Ayub Uram 23
23
Er Imtamnyi urasintam aryi Ayub biryi erdamnyi libdandobmou uram deyok
23:1-17
1Uca, Ayub biryi ato eboka libdandobmou,
2“Er Imtamnyi taruk aryi nisi tiklim darabdeibnou ati, ni mambul kiringdan uram ara Ersi donongnun.
Niryi mambul kirikdandoka bunun dinyi ara Ersi lebesengninto kunun.
3-4Kobe se, niryi Er kurur ai bingnantinyi ura,
Er urasin dam bindoka ni deyok ara Er dam donokoktinyi.
Ani, Er burur sokon dam bana kikiman ura,
bindoka ni si angdona aryi uram ilinto eboka nibiramnyi libdandobtinyi.
5Ba, Erci nisi uram dekeibnute asi kekebtinyi.
Ani, Erci niti uram ebdeibnute asi bikdobtinyi.
6Er Iya mikib dinyi biriman aryi ni deyok ati liliboka wenebkwamanute do?
Kum ukubnute. Eda, Erci nisi kekeboka dibnilibnuturya.
7Sun manmalina kum uca teleb kuramingnyi nang aryi Er urasin dam limdarona ara kikiman.
Ati, Erda ni malyi kuna deyok diboka lilinanyi biryi nisi, ‘Erda malyi kun dinyi ton kum kurur,’ eboka iya lobdeibnute.
8Bok, niryi yaletam kuboka ingkiringdorbanmanyi ura, Ersi kum eirinun.
Ba, kitingbantam ingkiringdorbanmanyi ababyi niryi Ersi kum eirinun.
9Ani, me utam ingkiringdorbanmanyi ababyi Er urasin lak ton kum kimdarur.
Ba, ni urasin danguboka me youkwetam ingkiringdorbanmanyi ababyi niryi kum eirinun.
10Niryi Ersi kum eirinun bok, ni kunun tam nirya ara Erci sirya bingnurur.
Erci ni kunun tam asi, ‘Ayub er kurur dinyi biktinyi,’ tenen ukubdenute ura, nira malyi kun dinyi ton kum kurantinya eibnuturya.
Ara, kat keil si emas mil dangding erande ato kuanute asi eibnuturya.
11Ni yan yaninun ara ton dangbisina kum uca, Er yan tareiya akwe yaninun.
Nira Er bisik akwe dibniliboka yibanun, niryi dangbisina ara ton kum kunun.
12Er si bambul dam aryi arungdeirin uram ara ton lebesengna kum kunun.
Nira Er si angdona aryi anarur uram asi ni kanyatam deiboka kununun.
13Er Imtamnyi bira iya kam kurmurururnyi kurur. Ersi unanyi biryi bisik seksinibkwamote do?
Erci, ‘Ato kubkwan,’ teneanci dinyi nirya ara kununa akwe kurur.
14Erci niti, ‘Ato kuboka mambul kubdeibkwan,’ teneanici dinyi nirya ara kunubdeibkwanirarya.
Ani, ton yuk dinyi ababyi niti, ‘Ato kubdeibkwan,’ tenebnou dinyi ara Erci kunubdeibkwanirarya.
15A deyok aryi Er urasin dam kuna ara ni kanya sirim talenurur.
Niryi a kunurur dinyi nirya kanya teneinmanyi ura, niryi Er urasin dam tingbana ara ni ilil kunurur.
16-17Er Imtamnyi biryi ni mikib kuboka ibarya kuranou dinyi nirya ara obminiknou.
Ba, ni kanya sirim taleboka ilil kunurur dinyi ara kunuk dangna asi ilil kum kunurur.
Eda, Er Iya Mikibnyi bisi ni ilil kunurur.
Tonda, ni urasin dam asi kunuk dinyi aryi siklirdongoninto kunurur ati, ni ur dem kum kubnun.
Eda, niryi ni mambul doranyi dinyi Er urasin donongkwanuna,” ebmou.
Currently Selected:
Ayub Uram 23: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
