Ayub Uram 17
17
1Ayub biryi ato ton ebmurubmou,
“Ni kam kuron ibarya ara ura sirya kum danmanir.
Ni kam kun uki ara sirya kum danmanir.
Ani, ni dobdobkwaman ati kiknibdeibmanir dinyi ara tukwe ungdona umbura wengbinkwaman.
2Diba ati, nira yuk nang aryi ina ngilingna kimnunung.
Ba, sunci nisi kereroraning dinyi ara niryi yuk ai kebdobman kum aryi a kereroraning uram a nirya kekebde bunun.
3Nai, niryi diba ati ebman, Kan tentok asi ni kanya deirinanyi kurum.
Ninyi yuk nang aryi da ton niti milibdobkwamaning nang ton kum kunung.
4Ara, ato ati ebman. Kanci sun kanya ara sirya tirikdongobumwe ba, ato tenen dinyi ababyi ton kum boronung.
A deyok aryi sunci nisi uram muna ebmaninto dinyi ara Kanci bisik sengsinirum.
5Ninyi aryi ato enung, ‘Unanyi-unaner aryi, “Dengna co bok dobdobtinyi,” tenen ati, sun mining kwit yabwe, sun mining ka yabwe asi kikiramingnyi ura,
sun mabwe nermabwe ara asing oba lilibkwandur,’ enung.
6Ato enung bok, nira malyi dinyi ton kum kunun asi yuk nang aryi ninyi ilinto urasin dam asi ni deyok ati nukeiboka akwi tuna kimdeirinunung.
Ba, sunci niti malyi kimaningiryi, ni urasin si maka tulurdeirinunung.
7Ni kanya u yinurur deyok aryi ni asing ara kuna dangnurur.
Ba, ni nong bobdobse tok a nirya ara birbiryok ebnou.
8Sun u dikum kanya bon nang aryi nisi kubnou dinyi biknei ura sun kanya aryi, ‘Nai yabwe,’ tenenunung.
Ba, sun malyi dinyi ton kuna kum nang aryi nisi, asok kururuma doubdobningnyi ura, nisi, ‘Er Imtamnyi urasin dam lebesekoka malyi kurur deyok aryi wenen dinyi dobdobwe,’ tenenunung.
9Sunci nisi ato tenenunung bok, nun diboka u dikum dinyi akwe kunuramibyi nang ara iya u dikum bisik akwe yan yanirmurunkwayeb.
Ba, nun taruk dam malyi dinyi ton kurdena kum nang ara mikib yaboka iya teleb dinyi akwe kurmurunkwayeb.
10Bok, ni kwit yabwe sun winiryi nang nirya aryi nisi tubto tamuboka uram ebnindate ababyi,
niryi dibdesitinyi ura, sun kankan aryi etekdob kanya bonanyi ton kum eibkwamasitinyi.
11Ni kun uki ara sirya kum danmanir deyok aryi niryi, ‘Ato kubkwan-ato kubkwan,’ eboka kiknirminingnun dinyi ara kum kunubkwan.
Ani, ni kanya aryi, ‘Ukubkwan,’ tenen dibde bunun dinyi ababyi kum kunubkwande.
12Ni kwit yabwe aryi lukunda asi kitingtam ato kibminikmangci ato ebmang:
‘Kunuk kankan aryi berengna anamyankwamar,’ ebmang.
13Nira, ‘Din nang wengbaraming mutuk ara ni atei kibdobkwan,’ tenen dibde bunun.
Ani, ‘Kunuk kurur ai ara ni man sokon kiknibminiknou,’ tenenun.
14Ba, tukwe ungdona umbura asi ato enun, ‘Kanda ni nai kibkwankin,’ enun.
Ani, ku asi, ‘Sunda ni kwin yabwe, ni malnerabwe kibdobkwansin,’ enun.
15Ato enun ura, nira unatoa ati kam kun dinyi asi dibde bunkwamatinyi do?
Unanyi biryi ni aminda teleb kubkwantinyi dinyi eiboka bikwamanute do?
16Ni dibokniryi din nang wengyurbaraming ai wengyurbinyi ura,
‘Ni iya kam kurmururonkwan,’ tenenun dinyi ara iya kum tenebmurubkwan,” ebmou.
Currently Selected:
Ayub Uram 17: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
