Ayub Uram 20
20
Ayub er kwit si Zofar biryi, “Sun malyi kun nang ara tiya ati teleb kurabingnyi ani, ola kum dandobkwaming,” ebmou uram deyok
20:1-29
1Ura, Ayub er kwit Naama ateinyi si Zofar biryi ato eboka Ayub bisi uram dekeibmou,
2-3“We Ayub a, niryi kekenmakin uca, kanci nibabyi ina ngilingmanirimci enmanirim uram kekebman.
Kanci uram eboka dengdeinmanirim uram ara, ‘Ato ati enmar,’ teneboka bikman kum uram asi erkarenmanirim.
Ati, ni kanyatam aryi kansi, ‘Uram ton ebdum,’ eboka arungmanir.
Ni kanyatam aryi lamabdongoboka bukman kum kunmanir. Ati, ni uram ton ebkwan.
4Kanda minob talak aryi kunuramwe dinyi ara kum bingdorum do?
Yuma kobdob Er Imtamnyi biryi ninyi kikniboka tukwetam kainmou uca, kunuamwe dinyi ara kan kum bingdum do?
5Ara, Er Imtamnyi uram asi kum kekerana ato kun nang ara sun kanya karyi kuboka mot semna dinyi ara tiya ati ukunung.
Sun malyi kanya bon nang kilkil kurur dinyi ara asing kublabumto aryi kum danan dinyi asi kunung.
6Sun dub ererdan dinyi ara im boliranci ababyi,
sun kisok wenerdaramingnyi dinyi imtam kurande duwa boliranci ababyi talyitam ukuraming.
7Bok, sun ato kun nang ara iya ati kum dankwaming.
Ba, sun wingdan kanya bon nang minob bingdamingnyi nang aryi yuk nang asi, ‘Anyi bira dantam binmar do?’ eboka asibtobkwaming.
8Sunda lengdera deib aryi ninyi urasin tiya ati lak kiabingnyi ani, tubto tunim ebdobci ba, tikabingnyi keta lak kum eiraming to kum danaronung.
Ani, lukunda talak kunumna deib aryi tiya lak kiabci ba, eiabingnyi ani kum danarorande to kunung.
9Ba, sun kam tuba kuramingnyi talak aryi asing eiriramingnyi nang ara sun urasin tubto kum eirinung.
Ba, sun kuramingnyi ai yandoka dinmangnyi uca, a kum kuranci asi sanglonung.
10Sun nai yabwe aryi utotoa kum nang dinyi asi ukula doramingnyi deyok aryi sun mabwe nermabwe ara iya mambul mitik kum dobkwanung.
Ba, ‘Sun bona bon kum nang aryi nunsi boukwe kibkwansunung,’ tenen ingkirikirikwanung.
Ato kuboka, sun nai yabwe aryi ukula doramingnyi dinyi ara sun mabwe taruk aryi tamubkarebkwanung.
11Sun wingdan nang ara mikib kibmaning kuramingnyi ababyi,
sirya dibingnyi ura, sun mikib ara sun nong ab tukwe umbura wengdoryurbinkwaming.
12Diba ati, yu uram ena ara sun teleb kurur.
Ba, yu uram ara sunci, ‘Minmin teleb dinyi ato kurur,’ tenenung.
13Sunda yu uram ena asi sun silalum dam ara minmin dinyi ato kimdur.
Ba, sunci deiblobman kum kurur.
14Uca, sun silalum dam ara minmin kiabci bok, mundu umbura maryurbici ura, sik kimdur.
Ara, kwatima tok iba ato kimdur.
15Erci ukula dobde yiranci yina ara tubto mundu lu tamuboka dungkarongdur.
Ara, Er Imtamnyi biryi er mundu umbura aryi dorkweterur.
16Ba, sunda kwatima tok iba yina asi sun teleb kurur.
Ati, sunci kwatima silalum aryi obkwande.
17Ba, me teleb u doboka anarande me ara sun kum yibdenkwaming.
Ani, minmin teleb erande me ara sun asing kum eibdenkwaming.
18Sunci bona talena tabakdongoboka doranci dinyi ara sun yina kum uca tamubkarebkwanung.
Sunci dekde yibaramingnyi dinyi ara sunci yiboka talena kum kubkwaming.
19Ara, sunci utotoa kum nang asi obsiniboka deirlonung deyok aryi sunci yina teleb ara kum yibkwaming.
Tonda, sunci kum doamingnyi ai bok yuk nang ai asi araboka kuroramingnyi deyok aryi sunda akai umbura iya kum kubkwaming.
20Diba ati, sun kanya dam ara ur mangkau kun dinyi ara ton kum kubkwande.
Ani, sun taleramingnyi bona talena boboka yuk ai kum inirorbinkwaming.
21Sunci yuk nang dinyi dobde yiroramingnyi ura, mangkau kun nang kimdamingnyi ani,
a dinyi kum daneibingnyi ura, tubto doboka kum yibkwaming.
22Sun bona talena lamtaleramingnyi ababyi sunsi mambul kimsininkwande.
Mambul weik dinyi aryi sunsi obminikwande.
23Sunci sun mundu bourkaren dinyi ati ingkiringnamingnyi talak aryi
Er Imtamnyi biryi yu weik kuboka sunsi wenebkwande.
Ara, a wenen dinyi aryi mo kuna a nang deici asi cebdeibkwande.
24Sunci kat dinyi besi aryi kikniraming mar taci urasin dam ara leibdobkwaming.
Bok, ton yuk kat dinyi si tembaga aryi kikniraming mar taci aryi sunsi kulubkwande.
25Asi a mar kwinirkarongnamingnyi uca amnyok tam kuboka anabkwande.
Ura, mil dangnande mar ara mite asi kuluboka anabkwande.
Ba, ‘Ni talya dibkwan,’ tenen ilil kubkwande.
26Kunuk dangna asi sunti kiknibdeibwe.
Uk buk aryi er ai ninyi ab er bona talena ab nirya yinmaci ura, tangabkabokman kum kubkwande.
27Im aryi sun malyi kun dinyi lak kibkwande.
Ba, tukwe aryi sunsi tatab-tatab ebdongobkwande.
28Sunci mambul kirikoka dororamingnyi dinyi ara sun ai umbura aryi me onmariryi, bobarande to kubkwande.
Sun bona talena nirya ara Er Imtamnyi biryi sunsi yu boranci dinyi labasinmaci tum aryi a bona talena nirya kum dankwande.
29Sun Er Imtamnyi uram kum kekerana ato kun nang asi Er Imtamnyi biryi sunsi ato kuboka dekeibkwande.
Ba, Er Imtamnyi biryi sunti uram ebdeianci ara wenen dinyi dobdobkwaming,” ebmou.
Currently Selected:
Ayub Uram 20: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
