Ayub Uram 26
26
Ayub biryi, “Nun ninyi kunub ara unanyi bisi Er Imtamnyi erebdob dinyi bikwamoute do?” ebmou uram deyok
26:1-14
1-2Uca, Ayub biryi er kwit Bildad bisi ato ebmou,
“Ni kwit a, kanci nun mikib kum nang asi boukwe bormiliroransirim to aryi a kunum eandima.
Ani, kanci nun isin sukmasici ba, dukde bunmabyi nang asi lemdeiriransirim to aryi a kunum eandima.
3Kanci nun bukdob dinyi bingna kum nang asi yan memen uram ebmasirim ara diboka kunum ebmasirima.
Ani, nunsi bingna dinyi langdeiboka etereransirim ba, nun kisok bublan kungdeirininto kuransirima ara diboka kunum kuransirima.
4A ebmarim uram ara unanyi biryi arukmakir ba, ebmarim do?
Ani, kanci lak kibdeibmarim uram ara unanyi biryi tenen dinyi asi lak kiboka ebmarim do?
5Sun dimnung nang kanya ara Er Imtamnyi urasintam asi sirim talerur.
Ato kuboka neiktoto tukwe bukwe amwetam me babyi me umbura kurur dinyi babyi nirya sirim talerur.
6Er Imtamnyi urasin dam ara din nang kunung ai ara inibdob kum uca, lak asi si angang eninto kurur.
Din nang wengbanung bisik ara bublan tirikna kum ai ato kurur.
7Er Imtamnyi biryi im ara utotoa kum ai im karin asi lingdeirininto kubmou.
Ba, tukwe ara karintam asi kiboka dirirkweteninto kubmou.
8Ura, me ara Erci duwa umbura kweboka kirdeirininto kurur.
Bok, a duwa ara me ikin aryi kwilingsangna ton kum kurur.
9Erci, ‘Ninyi aryi Ni Iya Weik Sienyi bunun sokon asi dibdengningnyei,’ tenen ati,
Er duwa aryi tunurdeirirdarorur.
10Erci weik me kwan deirin ai asi yakna yuk likeibmou.
Ani, berengna ab kunuk ab wilimna lika yuk dobdeibmou.
11Erci yu asa aryi erengdonmaci uca,
im baribnin yibiu mutuk kon ara lulunglamdur.
12Er mikib aryi weik me kwan lontingna asi malyi kiboka lamabdeibmou.
Ani, Er Imtamnyi Er bukdob bingna dinyi aryi yu dinyi si Rahab asi kisok dakoka kwetebdeibmou.
13Er isin aryi imtatoua lakabokmou ba, im ki botobmou.
Ani, Er taruk aryi donokoka cungdorbanmou kwatima asi obkabmou.
14Diba ati, niryi a ebman dinyi nirya ara Erci ukurur dinyi nirya kum ebman. Eda, lak eirinub dinyi akwe ebman.
Nunci Er uram kekenub ara iya mitik uram nun erkaresurur ba, kekenub.
Bok, Er mikib aryi liman demnande to uram aryi eboka sisingmote ura, ‘Ato ati ebmar,’ teneboka bikwamatibyi do?” ebmou.
Currently Selected:
Ayub Uram 26: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
