Ayub Uram 14
14
Ayub biryi, “Ninyi kam kun uki ara bumanganun kurur,” ebmou uram deyok
14:1-22
1Ayub biryi ato ebmou, “Nun ninyi nerabwe mer aryi deirisunung nang nirya nun kam kun uki ara bumanganun dangdongosurur.
Ani, mambul dinyi ara langkarikoka mitik kum donub.
2Ninyi kam kunub ara co keta aryi tiya ati oabci ani, tuboka ola kulursangnande ato nang kunub.
Ani, kukumna aryi tiya lak kiabci ani, kum danarorande to kunub.
3Nai Imtamnyi, Kanda unatoa ati, ni mambul doronunyi bisi iya dirmurunurum do?
Ani, Kanci nisi boboka Kan deyok lilin ai deirbindoka deyok lilibkwanirim do?
4Nun ninyi kunub ara iya malyi kun dinyi aryi akabkaboka iya teleb dinyi kibdeibkwamatibyi nang ton kunub do?
Nun ninyi sirik ara ninyi tentok ababyi ato kubmanto nang iya ton kum kunub.
5Kanci ninyi kam kursungban uki sirya lingdeirirum.
Ani, sun kursungban wala sirya kunurdeirirum.
Tonda, Kanci, ‘Anyi-a ner ara ukuboka kurbinkwande,’ eboka sirya doboka deiaminyi ura, sunci uki ton bisirongna kum kunung.
6Nunci teleb kuboka dikdik sebdobkwayeb ati, Kanci nunsi dumyangasina mem. Kanci kan urasin danguboka yuk tam deibdum.
Ba, nun kanya teleb kusina ara sun il weik wa iramingnyi nang aryi dengna dobdobingnyi tum aryi sun kanya kilkil kurande uki tum ato kusina teleb.
7Ara, ato deyok ati ebman. Co kwemnaming ara aminda unubkwanci dinyi ton a kurur.
Co kweamingnyi ura, kaibwe silikoka kweamingnyi co atoa ton unurande.
Ba, a co kaibwe abci ura, weikanun artabangnande.
8A kweamingnyi co ara yating tukwe umbura dianci dinyi ababyi lurande.
A co sasa tukwe umbura ababyi lurande.
9Asi aminda tam aryi yating ton da yuk ai binanci ani, me bolibci ura, tubto luk deiboka anarande.
A co luk deibci ura, weik dandoka te dikoka kwalengdarande.
10Bok, ninyi dibingnyi ura, tubto kam bukoka yangana ton kum kunung. Eda, a kunum iya dimdongnung.
Ani, ninyi dibingnyi ura, sun banung ai ara nun kum bingnub.
11Nun ninyi kunub ara me kwan deici aryi ito dorwelerande ato kunub.
Ani, yibaranci me asi cebmuliling eboka kum danarorande to kunub.
12Ato kuboka ninyi marbingnyi ura, tubto kam bukoka yangarona ton kum kunung.
Ani, sun din nang ara im ab tukwe ab a tuba kuanci ura, sunci kalingdarona ton kum kunung.
Ani, marbinamingnyi ai akiryi tubto kam burongna ton kum kunung.
13We, Kanci nisi dobtaleboka din nang wengbaraming mutuk bakan asi inibdeibnurum.
Inibdeiboka kalingnaniminyi ani, Kan yu wekankici kum dankwankir.
Ani, Kanci niti tubto kanya teneibdenkwanirim uki yuk wibdeibnurum.
14Ninyi dimnung nang ara tubto kam bukoka ton yanganung do?
Ukuramingnyi ura, ni mambul doranyi talak ara nibabyi dibde kunkwan.
Dibde kuranyi ani, ni uki kimbici tum ara nibabyi ukubkwan.
15Ura, Kanda, Kan taruk aryi kiknibmoumwe dinyi boukwe kimdumnyi kurum.
Ati, Kanci nisi nabniminyi ura, niryi uram kaibkwankin.
16Diba ati, Kanci ni yan irongna ara dibniliboka nungnurum.
Bok, niryi malyi kun dinyi ara Kanci ton kum dibnilibkwanurum.
17Niryi sangkuna Kan uram asi lebesekoka malyi kuranyi ura, Kanci kiliboka luba kibkwanirim.
Niryi sangkuna malyi kuranyi ura, Kanci siklibdongobkwanirim.
18Bok, nun ninyi dibde bunub dinyi ara mutuk kon dub aryi daluboka sangdur to kurdeirisurum.
Ani, keil aryi sasiboka bukanci mutuk asi a bukanci ai aryi kisiboka yuk ai burbarande to kurdeirisurum.
19Keil asi me onmariryi, ngingnande to kurdeirisurum.
Ani, tukwetam mutuk asi mo weik cemaci tum aryi mulikoka borande to kurdeirisurum.
Ato kuboka ninyi aryi, ‘Ni iya kam kuronkwan,’ tenenub dinyi asi kum danardeirisurum.
20Kanci iya mikib ting eboka sun ninyi asi malyi kimdum ba, sunda barsengdonung.
Kanci sun ninyi urasin ara dangubdeiboka yangdonongdum.
21Sun diamingnyi nang ara sun mabwe nermabwe kam tuba kuramingnyi nang dinyi ara kanya kum teneirdenung.
Ara, sun mabwe nermabwe asi si ererdeiramingnyi dinyi ara sun kum bingnung.
Tonda, sun mabwe nermabwe asi yuk nang aryi ina ngilingdororaming ara sun kum bingnung.
22Eda, sunda nong bol u ati mambul don dinyi dem akwe dobde maroninto kunung.
Ani, sunda sun kuron dinyi ati, mambul kirikdandoka engen kanya bobde maroninto kuronung,” ebmou.
Currently Selected:
Ayub Uram 14: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
