Ayub Uram 3
3
Ayub biryi mambul kirikdanmou uram deyok
3:1-26
1Ayub ab, er kwit yabwe ab uram ena kumkum buramnyi ani, Ayub biryi uram dobdobmou ura, er deiamwe uki tum ati tulum doubmou.#Yer. 20:14-18 2-3Ura, erci ato eboka submou,
“We, ni deianou uki tum ara kum berekante ura teleb.
Ani, ninyi aryi ni kwin bisi, ‘Kan mi ara sal mi deibdobmarim,’ ebmai uki tum lukunda ara kum iniante ura teleb.
4Nai Imtamnyi, ni deirinin uki tum ara kum bingdarantinyi ura teleb.
Imtamnyi eitam kurumnyi, Kanci ni deirinin uki tum asi kanya teneirdeina kum kurantum ura teleb.
Ani, a uki tum asi berengna sinarya aryi berengdeina kum kuante ura teleb.
5Ni deirinin uki tum asi kunuk tilib talak dinyi aryi kilibkabokante ura teleb.
A uki tum asi sukun duwa ab mirin duwa ab aryi kalubdeiante ura teleb.
Kiting akuma aryi du kanya yakeiboka ilil kibsiante ura teleb.
6Ni kwin biryi ni deibmanou uki tum asi kunuk aryi siklibdeibokante ura teleb.
Ba, ni kubde binkwanse kwalina aryi ni deibmanou uki tum ati, kanya kilkil kum kunkwanute to kum daneiante ura teleb.
Ni deibmanou uki tum ara wala nungnamingnyi kankan dongobdongoboka kum nungkwantinyi to kum daneiante ura teleb.
7Yo, ni deibmanou uki tum lukunda ara ninyi yuk nang ton deibingnyei.
Ni deibmanou tum ara ninyi kanya kilkil aryi akwe ngarakingnyei.
8Ninyi imdan nang aryi ni deibmanou uki tum asi, ‘A uki ara berengna kum,’ eboka imdaanting ura teleb.
Sun ilila me kwan umbura marande kwatima si korotnyi bisi uram mirei eboka mouraming nang mikib aryi ni deirinin uki tum ababyi kum daneianting ura teleb.
9Berekdoroban toryangarande kurya ulul ara a uki tum ara kunuk dakante ura teleb.
A kurya aryi ni deibmanou uki tum asi milil kum arabdeiante ura teleb.
Ni deibmanou uki tum aryi berekwamariryi, im tongtong lingnande dinyi asi kum eiante ura teleb.
10Ara, ato ati ebman: Ni kum deibkwanute to ni kwin bisi mi kin aling tirikdongoante ura teleb.
Ba, ato kuante uca, ni mambul dinyi ni asing kum eirirantinyi ura teleb.
11We, unatoa ati, ni kwin biryi ni deinmanou tum aryi kum dibokanse do?
Kum, ni kwin mundu umbura aryi anamyanganmase tum aryi kum lubsakokanse do?
12Ni kwin bira unatoa ati, deiboka er keil deici irianou do?
Ani, ni kwin bira unatoa ati, moum boamwe ba, ni moum yianse do?
13Ni moum kum yiantinyi ura, a talak aryok sirya dibokantinyi.
Ba, uku talak ara nira wi teleb maroninto kuboka bita iya isin seboka mangkau marorantinyi.
14Nibabyi sun tukwetam weik sien nang ab sun uram dorkaren nang ab sirya dibokiryi marongnung to kubokantinyi ura teleb.
Ara, weik sien nang minob kun atei dakamwe asi tamuboka doramnyi nang dibokyi to dibokantinyi ura teleb.
15Kum, nibabyi weik sien nang kubokyi to kubokantinyi ura teleb.
Ara, sun dengna weik keil si emas ab perak ilinto taleramnyi nang wi mabokyi to nibabyi mabokantinyi ura teleb.
16Kum, nibabyi sun kwin yabwe mundu boamingnyi uca, iniboka mi yongkaraming mabwe ato kuanute ura teleb.
Kum, sun kwin yabwe deinmangnyi bok im lak kum eiraming mabwe ato kubokantinyi ura teleb.
17Din nang wengbaraming mutuk bakan ara malyi kun dinyi ilinto kuraming nang ababyi malyi kun dinyi tuba kum kurmurunung.
A mutuk dam ara mikib kum danarorande.
Ba, bita mundu loboka isin teboka mabde kuronung.
18Tonda, din nang kuraming ai ara yuk nang aryi arung-arung eramingnyi nang ara taba arung-arung ena kum kunung.
Il weik wa dimnamingci, uram bokom eboka erengnaming to taba kum ermurunung.
19A mutuk dam ara bona bon kum nang babyi bona bon nang babyi tonkwa antaniboka kunung ai.
Ani, ninyi wa irmilin nang aryi sun arungna nang deibloboka ur dem kunung ai.
20Bok, Er Imtamnyi bira unatoa ati, ni mambul doronun atoto nang asi berengna dinyi tuba karerongsurur do?
Ani, ni kanya u yironurur atoto nang asi kam kun dinyi tuba karerongsurur do?
21Nunci, ‘Ni ola diboktinyi,’ tenen dibde bunub bok, nun ola dimdongna kum kunub.
Nunci, ‘Ni ola dibokwanun,’ tenen ola dibminikdanmanto dinyi ati ingkiringdonub ara ninyi bona ingkiringnung to malyi kiboka weiktoto ingkiringnub.
22Ingkiringdoramibyi ani, tukwe ungdona wengdoryurbibyi ura,
nun kanya ara kilkil kuboka iya kanya teleb kuransir.
23Er Imtamnyi bira nun aminda kunubkwamibyi dinyi bingdona ara inirdeirongsurur.
Erci ni mambul doronun atoto nang nun bindobmanto bisik nirya sekdongoboka mar bosurur.
Ato kusurur cok unatoa ati isin nebneb en dinyi tuba karerongsurur do?
24Ara, ato ati ebman: Nira nibiramnyi mambul kiringdanun dinyi asi ni yina ato kimnun.
Ani, nibiramnyi mambul kirikdani bunun dinyi asi me lum kuna yibarmururanir ati ebman.
25Ni mining ilil kuranir dinyi nirya aryi nisi mambul borminingnurur.
Ni mining talema birinurur dinyi nirya aryi nisi mambul borminingnurur.
26Ni kunun ara namin dinyi ab mangkau dinyi ab ara ni ton kum bingnun.
Ni isin temdona ababyi ton kum kunun.
Eda, ni kanyatam ara mambul dinyi akwe ananurur,” ebmou.
Ara, Ayub biryi er deirin uki ati tulum doubmouci, sulukmouci ato ebmou.
Currently Selected:
Ayub Uram 3: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
