Ayub Uram 21
21
Ayub biryi, “Sun Er Imtamnyi uram asi kum kekerana ato kunung bok, mangkau asa ara uki weik kunung,” tenebmou uram deyok
21:1-34
1Uca, Ayub biryi er kwit yabwe asi ato eboka uram dekeibmou,
2“Ni a ebkwaman uram asi diboka-diboka kekenmanindarur.
Ba, a uram aryi sunsi kanya lengleng erdeisina teleb.
3Ni uram ton ebkwaman ati, sunda kanya lamabdongoboka ur kekebde bukdarur.
Ni sirya uram ebnyi ura, sunci nisi ur da kerebdobnindarur.
4Ni mambul kirikdandoka uram enun ara ninyi asi uram enun do? Kum.
Niryi ninyi urasin dam asi, ‘Se, ni talyi kubnouci,’ ena ara mem darib?
5Sun ni tam asi urasin deiboka ni eibnumunyi ura sun kanya aryi, ‘Nai, nun ilil,’ tenebdarur.
Sun ilil kubsici ura, sun uram ena ara si taruk moubtalebdandobdarur.
6Ni mambul donun dinyi ati kanya teneirdenmanyi ura,
ni ilil aryi nong sirim talenurur.
7Sun Er Imtamnyi uram asi kum kekerana ato kunung nang ara unatoa ati kam tuba kunung do?
Ani, sun kam kun uki ababyi cang kimdur do?
Tonda, sun mikib ababyi tabangdongorur do?
8Sunda iya kam kuboka sun mabwe nermabwe aryi deirin mabwe nermabwe asi asing eirinung.
Ani, sun mabwe nermabwe aryi deirin mabwe nermabwe nebingnyi tam ababyi asing eirinung.
9Sun ai ninyi dam ara Er Imtamnyi biryi sunsi mambul dinyi ton kum karerur.
Ba, Er Imtamnyi biryi ninyi kulan balana aryi sunsi ton kum kularur uca, ur teleb akwe kuronung.
10Sun winin dinyi nirya ara den yal deibingnyi ura, telebto kuboka mi yamurur.
Sun winin dinyi a nirya ara mi boanci ura, mi yongna ton kum kurur.
11Sun malyi dinyi kun nang mabwe ara ur teleb aryi ai dam keta sakweteboka arikal donung.
Ara, bisam kambing kuna im sung-im sung eboka mereroraming.
12Ura, a mabwe nermabwe ara waise ato dinyi si rebana ab kecapi ab oboka mot sebde kuroraming.
Ani, buu ena uboka mot seboka dakde kuronung.
13Sun kam kun uki ara kanya teleb aryi kum danardeirinung.
Ba, sun dibingnyi ura, ur mangkau asa din nang wengbaraming mutuk wengyurbanung.
14Bok, sunci Er Imtamnyi bisi ato enung, ‘Kanda nun kunub ai akiryi bindobdum.
Nunda Kan erum uram ara nun kekena nun li.
15Er Iya Mikibnyi bira unatoa asi Erti si weik eboka molobkwamatibyi do?
Ani, nunci Ersi molobkwamatibyi ara una teleb dinyi dobdobkwamatibyi ati molobkwamatibyi do?’ enung.
16Bok, sun kanya teleb kurdeirin dinyi ara sun mining mikib dam ton kum kurur.
Sun malyi dinyi kun nang aryi yu dinyi ati, ‘Ato ukubkwayeb,’ enung bok, ni kum milinun.
17Se, unato ati sun malyi kun nang kam kun dinyi asi uk ubna kuna ton kum tangardeirirur do?
Ani, sun mambul don dinyi ab sunsi malyi kiminingni dinyi ab sun dam ton kum yangarur ara unato ati kurur do?
Ani, Er Imtamnyi biryi Er yu dinyi aryi sunsi u yin dinyi ton kum karerur ara unato ati kurur do?
18Niryi dinmanyi uca, sunsi gandum du kwaning lokdoba asi kumwe aryi borkengnande to kum kurur ara unato ati do?
Tonda, gandum du kwaning borbosa yeinya aryi borkengnande to kum kurur ara unato ati do?
19Sun tenendarur ara, ‘Ninyi wise malyi kun dinyi ati, Er Imtamnyi biryi sun mabwe nermabwe asi wenerur,’ tenendarur.
Bok, ni tenenun ara, ‘Er Imtamnyi biryi sun ninyi wise asi wenena ara kikiman.’
Ba, sunci, ‘Nun malyito kunub ati wenebmasir,’ tenebkwanting to uca, ‘Sunsi wenena ara kikiman,’ tenenun.
20Ba, sun asing kobdob aryi sunsi orminingna dinyi yanganmote asing eibkwamating to sunsi wenena ara teleb.
Ani, Er Iya Mikibnyi biryi sunsi yu borur dinyi ara sun dam bordeirina ara kikiman.
21Sun sirya dibokingnyi ura, sun nermabwe ton kanya teneirdena kum kunung.
Ani, sun kam kun wala sirya kum daci ura, ‘Ni ai ninyi ton taklobman,’ ton kum tenenung.
22Ninyi bingna dinyi aryi Er Imtamnyi bisi eterebkwamating ara kikiman kubkwamate do?
Erci sun Er dam kuraming nang malaikat nang asi kikimanto kuboka wenerurnyi bisi, ‘Ato kubkwandum,’ erkarena ara ukubmanto do?
23-24Ton yuk nang sun nong ara kib kuronmangnyi bok,
mikib kibmaning dimdongnung.
Tonda, nong yok mikib tuba a kubmaci bok,
teleb aryi ur mangkau asa aryi dimdongnung.
25Ba, ton yuk nang ara kanya teleb kun dinyi ton kum kuranci tok asi dimdongnung.
Eda, u mambul doraming ani dimdongnung.
26Bok, sun a nirya ara tukwe borbosa umbura neiktoto mardeirbanung.
Asi, ku ab beici ab aryi sunsi amubloboka tangnung.
27Diba ati, sunci ni dam ebkwamarum uram ara, ‘Ato ebkwamang,’ tenen ni sirya bikmasin.
Ani, sunci nisi toltola uram enmanurum dinyi ara ni sirya bikmasin.
28Ara, sunci niti ato ebkwamanurum, ‘Mutuk talena mikib bon nang, kan kurum ato nang aryi doamingnyi ai ara dantam kurur do?
Tonda, yu dinyi kun nang aryi sun keis ol ai durubdeibdamingnyi ara iya ton kum kurur,’ ebkwamanurum ara ni sirya bikmasin.
29Sunda bukdob bingna dinyi ati yuk mutuk dam ingkiringbaraming nang asi ton kum asirdendarur darib?
Ton asibdeamunyi ura, sunci eamingnyi uram ara, ‘Ara, tola ati ebya,’ tenendarur do?
30Ara, sunci, ‘Sun yu dinyi ukuramingnyi nang ara wenen dinyi kum doronung.
Er Imtamnyi biryi sunsi yu boranci ati, wenenmaci tum ara sun damnyi lemdaronung,’ enung asi ton kekendarur do?
31Unanyi biryi sun yu kanya bon nang kun dinyi asi, ‘Malyito kurum,’ ebkwamote do?
Ani, unanyi biryi sun yu kuranting dinyi asi dekeiboka wenebkwamote do?
32Sun a kuramingnyi nang dibingnyi ura, boboka tukwe dongorbaraming.
Ani, tukwe dongoamingnyi ai ara kalikoka dirniliraming.
33Sun dibdoba tukwi bobanmangnyi ba, menengbaraming nang ara ninyi yubwa ara nukman kumto aryi menengbaraming.
Ani, ninyi ilinto aryi sunti boukwe boboka er bobanmangnyi aminda tam kuboka miliraming.
Ani, sun dibdoba tukwi ara tukwe umbura talyi deirirdongorbingnyi ura, tukwe mandibna aryi siklirdongoraming.
34Ati, sunci uram eboka dekeibmanurum uram a nirya ara toltola uram akwe ebmanurum aryok se.
Sunci nisi boukwe bormilin uram ebmanurum dinyi ara talyitam uram asi ebmanurum aryok se,”
ato eboka Ayub biryi er kwit yabwe asi uram dekeibmou.
Currently Selected:
Ayub Uram 21: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
