Ayub Uram 22
22
Elifas biryi Ayub bisi, “Ayub a, kan malyi kun dinyi weik ukurum ara taklobdum,” eboka durukmou uram deyok
22:1-30
1Ba, Teman ateinyi si Elifas biryi Ayub bisi ato ebmou,
2“Ninyi tukwetam kunub ara Er Imtamnyi biti teleb ton kimdeirinub do?
Kum, eda, sun bukdob dinyi bingna nang aryi bingnaming dinyi ara Er Imtamnyi biti teleb kum kimdeirinung.
Bok, sun baramnang akikwe teleb kimdeirirdaronung.
3Ati, Ayub a, niryi tenebmakin ara, ‘Kanci diboka u dikum dinyi kunanyi kurantum aryi Er Imtamnyi bira Iya Mikibnyi kurur bok, tabakoka Mikibnyi kibkwamote do?
Kum, kanci manmalina kum uca, teleb dinyi akwe kunurantum ababyi, Erci tabangdongon dinyi ton dobdobkwamote do?
4Kanci Er Imtamnyi bisi ilil tenerantum ati, Erci ikin dinyi kareboka wenebkwamakute do?
Ani, Erci kansi, “Anyi bira teleb kururnyi,” eboka ninyi deyok lilin ai bobinkwamakute do?
5Ato ara kum kubkwamakute, eda, kanci yu dinyi asi ilinto kurum deyok aryi Erci kansi wenekurur.
Ani, malyi dinyi ababyi mitik kum kurtabangdum deyok aryi Erci wenekurur.
6Ara, kanci, “Se, nai e, ni talya kubkwaman,” tenen kanya bita teneirdena kum kuramoumwe. Eda, kan du weit yabwe aryi kan dinyi asi tiya bobloamingnyi ura, kanci araboka dororamoumwe.
Ani, utotoa kum nang ongon aling asi araboka ukula dororamoumwe.
7Ba, me atanman nang ara me ton kum dinirdeiriramoumwe.
Ba, kwaning atanman nang ara yina ton kum yirkareramoumwe.
8Bok, kanda mikibnyi biryi sun yuk nang mitang nang tukwe asi alaroramoumwe.
Sirya arabdobni ura, kanda a tukwe deici asi telebto kuboka kuroramwe.
Ba, yuk nang aryi kansi si weik ererdeirirankei.
9Ba, sulyi nerabwe ara utotoa ton karerongna kumkum, ur taruk baning dem asi yangdonongnamoumwe.
Ba, sun nai yabwe-sun kwin yabwe deibloboka din mabwe nermabwe ara taruk bulak-bulak erlorongnamoumwe aryi wenekurur,’ tenebmakin.
10Ni kwit e, kanda ato kuramoumwe deyok aryi eblobdob dinyi asi kan dam douryangarankir ake.
Ani, asing kublabumto aryok ilil weik dinyi kan dam maryangarangkir ake.
11Kan asing berengna dinyi ara sirya kunuk dakmakir aryi bita eibman kum kubmakir.
Ani, on me aryi sirya oboka siklirande to kubmakir ake.
12Er Imtamnyi bira imtam iya erebdob sokon burur asi ton dibderum.
Ani, kurya imtam bingdarur dinyi asi dibderum, iya imtam kobdob ei kurur dinyi eitiba.
13Ato kurur bok asi kanda ato tenerum, ‘Er Imtamnyi bira una kuboka bikwamanir do?
Imtamnyi bira duwa kankan kururnyi biryi nisi una kuboka bikoka ni deyok lilibkwamanute do?’ tenerum.
14Ani, tonda ato ton tenerum, ‘Er urasin dam ara duwa aryi limdongorur aryi da kum eibkwamanir.
Erda im tukwe bukwe kubkub ai akwe yibarkiringdura da kum eibnurur,’ tenerum.
15We, kanda minob yu dinyi akwe kuramnyi nang aryi lingnamnyi bisik asi taba milinkwandim do?
16Sun a malyi kuramnyi nang ara sun din uki ara din uki kum kibman bok asi sun isin nebneb en dinyi dororamwe to ara kan teleb kukurur darib?
Ani, me weik oboka me umbura boboka dongobmou ba, isin daksekmai to asi kan teleb kukurur darib?
17Sun yu nang aryi Er Imtamnyi bisi ato enung, ‘Kanda nun dam a kuna nun li, bindobdum!’ enung.
Tonda, ato enung, ‘Er Iya Mikibnyi biryi nunti una kubdeibkwamasute do?’ enung.
18Uca, ukutotoa teleb dinyi nirya ara Er Imtamnyi biryok sun ai dam langkaringdeirirur.
Bok, sun yu dinyi kuraming nang aryi, ‘Ato kubkwayeb-ato kubkwayeb,’ eboka uram touboka kiknirminingnung dinyi ara ni kum miliran.
19Er Imtamnyi biryi sun malyi kun nang asi wenerur asi sun u dikum dinyi kunun nang aryi eibingnyi ura, sun kanya kilkil kurur.
Ura, sunci yu dinyi kun nang ati durukoka ina ngilingnung.
20Diba ati, nun mar iransing nang ara kum dansekmang.
Ba, sun taleramnyi bona talena ara uk aryi bongkalubmar.
21Ayub a, kanda mangkau aryi telebto kubdobkwandim ati,
Er Imtamnyi urasin dam asi namin kanya boboka kubdobdum.
Ato kubminyi uca, kanda kisal dangna dinyi dobdobkwandum.
22Er si bambul dam aryi kansi eterekurur dinyi asi diboka dobdobkwandum.
Kanci Er uram erur dinyi asi kan kanyatam deibdobkwandum.
23Kanci kan malyi kun dinyi ara taklobminci tamuboka Er Iya Mikibnyi tam urasin deibminyi ura, kan kanya luknubdongoboka kubdum.
Ani, kan ai umbura dam kuraming ninyi aryi yu dinyi ukurumingnyi ura, ‘Malyi, sun yuk a kunmanunga,’ tenen deirlona mem.
24Ani, mil dangding en keil si emas teleb dinyi deirirum ara bai donokdum.
Ofir mutuk aryi donung keil emas namin teleb dinyi ara me umbura keil kankan donokdum.
25Bai donokabokminyi ura, Er Iya Mikibnyi bisi kan ai deirina mil dangding keil emas atonyi kibdobdum.
Ani, keil si perak atonyi kibdobdum.
26Ato kubdobminyi ura, kanci ‘Er Iya Mikibnyi bira ni bona talena ai deirin dinyi atonyi kunurur,’ tenen kanya boboka iya kilkil kukina teleb.
Ani, Er Imtam kururnyi bikikwe kan kanya baribdeiboka kuna teleb.
27Kanci Ersi uram sisikoka molobdobmaminyi ura, Erci kansi kekeboka kunurdeinkwankir.
Ba, kanci Ersi uram ebdeiaminyi to nirya kunuboka dekeibkwandim.
28Kanci, ‘Ni ato kubdobkwan,’ tenen ukuronmaminyi dinyi nirya kunurdeinkwankir.
Ba, kan yibankwandim bisik nirya ara Er milil aryi ararkarenkwankir ba, yibankwandim.
29Ara, ato deyok aryi ebman. Er Imtamnyi bira sun wingdan kanya bon nang ara luknurdeirirur.
Bok, sun luknubdob kanya bon nang ara Erci lemdeirirur ati ebman.
30Er Imtamnyi bira sun malyi kun dinyi ton kuna kum nang ara lemdeirirur.
Ati, Erci kansi lebdeibkwankici ura, lek dinyi asi kan taruk dam kurankici akwe lebdeibkwankurura,” eboka durukmou.
Currently Selected:
Ayub Uram 22: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
