Ayub Uram 1

Ninyi Durungnanyi biryi, “Ayub er dib tenen dinyi ara tuba talebnurubdobkwande do?” tenen ukubdenmou uram deyok

1:1-12

1Mutuk si Us dam asi ninyi sal tentok kuramwe. Anyi er si ara Ayub kuramwe.#Why. 12:10; Luk. 2:1 Anyi bira Er Imtamnyi bisi diboka dib teneramuryi, ninyi urasintam ababyi sunglona kum uca u dikum dinyi akwe kunuramunyi kuramwe. Erda, Er Imtamnyi bisi ilil kuboka malyi kun dinyi ara, “Nai e, ni talya kubnyei,” tenen yuk ai kisirdonongnanyi kuramwe. 2Ayub er mabwe nermabwe deibdamwe ara takubaryi deibdamwe. Sal ara tabaryi deibdamwe ba, nermabwe ara winiryi deibdamwe akiryi antaniboka ara takubaryi deibdamwe. 3Ba, er bisam kambing ab domba ab ara 7.000 baryi winiramwe. Ba, unta ara 3.000 baryi winiramwe. Ba, er wa in bisam sapi ara 1.000 baryi winiramwe. Ba, keledai ara 500 baryi winiramwe. Ba, er wa irmiliramnyi ner sal ara ninyi yubwa mitik kum aryi wa irmiliramnyi. Er kuramwe atei yaletam mutuk kuramnyi bona bon nang kankan ara ersi bukdob bona bonanyi kuramwe.

4Ayub er mabwe ara yina kwaliboka yin li doboka, tuba-tuba tonyi li dobman tum tonyi li dobman tum kimdamnyi. Ba, sun malnerabwe ara yina me tonkwa yinkwamangnyi ati namdamnyi. 5Ba, Ayub er mabwe nermabwe yin li dobmangnyi ani, a uki sirya bisibci ura, er mabwe nermabwe naboka Er Imtamnyi bisi bisam oboka uk daboka molorlikniramwe. A yin li dobmangnyi tum mabman ani, ambutum toa bukokne ura, belekuna kobdob aryi er mabwe nermabwe kuramnyi to bisam ababyi oboka sun dama deiboka uk daramwe. Ara, er kanya ara ato teneramuryi, kuramwe. “Ni mabwe nermabwe aryi a yin li dobmang talak aryi sirya malyi kun dinyi kunmangci, sun kanya dam aryi ni Nai Imtamnyi bisi ina ngilingmangca,” teneboka bisam oboka uk daboka molorlikniramwe.

6Uki tentok tum aryi Er Iya Erebdobnyi biryi Er amwetam kun nang asi nabmou ba, Er dam buluryanmai. Ba, sun a buluryanmaia kankan ara Ninyi Durungnanyi bibabyi yanmou. 7Asi, Er Iya Erebdobnyi biryi ersi asibdenmou, “Kanda dantam aryi yanandim da?” eboka asibdenmou. Uca, Ninyi Durungnanyi biryi Er Iya Erebdobnyi bisi ato eboka uram dekeibmou, “Nira im dangna mutuk tukwe dangna mutuk talyi lolongkiringnun ani yanan,” ebmou. 8Ura, Er Iya Erebdobnyi biryi Ninyi Durungnanyi bisi, “Kanda, Ni wa irmilinanyi Ayub bira ton asing dirderum do? Tukwetam kunung nang nirya ara Ayub er kurur ato nang ton kum kunung. Erda Nisi diboka dib tenururci, ninyi urasintam ababyi teleb dinyi akwe kunururnyi kurur ara kan ton eirirum do? Tonda, erci Nisi ilil kuboka malyi kun dinyi ara leimdorur dinyi ara kan ton eirirum do?” eboka asibdenmou.

9Uca, Ninyi Durungnanyi biryi dangabkaboka Er Iya Erebdobnyi bisi ato eboka uram dekeibmou, “Kanci Ayub bisi bona talena ton kum karetum ba, dorote ura, erci Kansi ilil kukurur to ara iya ilil kubmurubkwamakute do? Ara, kum ukubkuturya.#Why. 12:10 10Kanci er nong ab er mabwe nermabwe ab er bona talena ab asi lika doboka aknardeirininto kurum. Ani, Kanci er wa irur dinyi asi kisal dangdum ba, er kurur mutuk dam ara erci talerur dinyi asi ilinto tabakdongoboka langkarikde sangdur. 11Ato kurur bok, Kanci taruk donokoka er talerur bona nirya dobdobtum ura, erci danguboka Kan urasin dam aryi ina ngilikoka malyi kibkuturya,” ebmou. 12Ba, Er Iya Erebdobnyi biryi Ninyi Durungnanyi bisi ato ebmou, “Yo, ura Ayub erci talerur bona ara Ninyi Durungnanyi kan mikib amwetam kubde ati, kanci a bona nirya ur kum daneibdum. Eda, er nong ara kanci taruk donokoka ona mem,” eboka lobdeibmou. Ura, Ninyi Durungnanyi bira Er Iya Erebdobnyi urasin dam aryi bindobmou.

Ayub er mabwe nermabwe ab, er bona talena ab kum daneibmou uram deyok

1:13-22

13Uku kunmai ani, uki tentok tum aryi Ayub mabwe nermabwe aryi yin li dobmaici sun du dunyi ai buluboka wekmaici yina yiboka anggur du yung me yinmai. 14Ura, Ayub er wa arungnanyi tentok Ayub dam yandoka ato ebmou, “Nai, nunda wa irmilin bisam yabwe lembu ab sapi ab bobmabci wa tukwe yaorbunmab ura, keledai ner bisam mer ara a dinatam asi mol kwabdeibmab ba, sungsunga yibde kunmang. 15Asi atei si Syeba nang yanmangci daluboka bisam mer araboka dobdobing ura, bisam kalingna nang yuk nang ara nirya ya sekoka obkiribmang. Bok, ni tentok asi lebdandobnaryi a deyok ati nai kan dam eryanman,” ebmou. 16Anyi tuba uram enmou bok, ton yuknyi biryi yandoka ato ebmou. “Nai, uk buk imtam aryi sakmararyi lengkerekoka bisam kambing ab, domba ab, a bisam kalingna nang ab nirya yaleboka yibkabokmar. Eda, ni tentok asi lebdandobmanaryi a deyok ati nai kan dam eryanman,” ebmou. 17Anyi uram tuba enmou bok, ninyi tentok yuknyi yandoka ato ebmou. “Nai, atei si Kasdim nang ninyi yubwa deici winiryi kiboka weleyanmangci bisam unta mer daluboka alaronmangci, a bisam kalingna nang ara ya ngang sekoka obsekmasing. Eda, ni tentok asi lebdandobmanaryi, nai kan dam eryanman,” ebmou. 18Anyi uram tuba enmou bok, ninyi tentok yuknyi yandoka ato ebmou. “Nai, kan mabwe nermabwe ara sun du dunyi atei yin li dobmangci, kwaning ab anggur me ab yinmang 19Asi, asing kublabumto aryi ibalya yinimwe tam aryi yandoka sun wekoka yinmang ai dalubmarci, sun bindobman bisik nirya libdongobmar. Ura, ai ururubsiniboka kan mabwe nermabwe nirya siklibmar ba, dibsekmang. Eda, ni tentok asi lebdandobmanaryi, nai kan dam eryanman,” ebmou.

20Ato ebmai asi kekebmou ura, Ayub er boukwe aryi tikokmou ura, er alib ongon aling ya tarakmouci, er kisok otong dilo kwabdanmou ura, kutam ikdongoboka ngang dakokmou. 21Ura, ato ebmou, “Ni kwin biryi ni deinmanou ura, utotoa ab laboka kum deianou, nong baning dem deianou. Ani, ni dibkwan ababyi utotoa boboka kum dibkwan. Ni Nai Iya Erebdobnyi biryi karenurur ani, ni Nai Iya Erebdobnyi biryi doronmar. Ati, niryi ni Nai Iya Erebdobnyi bisi si weik erebdeibkwan!” ebmou.

22Ura, a kubmou dinyi nirya ati Ayub biryi malyi kun dinyi ton kum kubmou. Ani, erci Er Imtamnyi bisi, “Atoto dinyi ara Kanci nisi kikiman kum dinyi karenuruma,” eboka Er Imtamnyi bisi kisirdongona kum kubmou.

Currently Selected:

Ayub Uram 1: MTG

Highlight

Copy

Compare