Ayub Uram 18
18
Ayub er kwit si Bildad biryi sun malyi kun nang asi wenen dinyi dobdobkwaming to ati ebmou uram deyok
18:1-21
1Ayub er kwit Suah ateinyi si Bildad biryi uram dobdobmou ura, ato ebmou,
2“We, Ayub a, kan uram sisingdum ara una talak aryi sirya sisingbinkwandim do?
Kanda kilikoka kekebde buksiminyi bok, nun uram ton ebkwayeb.
3Kanci nunti tenesurum ara, ‘Sunda bisam kanya bobdob nang kunung,’ tenesurum ara unatoa ati do?
Ani, ‘Sunda utotoa bingdona kum nang kununga,’ tenesurum ara unatoa ati do?
4Kan mining yu borum dinyi aryi kanbiramnyi orminingdarum.
Kan deyok ati, ‘Ayub er kurur to ara u dikum dinyi asi kunurur,’ tenen deyok aryi tukwetam nang nirya kum danabkwamote do?
Ani, kan kanya teleb kuna atikwe Er Imtamnyi biryi keil aryi sasiboka burur mutuk kon asi kisibdeibkwamote do?
5Sun malyi dinyi kun nang dam ara berengna milil dinyi iya kum abmurubkwandur, eda tangabkwandur.
Ani, uki buk angnanci dinyi ababyi iya kum abmurubkwande.
6Sun kuramingnyi ai umbura aranci berengna ara kunuk dakwande.
Ani, uk buk dinibdongoboka co lamna deici deirin dinyi ababyi tangabkwande.
7Mikib yaboka ola yibaramingnyi ababyi sikanun yibinkwanung.
Ani, sun mining yu kanya tenein dinyi aryi sunsi sakminikdankwaming.
8Ara, sunbiramnyi aryi ebdoba umbura yan dongobingnyi uca, youbkwandur.
Ani, tukwi ukoka co bok alib tekeiamingnyi deici yibangnyi ura, tukwe ungdona umbura sakwanung.
9Sun yan ara ebdoba umbura maknabdangnyi ba,
ebdoba aryi youboka botikwande.
10Sun yiban bisik ai asi tabwe tukwe deici iniboka eraming.
Sunti youbkwande tenen sun yibaramingnyi bisik eraming.
11Sun yu dinyi kuraming nang ara ilil kiminingna dinyi dantam bisik-dantam bisik nirya yandoka sunsi ilil kimsinirur.
Ani, sun yan donongni ai nirya domkiringdur.
12Mambul dinyi aryi sunsi milirkiringdur.
Orminingna dinyi aryi sun sakoka maryuryibana ati dibde burur.
13Sun bol ara u yin dinyi aryi yirkarongdur.
Ani, iya u ilinto youn aryi sun nong a nirya yirkarongdur.
14Sun ur mangkau kuroramingnyi asi dimna dinyi aryi sunsi kilirtalerur.
Ura, dimna dinyi aryi sunsi bobindoka, dimna nang tabwe deboka kalingdur sienyi dam deirirbarur.
15Ba, sun kuramingnyi ai ara sun wilimdanya kum nang aryi yandoka akai kunung.
Sun kuroramingnyi ai ara uk du tong malyi erande dinyi asi yamurdonongnung.
16Sun malyi kun nang ara tukwe ilim ai tingnande co aryi yalakoka koula danarande co ato nang kunung.
Yalakoka koula danarande co ara yating tukwe umbura oukiryi lubokabdiryi, te alibtam ababyi nirya yalakoka koula danarande ato nang kunung.
17Ba, sun malyi kun nang nirya kum dansekingnyi ura, yuk nang aryi, ‘Sunda a ton kuramnyi,’ tenen ton kanya teneirdena ara kum kunung.
Ani, atei keta bukoka sisingmangnyi ura, sun si ababyi ton kum si sinung.
18Sun malyi kun nang ara berengna dam aryi kunuk kankan yakdonokwande.
Ani, sunda tukwetam akiryi yuk ai yakdonokwande.
19Sun mabwe nermabwe ara ton tangdongna kum kubkwaming.
Ani, sun kisok deibunumna ababyi im dangna tukwe dangna nang kankan ara ton kum kubkwaming.
20Sun dibkwaming uki tum ati, Kitingbantam nang aryi, ‘Nai, nun ilil,’ tenebkwaming.
Ba, sun Yaletam nang ara sun ilil dobkwaming.
21Diba ati, sun yu dinyi ukuramingnyi nang atei ara kum dankwande.
Ani, sun Er Imtamnyi bisi bingna kum nang kun ai ara neiktoto kum dankwande,” ebmou.
Currently Selected:
Ayub Uram 18: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
