Ayub Uram 2

Ninyi Durungnanyi biryi, “Ayub bira Er Imtamnyi urasintam aryi u dikum kun dinyi iya talebnurubdobkwande do?” tenen tubto ukubdenmou uram deyok

2:1-10

1Ton yuk uki tum aryi Er Iya Erebdobnyi biryi tubto Er amwetam kun nang nabmou ba, Er urasin dam buluryanmai. Ba, a buluryanmaia kankan ara Ninyi Durungnanyi bibabyi tubto Er Iya Erebdobnyi urasin dam yanmou. 2Ba, Er Iya Erebdobnyi biryi ersi asibdenmou. “Kanda dantam aryi yanandim da?” eboka asibdenmou. Uca, Ninyi Durungnanyi biryi Er Iya Erebdobnyi bisi ato eboka uram dekeibmou. “Nira im dangna mutuk tukwe dangna mutuk talyi lolongkiringdonun ani, Kan dam a yanan,” ebmou. 3Ura, Er Iya Erebdobnyi biryi Ninyi Durungnanyi bisi asibdenmou, “Kanda, Ni wa irmilinanyi Ayub kurur ara kan ton dirderum do? Tukwetam kunung nang nirya ara erci Nisi diboka dib tenenururci ninyi urasintam ababyi teleb dinyi akwe kunururnyi kurur ara kan ton eirirum do? Tonda, erci Nisi ilil kuboka malyi kun dinyi ara leimdorurur dinyi ara kanda ton eirirum do? Mintum ababyi Ayub er deyok ton kuna kum bok, kancok talyitam, ‘Erci Ayub bisi obminikte,’ teneboka Nisi arukmanoumwe ba, Niryi kansi lobdeibmakise. Uca, erci Nisi diboka dib tenerur dinyi ara ton lulungdena kum kubmou ara kanda ton eibumwe do kum do?” ebmou. 4Uca, Ninyi Durungnanyi biryi Er Iya Erebdobnyi bisi ato ebmou, ninyi ara sun kam kun dinyi asi kalikdandobingnyi ura, “Bona talena ara malyi ur a kum dananmarura. Eda, ni nong asi talya wanikdanyei ati diboka kalikdandobkwan,” teneraming. 5“Ati, ukura Kanci taruk donokokabtumci, er yok ab er nong ab asi u yibdeibdetum ura, erci tamuboka Kan urasin dam aryi Kansi si malyi kibkuturya,” eboka tatabmou. 6Ba, Er Iya Erebdobnyi biryi Ninyi Durungnanyi bisi ato ebmou, “Yo, ura Ayub bira kan kalingdum amwetam kurura. Ati, kan tenebdobmarim to ersi ur ukubderum. Eda, er nong kanya tentok asi kanci taruk donokoka ona mem,” ebmou. 7Ura, Ninyi Durungnanyi bira Er Iya Erebdobnyi urasin dam aryi anabkaboka bindobmou. Sirya bindobmou ura, Iblis biryi Ayub er nong a bobdamwe tok, kisok lu aryi kuboka yan tang a nirya ara susa aryi keil burdarande to kubdeibmou. Ba, susa bol akwe inten irande to kubmou. 8Ba, Ayub yibinman kum kubmou ura, er susa korokdan bunkwamwe ati, keil telebdoba doubdobmou ura, uk sikin dam asi iya bukmou.

9Asi er mining ner aryi ersi ato ebmou, “We, Ayub a, kanda Er Imtamnyi bisi dib tenerorum dinyi ara iya talebnurubdobkwandim do? Ton taklobokminyi ura, Ersi malyi kimaminyi ani dibokdum!” ebmou. 10Uca, Ayub biryi er ner asi ato eboka uram dekeibmou, “Kan ebmarim uram ara luba talebdob ninyi aryi eraming uram ato asi ebmarim! Nunda Er Imtamnyi biryi kareransir dinyi ara nun kanya teleb kusin dinyi akwe kum doronkwanub. Eda, nun kanya mambul kusin dinyi babyi kanya teleb kusin dinyi babyi nirya doronkwanub,” ebmou. A kubmou nirya ara Ayub er si bambul dam aryi malyi kun dinyi ton kum ebmou.

Ayub Er kwit yabwe aryi, “Ayub u yirur,” ena kekebmai ura, Ayub bisi diryanmai uram deyok

2:11-13

11Ayub er kwit yabwe ninyi winiryi nang aryi, Ayub er mambul mitik kum doramwe dinyi ab youn dororamwe dinyi ab kekebmai ura, sun atei yuk-yuk kuramnyi ai aryi diryanmai. Ara, Elifas bira atei si Teman atei kuramwe aryi yanmou. Ba, Bildad bira atei si Suah kuramwe aryi yanmou. Ba, Zofar bira atei si Naama kuramwe aryi yanmou. Sun winiryi nang nirya ara, “Nun weilyi, ‘Kan mambul borum dinyi ara nunbabyi boukwe bokunub. Ati, neik tum buramibyi ani binkwayeb,’ ebkwayeb,” tenen sun nirya neik kanya bobmaici diryanmai. 12Ura, yanganmai ani, yuk ai okiryi yandoka dinmai ura, “A bukmar ara er bukmar,” teneboka bingna kum kubmai. Ani, dam yandoka diramnyi uca, er nong bukmou asi eibmai ura, sun boukwe aryi ngalukoka engebmai. Tonda, sun ongon aling taruk talebdongoboka kwiliklobokmai. Ura, sici dobtaleboka im sukoka kisok dub ai yamubdeibdanmai. 13Ura, sun kwit ab tonkwa tukwe ai buramnyi ara kitingtam lukunda uki tabaryi bukmai. Ba, a talak ara sunci sun kwit diramnyi uca, er mambul doramwe dinyi ara iya mambul ilinto kuboka doramwe deyok aryi ninyi tentok aryi ersi uram ton onordena kum kubmai.

Currently Selected:

Ayub Uram 2: MTG

Highlight

Copy

Compare