Ayub Uram 24
24
Ayub biryi, “Er Imtamnyi bira yu dinyi kuna ara kum eiana ato kurongdur,” ebmou uram deyok
24:1-25
1Ayub biryi ton ato ebmurubmou,
“Er Iya Mikibnyi bira malyi kuna deyok liliboka wenen uki tum lak kum kibdeibwe ara unatoa ati kubwe do?
Ba, sun Ersi bikoka ilil tenen nang aryi a malyi deyok lilin tum berengna ati dibde bunung bok, a uki tum ola kum berengdur ara unatoa ati do?
2Sun ton yuk deici nang ara yuk nang wa wiliba asi lulum-lulum eboka alaronung.
Ura, tonda yuk nang winin dinyi asi arabdobingnyi ura, winiboka kalingdonung.
3Ba, wanglon mabwe nermabwe bisam keledai ara tourya ya bulubdongoboka doronung.
Ura, sunci sulyi nerabwe asi co bok mitikanun karebdongoboka bisam lembu ner asi dobdobingnyi ura, sibob deirininto kimdeirinung.
4Tonda, sun utotoa kum nang karebmanto dinyi ara kum karenungci bisirongnung.
Ba, akatei dam asi boukwe toto kubde kuramingnyi nang ara sun ilil aryi inirdaronung.
5Diba ati, sun utotoa kum nang ara bai kurande bisam keledai ato kunung.
Ara, sun yina ingkiringkiringmangiryi bai kankan yibarkiringnaming to kunung.
Tonda, sun mabwe yina yibkarebkwamangnyi ura, bai sungsung bin ilinto dangnanci kankan bindoka yina ingkiringnaming to kunung.
6Ura, sunda malyi kun nang co anggur du wa in dam bindoka kisibloamingnyi asi dakde yinung.
Ani, winin dinyi yina ati, wa in dam tuba takdongoamingnyi dinyi dobde yinung.
7Sunda ongon aling kum aryi lukunda mabokwamangnyi ura, nong baning marongnung.
Ani, arum kun talak ara kaluna kum aryi ur dem marongnung.
8Ba, mutuk deyok cemnande mo ababyi ur dem kuroraming deyok aryi turbarim burorande.
Ba, sun kubdobmanto ai ababyi kum deyok aryi mutuk kon burande keil deyok asi sun ai kimdonung.
9Sun yu nang aryi sun nai yabwe sun kwin yabwe kum mabwe nermabwe asi dobtaleboka sun ikin wa irmilin mabwe nermabwe kimdeirinung.
Ba, utotoa kum nang mabwe nermabwe alok ukuryok moum yinmangnyi asi dobdobingnyi ura, sibob kimdeirinung.
10Ba, sun utotoa kum nang ara ongon aling kum aryi, bisik atei keta noutam ababyi nong baning dem yibarkiringnung.
Ani, kwaning bulung-bulung wa in dam gandum yabla bulurkiringnung.
11Sunda co zaitun du yung me ururkiringnung bok, me atarur.
Ani, co anggur du yung ururkiringnung bok, sun wa arungna nang aryi, ‘Me sirik ababyi ton ur yibokmandarur,’ kum enung.
12Atei keta noutam asi sun mambul wa iramingnyi uca, dibkwamangnyi nang uram ngalungna akwe enung.
Ani, dilaka weik sangdur nang uram akwe ngolongnung.
Bok, Er Imtamnyi biryi sun molona ara kum kekerur.
13Sun malyi kun nang deici ara berengna dinyi ara sun yu kurur nang kunung.
Sunda berengna bisik ara sun kum bingnung.
Ani, sunda berengna bisik ara sun kum milinung.
14Sun yu dinyi kun nang ara im tongtong lingmaci ura, minob bukoka sangdoraming.
Ura, sun mambul wa iramingnyi nang ab utotoa kum nang ab asi oraming.
Ba, lukunda ara yuk nang dinyi asi ukula dorkiringnung.
15Sun ner ukula yon nang ara inina ati dibde buraming.
Sirya inibci ura, ‘Ninyi eibningnyei,’ tenen ati,
sun urasin ara kaluna aryi lilibdandobingnyi ura, baitam sakweteboka yibaraming.
16Sun ukula don nang aryi yuk nang ai wengbinkwamangnyi ura, lukunda talak aryi ai wengbindoka kalaraming.
Ani, kitingtam ara inirongnaming.
Ba, sunda kiting ara ton kum eirinung.
17Sun ukula don nang ara lukunda ara sun kitingtam ato kimnande.
Ba, iya kunuk tilib kurande dinyi ara sun uki teleb kimnande.
18Sun yu dinyi kun nang ara me asok noutam asi bowengnande dinyi ato nang kunung.
Er Imtamnyi biryi sunsi sumna dinyi karerur.
Ba, sun co anggur wa ara du ton kum mourur ati, sun wa irona ton kum kunung.
19Sun malyi kun nang asi din nang wengbaraming mutuk aryi tomoboka alurorur.
Ara lumtaia deianci asi dou berekoka kiting tin aryi kum danardeirirande to kurdeirirur.
20Sun malyi kuramingnyi nang asi co kweboka mairaming to kurande.
Ba, sun dibingnyi ura, sun tub ara beici kwaning kimdur.
Ura, sun deianci ner ababyi sunsi luba kimnung.
Ba, sun si ababyi ton tuba kanya teneirdena kum kunung.
21Sun malyi kun nang aryi mi you aryi mi kum deiroramingnyi nerabwe asi mambul bordeiraming.
Tonda, sunci sulyi nerabwe asi boukwe kimna kum kunung.
22Akikwa kuma, tonda sun mikib aryi ibarya ilinto kuramingnyi nang asi kilibtaleboka bai donongnung.
Asi tubto bukalaboka tingdongingnyi uca, ukubman kum kurur.
23Bok, Er Imtamnyi biryi sunsi ur mangkau kun dinyi asi sun kanya barimna kareninto kurur.
Erci ato kururcok, sun malyi kun dinyi nirya dirnilirongdur.
24Uca, sunda tiya ati kam kuboka dub ererdarabingnyi ani, kum danaronkwaming.
Sunda co keta ato kuboka kulubsakingnyi ura, tumangnikwaming.
Sunda, gandum yabla ya sengnaming to kurkarongkwande.
25A deyok ara dib uram kurur ati, unanyi biryi ilil kum asa aryi ni uram asi tatabkwetebkwamanir do?
Ani, niryi dib ebman uram asi, ‘A tola ati enmar,’ ebkwamanir do?” ebmou.
Currently Selected:
Ayub Uram 24: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
