Ayub Uram 27
27
Ayub biryi, “Sun malyi kun nang aryi dibde buramingnyi dinyi ara kum dankwande,” ebmou uram deyok
27:1-23
1-2Ayub biryi er kwit yabwe dam asi enmou dinyi asi tubto ebmurubmouci, ato ebmou.
“Diba, Er Imtamnyi bira Iya Kam kururnyi kururcok,
Erci nisi kikimanto dinyi kum karenurur.
Eda, Er Iya Mikibnyi bira nisi kanya sukursinin dinyi asi karenurur.
3-4Ati, ni isin tuba nebneb eranyi talak ara,
diba ati, ni si bambul dam aryi dib kum uram ara ni iya ton kum enkwan.
Tonda, Er Imtamnyi biryi nisi kam kun dinyi tuba kareanici talak ara,
ni silalum deici aryi tola uram ton kum anankwanir.
5Niryi sunsi, ‘Ni kwit yabwe aryi eraming uram ara diboka eraming,’ kum tenenkwansin.
Eda, ni yuk, ‘Ni malyito kum kunun,’ tenen bingdanun dinyi akwe talebnurubdanyi tok asi dibkwan.
6Ni u dikum dinyi kunun bingdanun dinyi ara ton tangdongona kum kunkwan.
Eda, niryi iya talebnuruboka kununkwan.
Ni kam kunun talak nirya ara ni mining kanya aryi nisi, ‘Malyi kurum,’ ton kum enurur asi bingdanun.
7Er Imtamnyi biryi sun malyi kun nang wenebkwande to kuboka ni mar ordana nang ababyi neiktoto wenena teleb.
Ba, nisi mar iraning nang ara sun malyi kun nang asi kulabkwande to neiktoto kuboka kulana teleb.
8Diba ati, Er Imtamnyi biryi Er uram asi malyi kimdamingnyi nang asi kum daneibci ura, sun dibde buramingnyi dinyi ara unatoa dobdobkwaming do?
Ani, Er Imtamnyi biryi sunsi sun kuramingnyi to deyok ati, dibdeboka wenen dinyi karebci ura, sunda unatoa dobdobkwaming do?
9Sunsi mambul dinyi douryanmaci ba, mambul donmangiryi, Er Imtamnyi bisi engeboka molonmangnyi ura,
Er Imtamnyi biryi sun molona ara kekebkwamote do?
10Sun ato nang ara Er Iya Mikibnyi deyok ati, sun kanya teleb ton kurur do?
Ani, sunda Er Imtamnyi bisi tuba-tuba uram sisikoka ton molonung do?
11Niryi sunsi Er Imtamnyi taruk mikib aryi ukurur deyok asi eterebkwansin.
Er Iya Mikibnyi biryi tenen dinyi ara niryi sun urasin dam kum inibsunun.
Eda, sun dam lak ebkwansununa.
12Bok, diba ati, sun asing kobdob aryi a nirya eirindarur.
Ati, sunda unatoa ati kiknib kum uram asi kanya teneiboka uram endarur do?
13Ara, sunci ato endarur, ‘Er Imtamnyi biryi sun Er uram diboka bingna kum nang ati ato kuboka kiknirminingdur.
Ani, sun yu dinyi akwe kuramingnyi nang sun dinyi kibkwande dinyi ara Er Iya Mikibnyi biryi karebkwande.
14Ba, sun mabwe nermabwe ara ilinto yaldaktabakde baramingnyi bok, a mabwe nermabwe ara ya kwaning kimkwaming.
Ba, sun mabwe aryi yaldangna nang ara yina kikiman kum yibwaming.
15A kubkwande dinyi asi leibdobingnyi nang ara bum lubna youn aryi din nang wengbaraming mutuk bakan dam wengbinkwaming.
Ba, sun doamingnyi sulyi nerabwe aryi sunsi boukwe eiboka kum engebkwaming.
16Sunci co bok taleramingnyi dinyi ara sungsunga boboka buluraming to kuramingnyi dinyi ab,
sun ongon aling miningnamingnyi ara sici bukde welerande to kubde deiriramingnyi ab ara deibloboka dibkwaming.
17Ba, sunci bulubde miningnamingnyi dinyi ara yuk nang diboka u dikum dinyi kuramingnyi nang aryi boboka talebdobkwaming.
Ani, sun a deiriramingnyi co bok ara sun malyi dinyi kuna kum nang aryi bokdobkwaming.
18Sun yu dinyi kun nang atei doraming ara darukaia aryi mikib kum uca, tiya ati talyitam arubdandoka dorande to kunung.
Ani, sunda utotoa kalingna nang aryi tiya atei durubdeiboka kaliki buraming ai ato ai don nang kunung.
19Ai dobdeiboka bona bon nang kuraming to kuboka mangkau asa marbaraming.
Mabmangnyi ani bukoka dinmangnyi ura, minob kuramingnyi to kum uca utotoa nirya kum danmaci asi asing eiraming.
20Sun yu dinyi kuramingnyi nang ara iya ilil weik dinyi aryi,
asing kublabumto aryi me obde yangarande to kuboka dobkirikwande.
Ba, lukunda ara ibalya weik doboka sunsi boboka yuk mutuk deirlorbinkwande.
21Yaletam kumwe aryi yandoka tomoboka bobici ura, kum dankwande.
Ba, er kuranci ai aryi tomoboka bai donokwande.
22Er Imtamnyi biryi boukwe tenerdena kum uca sunsi bai donokwande.
Ba, sunci Er Imtamnyi mikib ilil ati, “Ola cukoka iniboka lemdarorbinkwayeb,” tenen cungdorbinkwaming.
23Sun yu dinyi kuramingnyi nang ara iya kum kubkwaming ati, sun yuk nang aryi taruk bokbok ebkwaming.
Ani, sun yu nang kuramingnyi ai olong asi filing-filing eboka merebkwaming,’ endarur,” ebmou.
Currently Selected:
Ayub Uram 27: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
