Ayub Uram 15
15
Ayub Er kwit Elifas biryi, “Sun malyi dinyi kun nang ara iya dibkwaming,” ebmou uram deyok
15:1-35
1Ura, Ayub er kwit si Elifas bira Teman ateinyi biryi ato eboka Ayub bisi uram dekeibmou.
2“We Ayub a, sun bukdob bingna nang aryi yuk nang uram dekeibkwamangnyi ura, talyitam uram aryi eboka ton dengdeirinung do?
Ani, sun kanyatam asi kumwe dobtaleboka ton dongordongordanung do?
3Sunci ninyi erekdobkwamangnyi ura, kiknibman kum uram aryi eboka ton erengdonung do?
Ani, sunci bikdob kum uram aryi ton enung do?
4Ato ton kum enung bok asi, kanda talyitam uram eboka Er Imtamnyi bisi ilil kun bisik sengsinirdarorum.
Ani, kanci Ersi, ‘Ni Nai,’ tenen Er si weik eren dinyi mitik kimsinirdarorum.
5Kan mining uram erum biriman aryi kan malyi kurum dinyi asi lak kiminingkurur.
Ani, kan mining silalum leberengkaningdum dinyi aryi kan malyi kurum dinyi inirdarorum.
6Niryi kansi, ‘Kanda malyi kurumnyi,’ kum ebmakin.
Eda, kan mining si bambul dam anakurur uram aryi kan malyi kun dinyi lak kiminingdarum.
Ani, kan mining si umbura aryi anakurur uram aryi lak kimkurur.
7We Ayub a, kanda yuma kobdobnyi deibmakou do?
A kum ura, mutuk kiknina kabul talak ara kansi minob kiknibmakou do?
8Kum, Er Imtamnyi biryi, ‘Ato kubkwan,’ eboka uram sisikoka dobde deirinmou tum ara kan kekenmoumwe bok dobde deirinmou do?
Ani, bingna dinyi ara kan yuk ton dororum darib?
9Nun kum bingnub dinyi ara una dinyi asi kan yuk bingdum do?
Ani, una dinyi asi kan yuk, ‘Ato kurur,’ tenerum ura, nunda ato kum tenenub do?
10Nun kankan ara iya wise dandoka kul deirirur nang ababyi a kunung.
Ani, kan nai deirina kabul talak aryi deiamnyi nang ababyi a tuba kunung.
11Er Imtamnyi biryi kansi onoboka kanya mikib kimdeirikurur dinyi ara mitikanun darib?
Ani, nunci Erti uram erlikninmabibiryi kan dam asi uram mitanganun enuba ara sukdob toto kimdur darib?
12Kanda unatoa ati, kan mining kanya aryi me boboka wamlirande to kurminingkurur do?
Ani, kan asing ara unatoa ati, bi ororokurur do?
13Ato kukurur deyok aryi kan kanya danguboka Er Imtamnyi uram asi dangardonongdum.
Ani, kan uram erum dinyi ara Er Imtamnyi bisi malyi kimni uram akwe erum.
14Ninyi kunub ara ur teleb dinyi akwe kunun nang ton kunub darib?
Nun nerabwe aryi deirisunung nang ara Er Imtamnyi urasin dam ara diboka u dikum dinyi kunun nang ton kum kunub darib?
15Diba ati, Er Imtamnyi biryi wibmouci, Er ai dam imtam kunungci, Er amwetam kun nang ababyi sunsi kanya ton kum deirirur.
Imtam kurur dinyi ababyi Er asing donongna ara teleb dinyi ton kum kurur.
16Ati, nun ninyi tukwetam nang ara wanok, iya duknasi keica atoto nang ab sembengca alibdob nang ab akwe kunub.
Ani, malyi kun dinyi asi me yininto kunub nang ara wanok iya malyi nang kunub.
17We, Ayub a, niryi yuk uram ton eboka kansi lak eterebkwankin ati, nisi kekeranurum.
Ani, niryi eibmanto kan dam nukwan ati kekerandum.
18Ara, sun bukdob dinyi bingna nang aryi eterebnei to asi ebkwaman.
Ara, bukdob dinyi bingna nang sun abwe yabwe aryi ton inirdongona kum uca lak nukde yangaramnyi dinyi asi ni dam nukyi to asi kan dam nukwaman.
19Nun abwe yabwe aryi nukde yangaramnyi bukdob bingna dinyi ara Er Imtamnyi biryi a mutuk kweibdeboka kaiamuryi, kareamwe uram akwe ebde yangaramnyi.
Ba, yuk mutuk nang aryi tingyandoka ukuryok bingna dinyi ara talbalirdongona ton kum kuramnyi bukdob bingni dinyi asi niryi ebkwaman.
20Sun malyi kun nang ara sun kam kuramingnyi talak nirya ara mambul dinyi doronung.
Ani, sun yu dinyi akwe kuramingnyi nang ababyi neiktoto sun kuramingnyi talak a nirya ara sunti kiknibdob dinyi wenen dinyi doronung.
21Sun yu dinyi kuramingnyi to asi sun kanya ara akikwe teneim-teneim eramingnyi deyok aryi sun ilil kurur.
Ba, ur mangkau kuronmangnyi talak ara ukula arabde don nang sun atei wengyanganung.
22Sun kuron uki nirya ara ninyi aryi, ‘Obkwanub,’ tenen ya iboka domkiringnung.
Ba, sunci, ‘Kunuk dam aryi tubto tamuboka yandobkwamanca,’ tenen dinyi ton kum kurur.
23Sunci yuk mutuk-yuk mutuk yibinkirikoka yina ingkiringkiringnamingnyi ababyi,
sun damnang aryi, ‘Kunuk weik uki tum aryi nunti dibde busurur,’ tenen sirya bingdanung.
24Sunsi mambul dinyi kibsinibci ba, sisikoka ukubman kum aryi ilil kiminingdur.
Mambul dinyi yangarur ba, ilil kurur ara weik sienyi er yin doun nang ab mar boyangaraming ba, ninyi ilil kurande ato kurur.
25Ara, sun Er Imtamnyi bisi mar boramingnyi deyok aryi mambul kimsinirur.
Ani, sunci Er Iya Mikibnyi biti, ‘Nun li,’ teneboka Ersi lebesengna nang ara ato kurur.
26Sun wingdan kanya boboka Er Imtamnyi bisi mar boraming nang ara ato kurur.
Ani, kat ilinto ting ongobdobninto kuboka daibwe birirongnamingnyi nang asi kunuk dangminingdur.
27Ba, sun minta yo dinyi tula kirikde yiraming nang ara ilil dobkwaming.
Ani, sun minta-minta dinyi yina aryi mundu dingdaranci nang ara ilil dobkwaming.
28Sun ato kuraming nang ara sirya dalubkaamingnyi atei keta asi kubkwaming.
Ani, ninyi ton kuna kum ai asi kubkwaming.
Ara, Er Imtamnyi biryi, ‘Akatei ara dakabokwan,’ teneamwe atei asi kubkwaming.
29Sun talenung bona-bona ara iya kum talebmurubkwaming.
Ani, sun bona talena nirya ara tukwetam akiryi ton tabangdongon dinyi ton kum talebkwaming.
30Sunda kunuk mutuk dam bakan ara sunsi lemdeina ton kum kubkwaming.
Sunda co kaibwa ara uk aryi yalangsinirande to kubkwande.
Ani, sunda Er Imtamnyi isin aryi kum daneibkwande.
31Diba kum dinyi aryi sunsi eboka youninto kubcei.
Ati, sunci dib kum dinyi asi diba tenen kanyi deirina mem.
32Sunda sun din uki kum kimbinmaribok, dibkwaming.
Ani, sun deibdoba nirya ara ton yaldangtabangna kum kubkwaming.
33Sunda co anggur aryi du yalyi dongona kum co aryi kulubde sangnande co ato nang kubkwaming.
Ani, sunda co zaitun keta talyi kulubde sangnande ato nang kubkwaming.
34Ara, sun malyi kun nang deici aryi tenebmangnyi dinyi ara kum kunubkwande.
Ani, sun, ‘Ni malyi dinyi ara siklibkwansurur,’ tenen karen dengna aryi doraming nang ai ara uk nirya yibkwande.
35Sunda malyi dinyi asi nerabwe mundu boraming to kuamingnyi ani, mi deiriraming to ara yu dinyi asi deirinung.
Ba, sun kanyatam ara tola uram en dinyi akwe bonung,” ebmou.
Currently Selected:
Ayub Uram 15: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
