato erurung:
‘Bukdob bingna dinyi ara nun dam ton kum kurur.
Eda, nunda kumwe uram dem aryok nun amol dam wengyangarur asi kekenunum’ erurung.
23Er Imtamnyi tentok asi bukdob bingna dinyi kurur ai ban bisik bingdur.
Ani, bukdob bingna dinyi kurur ai ara Er tentok asi bingdur.
24Ara, Erci im dangna mutuk tukwe dangna mutuk nirya dirnilirur deyok aryi Er bingdur.
Ani, im bila amwetam kurur dinyi nirya ara Erci eirirur deyok aryi Er bingdur.
25Er Imtamnyi biryi Er bukdob bingna dinyi aryi, ‘Ibalya mikib dinyi asi ukuboka dobkwande,’ tenen sekeibmou to kuboka ibalya dorur.
Ani, Er bukdob bingna dinyi aryi, duwa umbura dam kurur me ilinto ababyi Erci lilibdeibmou to kurur.
26Erci mo cemnande dinyi ababyi Er bukdob bingna dinyi aryi dobdeibmou.
Ani, bebe ling eboka liman deboka yibarorande dinyi ababyi Er bukdob bingna dinyi aryi bisik lilibdeibmou to akwe kunurur.
27Ato kurdeirinmou talak aryi Erci otokum bingna dinyi asing eibmou ura, ‘Bukdob bingna dinyi ara iya teleb dinyi,’ eboka lak ebmou.
Ura, Erci bukdob bingna dinyi asi bita dibnilibdeci ura, Erci a bukdob bingna dinyi aryi ukutotoa kunurdeirur.
28Ati, Erci ninyi ati ato ebmou,
‘Diba ati, Er Iya Erebdobnyi bisi ilil kun dinyi ara kanya otokum bingna dinyi kurur.
Tonda, ninyi aryi, “Ni malyi kun dinyi kubnyei,” tenen leimdon dinyi ara bikdob dinyi kurur,’ ebmou.”
Ato eboka Ayub biryi er kwit yabwe asi ebmou.
Currently Selected:
Ayub Uram 28: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
