Ayub Uram 13
13
Ayub biryi Er Imtamnyi urasin dam asi uram eboka libdandobmou uram deyok
13:1-28
1Ayub biryi ato ebmou, “Ura, diba ati, nunci sisikde yanmab dinyi a nirya ara ni asing kobdob aryi sirya eibman.
Ani, ni amol kobdob aryi sirya kekeboka diboka bikatabman.
2Sun bingdarur dinyi ara nibabyi bingnun.
Sunda ni bingna dinyi bisibkaboka iya bukdob bingdarur dinyi ton kum kurur.
3Bok, ‘Nira, Er Iya Mikibnyi bisi uram sisikwaman,’ tenebman.
Nira, ‘Ni deyok ati, nibiramnyi ni Nai Imtamnyi urasin dam asi uram eboka libdandobkwan,’ tenebman.
4Niryi ato ebman ara Er Imtamnyi bira dibnyi kurur bok, sunda tola uram en nang kundarur.
Sunda ninyi kweten nang aryi u yin nang kwetebkwamangnyi ati, yangaraming to kubmarum.
Bok, sunci nisi ni u kwetena kareninto kunmanurumci, enmarum uram aryi nisi boukwe boboka kum kwetebdobmanurum.
5Sunda uram ton erdena kum uca, ur dem kilikoka bukokdaute ura,
niryi, ‘Ara, bikdobto dinyi kubmang,’ tenebkwamasitinyi.
6Sunda niryi libdandobkwamanci, ebkwaman uram asi kekenmanindarur.
Ani, sun uram ena ati, tataboka durukwamasin asi dinmanindarur.
7Sunci, ‘Nunda, Er Imtamnyi uram dib uram deyok asi ebmab,’ erdanmarum bok, sunda tola asi ebmarum.
Ati, sunci Er Imtamnyi dinyi ati, toltola uram aryi ebkwamarum dinyi ara kiknibkwamasir do?
8Sunci Ersi kanya teleb kurdeiriramunyi dinyi lak kimna ati, Er tam makibdomunci,
nisi uram tataboka durukdongobkwamanurumara ara kiknibkwamasir do?
9Erci sun malyi kun dinyi lilisute ura, teleb kun dinyi sun dam ton eibkwamasute do?
Sunci yuk nang asi tola eboka inirdarandum to Ersi tola eboka inibdankwamandaute do?
10Sunci iniboka-iniboka Er Imtamnyi bisi kanya teleb kimdeirin nang kimdaramunyi ura,
Erci sunsi iya weik wenena aryi wenebkwansir.
11Er Imtamnyi bira iya weiknyi kurur dinyi ara sunda ilil ton kum kusurur do?
Ani, ‘Erda ilil,’ tenenanyi kurur urasin dam kuna ara sunda sirim ton kum talesurur do?
12Sunci yan memen uram erandum dinyi ara tukwe borbosa aryi bololom ersangnande ato uram asi erandum.
Ba, sunci limdaron uram erandum dinyi ara ngat tukwe aryi oursangnande ato uram asi erandum.
13Ati, sunda nisi kekenindarur, nira ni mining uram ena aryi ikin dinyi ni dam douryanici ababyi malyi a kubnurura.
Ni uram ebkwaman ati sunda kilikoka kekebde buknindarur.
14Ni mining damnyi uram ena aryi obminikdandobnyi ababyi malyi.
Tonda, ni kanya wanikminikdandobnyi ababyi ni teleb aryi ukubnuna.
15Sunci a uram asi diboka bikwandarur.
Erci ni nong obkwanute ababyi niryi yuk dinyi ton dibde buna kum kunun ati, a onmanute ababyi teleba.
Ato kubmar bok, niryi Er urasin dam bindoka ni damnyi libdandobkwaman.
16Niryi ilil kum asa aryi kaibkaboka Er dam bindobnyi dinyi aryi ni damnyi lebdandobkwaman.
Bok, sun malyi kun nang ara kaibkaboka Er urasin dam binman kum kurur.
17Ni uram enman dinyi asi diboka-diboka kekebdarur.
Ani, niryi lak lilirdeirinman uram asi diboka diblilibkwandarur.
18Diboka kekenindarur. Ni deyok ati uram ebkwan to ara ni sirya kiknibdobman.
Nira ni damnyi sirya bikdandobman.
Ara, Er Imtamnyi biryi nisi, ‘Kanda malyi kurumnyi,’ eboka kisibdongobmaninto dinyi ton kum kubmanir ni sirya bikdanman.
19Unanyi biryi ni ab ton uram eboka tatabdankwamatinimnyi do?
A tum aryok niryi uram kilikoka dibokwamanuna.
20Niryi Nai Imtamnyi, Kan urasin dam kum inibdandobkwan.
Ati, niryi Kansi a bitinyi molobman dinyi asi kunubdeibnurum.
21Kan taruk aryi nisi mambul dinyi bordeiranirim dinyi ara taklobnurum.
Ani, Kanci nisi ilil tenen dinyi aryi bordeiranirima ara mem.
22Kanci nisi naboka uram ur ebdenurum ba, niryi Kansi uram dekeibkwankin.
A kum ura, niryi Kansi uram ebnyi ura, Kanci nisi uram dekeibnurum.
23Niryi Er Imtamnyi urasintam asi ato ebkwan, ‘Niryi, Imtamnyi, Kan urasin dam asi malyi kurdongonun dinyi ara unabaryi do?
Niryi Kan uram dangbisinunci malyi kunun dinyi asi, “Kanda, Ni uram ara ato dakbisiboka malyi kurum,” eboka lak ebnurum,’ ebkwan.
24Kan urasin ara ni dam aryi inirdarorum ara unatoa ati do?
Kanci nisi Kan ab mar ordananyi bitonyi kibdeiboknoumwa ara unatoa ati kubnoumwe do?
25Nira co bok kumwe aryi borkengnande atonyi kuronun asi Kanci nisi sirim talerminingnurum.
Ani, gandum du kwaning kala lokdoba kumwe aryi borkengnande atonyi kuronun ati unato ati Kanci nisi domkiringnurum do?
26Ara, ato ati ebman. Kanci niti, ‘U sik weik dobkwande,’ tenen sirya dobdeibnoumwe to aryi u dononun.
Imtamnyi Kanci nisi wenenurum ara ni kabir nenmase talak aryi kuranse malyi kun dinyi ati wenenurum do?
27Kanci ni yan dobtaleboka besi tabwe aryi demdongoraming to kunurum.
Ni lulungdongna nirya ara Kanci dirlinirongnurum.
Ani, ni yan yanibmanto ai a nirya Kanci taci-taci dinyi ingdeirinurum.
28Ba, a ukurdeirinurum dinyi nirya ara sun yuk nang urasintam ara nira lun co atonyi kunun.
Ani, kerbea aryi kwilikoka yirande ongon aling kwilikdoba atonyi kuronun,” ebmou.
Currently Selected:
Ayub Uram 13: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
