Ayub Uram 16
16
Er Imtamnyi biryi Ayub er dam asi ukuramwe deyok ati mambul kirikdanmou uram deyok
16:1–17:16
1Ayub biryi er kwit Elifas uram ebmou dinyi kekebmou ura, erci tubto tamuboka ato eboka uram dekeibmou.
2“Elifas a, kan a ebmarim uram ato ara yuk nang ababyi enung ba, kekenun to asi ebmarim.
Sun uram endarur nirya ara, ‘Nun kwite se, nun uram aryi er kanya teleb kubdeibkwayeb,’ tenen enmanumunyi uca, kum, sun uram aryi nisi mambul dinyi tabak-tabak erdongorongnindarur.
3Ati, sunda talyitam uram akwe erondarur dinyi ara kum danana ton kum kusurur do?
Sunda unatoa ati, uram engkuma akwe eboka durungdongonindarur do?
4Sunda ni kunun ato kurandate ura,
nira sunci nisi enindarur ato uram kum ebkwamasitinyi.
Bok, niryi sunsi uram ebkwamasitinyi ura, uram teleb asi ebkwamasitinyi.
Ani, niryi sun kuansute dinyi eibsitinyi ura, eiboka ngang kum kwakubkwamasitinyi.
5Eda, ni uram ena aryi sunsi mikib kibkarebkwamasitinyi.
Ani, niryi sunsi diroryanmasitinyi ura, niryi sunsi kum durukwamasitinyi. Eda, ni uram ena aryi sunsi onoboka mikib kibkarebkwamasitinyi.
Ani, ni uram ena aryi sun kanya namibdeibkwamasitinyi.
6Bok, niryi uram enmanyi ura, ni mambul donun dinyi ara ton mitika tebum ena kum kunurur.
Ani, niryi uram kilikoka bukoknyi ura, mambul donun dinyi ara mitik ton louna kum kunurur.
7Ato kunurur bok asi, Er Imtamnyi biryi nisi iya mitang kimsininurur.
Ani, Erci ni ai ninyi nirya bokwalwalabsinibnou.
8Erci nisi mar bobnouci, taruk tabwe debnou.
Ba, ni nong ara iya yila biribnou ba, yuk nang aryi nisi, ‘Ara, malyi kubwe ati, Er Imtamnyi biryi ersi wenerur uca, er nong malyi dandoka yila biribwa,’ tenenunung.
9Er Imtamnyi yu aryi nisi talebdongoboka ni nong kwilik-kwilik erkarongnurur.
Erci nisi dibdenici ura, Er yu aryi si dararab erongnurur.
Ba, Erda ni mar boninanyi kiboka nisi dirderanir asing ara asing bilulukoka dirdenurur.
10Sun yuk nang aryi nisi uram eboka mar irdeirinunung.
Sun tonkwa antanibdobingnyi ura, nisi aknabdongoboka ina ngilingmaningiryi, nisi bongdonunung.
11Er Imtamnyi biryi nisi dobtaleboka sun yu ilinto nang dam dobkareboknou.
Ani, sun malyi dinyi kun nang taruk dam dobkweteboknou.
12Ni minob ura ur mangkau kuroranse bok, ukuryok ara Erci nisi kanya kankana kiminingnurur.
Erci ni ngang talebdongoboka tomoka ourlorongnurur.
Erci nisi mar orkelena kimdeirinurur.
13Erci nisi mar donurur ara ina koula danglon dam ato kurur.
Erci nisi boukwe ton teneirdenina kum uca, ni kiliruk kulurlorongnurur.
Ni mit dobtaleboka tulurlorongnurur.
14Erci nisi mar iyanganurur ara yin doun nang aryi ninyi obdankwamangiryi mar ibaraming to kuboka iyanganurur.
Ni nong tub a nirya ara Erci kwilik-kwilik erlorongnurur.
15Nira boukwe toto aling kolo kalubdake burongnun.
Ani, nira mikib kum aryi sici borbosa kankan asi burongnun.
16Ni engerona akwe kunun uca, ni urasin ara bi orobdobnou.
Ba, ni asing bam-bama neronurur.
17Diba ati, ni taruk dam aryi yu dinyi ara ton kum kunun.
Eda, niryi kunun ara Er Imtamnyi bisi telebto kuboka moloronun.
Bok asi, mambul dinyi bordeirirongnurura.
18We tukwe a, niryi malyi kun dinyi ton kum kunun ati, kanci ni ining sakmanici ara siklirdongonina mem.
Ani, ni ngalungna ara bisik sengsinina mem.
19Sun kekeranindarur, ukuryok a talak ababyi ni malyi kuna ton kum kunun dinyi bingnururnyi bira Imtamnyi kurur.
Ni kun dinyi limdoninanyi bira erebdob sokon ai burur.
20Ni mining kwit yabwe aryi nisi durungdoraningnyi ababyi,
nira engenmanyi deib aryi ni urasin ara Er Imtamnyi tam deirinun.
21Ba, Erci ni deyok ati libdobkwamanute.
Ara, tonyi biryi er kwit deyok ati, ‘Ni kwit,’ tenen limdorande to, Erci nisi libdobkwamanute.
A deyok aryi, ni urasin ara Er dam deirinun.
22Ara, ato ati ebman: Ni kam kun uki ara kwalina weik kum kwalibkwamab.
Nira binkwan bisik ara tubto tamuryangana kum kubkwan bisik asi lingbinkwaman ati ebman,” ebmou.
Currently Selected:
Ayub Uram 16: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
