Ayub Uram 19
19
Ayub biryi er lemdeirinanyi bisi dib tenebmou uram deyok
19:1-29
1-2Uca, Ayub biryi ato ebmou,
“Sunci ni kanya u yirminingnanumunyi ara uki unabaryi u yibminikwanurum do?
Ani, sun erandum uram aryi ni kanyatam orminingnindarura ara ton taklobkwanurum do?
3Ura, sunci nisi uram eboka ngilikde yanganindarur asi liki takubaryi kimbinmar.
Sun uram aryi nisi mambul bordeirinindarur ara sunda alyi ton kum kusurur aryok.
4Niryi dib kobdob ati, sangkuna malyi bisik baraniryi bisik iririkna dangyaniranyi ura,
sun ab camdanya kuma, ara ni malyi kun dinyi ni yuk kuraniryi.
5Sunda malyi dinyi kuna kum nang kiboka erebdeibdandobmunyi ura,
sunci niti, ‘Er mambul dorur ara er mining malyi kun dinyi aryi mambul dorura,’ tenenindarur.
6Bok, sun bita kanya teneibdemunyi ura diboka bikdarur. Er Imtamnyi biryi nisi weneboka mambul bordeinurur dinyi ara ni kunun to ati kikimanto kum kurdeirinurur.
Ani, Erci nisi mekinaia kwisib yamnaming to kuboka wenenurur ara ni kunun to dibdeboka kikimanto kum kunurur asi bikwandarur.
7Diba ati, niryi ngalukoka, ‘A dinyi ara yu dinyi asi ukurdeinurum,’ eboka uram doronun.
Uca, ni ngalungna ara Erci kum kekeana to kurongnurur.
Ba, niryi uram doboka Er Imtamnyi bisi, ‘We, ni lobdeibnurum,’ eboka uram doronun.
Bok, Erci ni uram dona kekeboka nisi kikimanto kuboka lemdeirinina ton kum kunurur.
8Ni yibindobmanto bisik ara Er Imtamnyi biryi lika doboka bisik sengminingnurur ba, ni yibindobman kum kunurur.
Ni yibindobmanto bisik ara Erci kunuk akwe dangminingnurur.
9Erci ni bona talena nirya kwiririm eboka dorkarongnurur.
Ani, yuk nang aryi ni si ererdeiriraning dinyi ara Erci malyi kimkarongnurur.
10Erci nisi ai ururuboka dangkarongnaming to kulab-kulab erongnurur uca, nira kum dandobkwan.
‘Nira kam taba kurmururonkwan,’ tenen dibde bunun dinyi asi Erci dorkarongdur ara bukanci co kwinirkarongnaming to kurkarongdur.
11Nira Er Imtamnyi biryi mar ordananyi kibdeiboknouci,
Erci nisi yu bonurur ara uk sin dam aryi anim-anim erande to kurur.
12Er Imtamnyi yin doun nang ara neik deici deiboka nisi iyanganunung.
Sunci nisi iyanganmaningiryi, lika baitam kuboka asi keis ol ai dobkinkanikingnyi ura, lika dub weleyankwamangnyi ati moromna kiknirminingnung.
Sirya atei lika dub weletingyangnyi ura, sunci nisi mar boboka ni kuron ai nirya dalurkarongnunung.
13Ba, ni du weit yabwe ara ni dam aryi yuk ai yangdonongdongdur.
Ba, ni ninyi bun ara nisi luba kimdongnunung.
14Ni ai ninyi ara ni dam ara sengdonunung.
Ba, ni kwit yabwe ara nira ton kanya teneirdenina kum uca, luba kimdongnunung.
15Niti yangaramnyi nang ab, ni ai wa irmiliranei nerabwe ab aryi nira sun kum bingdananyi bitonyi kimnunung.
Ani, nira, ‘Ninyi atei nang aca,’ tenenunung.
16Niryi ni wa irmilinanyi bisi namdonmanyi bok, erci nisi uram kaimnina kum kunurur.
Ba, niryi uram bouna nun yukdongoboka ersi olom-olom eronmanyi asi kum kekenurur.
17Ni si tong aryi ni mining ner ababyi dukmanto kururci, u kunkunubdobmaning kumto kurur.
Ba, ni tong enurur dinyi aryi nun neik mabur man nang ababyi dukmanto kunung.
18Ba, mitik-mitik mabwe aryi nisi ina ngilikoka kwarangdonunung.
Ba, niryi, ‘Tikoka yibindobkwan,’ tenen kunmanyi ura nisi akwe tuboka ngarangdoraning.
19Ni kwit yabwe kobdoba aryi nisi dinmaningnyi ura, sun duknasi kurur.
Ba, niryi boukwe kimdiranse nang ara danguboka nisi mar iroraning.
20Ni tub ara kum dandobnou ba, yok dem asi bol aryok libdongobnou.
Ba, nira dibkwamangnyi nang asi win tangkouk si deirande to kubnou.
21We, ni kwit yabwe se! Er Imtamnyi taruk aryi nisi ordeirongnanir.
Ati, sunci ni ton boukwe kibdobmanindarur se!
22Er Imtamnyi biryi nisi ororanir to sunbabyi nisi domkiringdoranurum aryok se?
Sun nisi weneroranurum ara ton kum bousurur do?
23Ah, ni mundu tulum uram enun a nirya yuk nang aryi iya kanya teneinkwanting to
kerek sengna umbura sekdongobting ura, kobokab.
24Ba, a kerek sengni dinyi ara kat aryi iya kubkwante to,
kat dinyi besi asi teleboka bitabdeiboka sekdongobting ura teleb.
25Ato ebni bok, ni Lebmanintonyi bira iya kam kururnyi kurura ni sirya bikman.
Akiryi aminda sirya kobdob malyi deyok lilibkwansir tum ara Erci tikalaboka niti libdobkwanir ca.
26Ni nong bol borbotom eboka tub dukde sangnanici ababyi,
ni tub kum dandoka yok dem takloanici ababyi aminda ara ni asing aryi Er Imtamnyi eibkwan.
27Ni asing kobdob aryi Erci ni tam makibdobnici asi asing eibkwan.
Yuk nang aryi sun eiamingnyi to ni dam nukingnyi asi kekebkwana kuma. Eda, ni asing kobdob aryi eibkwan.
Ba, nira, ‘Ni asing kobdob aryi eibtinyi,’ tenenun uca, ni kanya yanduk-yanduk enurur.
28Sunci niti, ‘A mabwa a, nunci una kuboka ersi tatab-tatab ebdongobibyi uca, er malyi kun dinyi lak kibte do?’ enunung.
Ato eboka tatabdongobmaninto uram ingkiringmamunyi ababyi kum dobkwandum.
29Sunda, Er Imtamnyi biryi Er yu dinyi aryi sun malyi kun nang asi wenebkwande ara ninyi on ya aryi douboka wenebkwande.
Er Imtamnyi biryi ninyi yuk-yuk kuramibyi tok diboka lilibsiriryok wenebkwansir dinyi ara sunbabyi bikwandum.
Ati, sunda ninyi on ya tuna aryi ninyi malyi kun nang obkwande dinyi asi ilil doronkwandarur!”
Ato eboka Ayub biryi er kwit yabwe asi uram ebkarebmou.
Currently Selected:
Ayub Uram 19: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
