Ayub Uram 12
12
Ayub biryi Er Imtamnyi mikib ab, Er Imtamnyi bukdob bingna dinyi ab ati, “Diba,” eboka lak ebmou uram deyok
12:1-25
1Ayub biryi er kwit Zofar uram ebmou ati ato eboka uram dekeibmou.
2“Yo, sunda, ‘Nunsi ara bingna nang kunub,’ tenerdandarur nang dika ara sun ton a bukmarum atiba.
Tonda, ‘Sun yuk bukdob bingna nang ara sirya dibsekyi,’ tenendarur darib?
3Sunbabyi bikdob kanya bondarur to nibabyi a bonun.
Ati, sun bingna dinyi aryi ni bingna dinyi asi mitik kum kibnindate.
Ani, sunbabyi bikdob kanya bondarur to ninyi nirya ababyi bikdob kanya a bonung.
4Nira Er Imtamnyi bisi uram doboka molororanse ura, Erci ni uram dengdeiriranou.
Ba, niryi Ersi molobdobmanyi to kuboka dororanse.
Uca, ukuryok ara ni mining ai ninyi aryi nisi akwi tununung.
Nira u dikum dinyi kununyi bisi yuk nang aryi tatabmaning kumnyi kunun bok asi, sun malyi kun nang aryi sun akwi tuna kimdeirinunung.
5Sun teleb aryi mangkau kurondarur nang aryi
ni mambul doronunyi bisi ina ngilingnindarur.
Ani, ni ilabkaboka sakmanto kununyi bisi sunci kulanindarur.
6Bok, sun yuk nang dinyi asi ukula araboka don nang ara ur mangkau asa akwe kuronung.
Ani, sun Er Imtamnyi bisi yu kiminingnung nang ara ur teleb akwe kuronung.
Tonda, ‘Nunda Er Imtamnyi bito nang kunuba,’ teneboka ererdandarur nang ababyi teleb asa kurondarur.
7Bok, a mi Zofar a, kanci yuk kamyoa asi asibdetum ura, Er Imtamnyi deyok ati sunci kansi eterebkwamakitinga.
Ba, imtam langlang eryibarande maka asi asibdetum ura, sunci Er Imtamnyi deyok ati lak ebkwamakiting.
8A kum ura, kanci tukwe asi uram eboka asibdetum ura, erci kansi lak kiboka eterebkuturya.
Ani, weik me kwan umbura kurur mekinaia aryi kansi nukarebkuturya.
9Anda kamyoa nirya aryi una dinyi asi
Er Iya Erebdobnyi taruk mikib aryi ukutotoa nirya kiknibmoua kum bingnung do?
10Utotoa lulungnande dinyi nirya ara Er Imtamnyi taruk mikib dam kunung ara una dinyi asi sun kum bingnung do?
Ani, ninyi isin nebneb en dinyi ara Er taruk dam kunuba ara una dinyi aryi sun kum bingnung do?
11Ninyi silalum aryi yina yibdeboka to teleb dinyi babyi malyi dinyi babyi bingnaming.
Ani, ninyi amol aryi yuk nang uram si konga kekeboka, ‘A uram eande ara uram teleb eande. Ba, a uram eande ara malyi eande,’ teneraming.
Ato kuboka ninyi nirya ara teleb dinyi babyi, malyi dinyi babyi kununa ara yuk-yuk bingnung.
12-13Ninyi ara ato enung, ‘Bukdob bingna dinyi ara ninyi wise dam asi kurur,’ enung.
Bok, iya bukdob bingna dinyi ab mikib dinyi ab ara Er Imtamnyi iya kam kururnyi dam asi kurur.
Tonda, Er Imtamnyi bisi diboka lilirdeirin dinyi ab bikdob dinyi ab borurnyi kurur.
14Ati, nun ninyi ara Er Imtamnyi biryi dalubsinianci ai ara tubto tamuboka dobmanto nang ton kum kunub.
Ani, Erci ninyi tentok asi tabwe deanciobura, anyi bisi lebdeibmanto nang ton kum kunub.
15Erci me ibdongobmaci ura, me nirya cebdobkwandur.
Ba, Erci me kukdongobci ura, mutuk nirya me oboka yibkwandur.
16Er Imtamnyi bira iya mikibnyi kurur.
Ani, tonda Erda ninyi yuk nang asi muna ordongon mikib borurnyi kurur.
Sun tola uram en nang ab, tola uram ena aryi bowaningminingna nang ab sun nirya ara Erci wenebkwande nang akwe kunung.
17Erci sun tukwetam mutuk talen weik sien nang ab sun uram dorkaren nang ab asi kanya walwal kibsiniboka alyi kimdeirirur.
Ani, sun malyi kuna deyok lilin nang asi Erci walwal nang kimdeirirur.
18Ba, sun tukwetam weik sien nang aryi tabwe demnung nang asi Er Imtamnyi biryi lordeirirur.
Ura, sun weik sien nang asi Erci tabwe demdeirirur.
19Er Imtamnyi biryi sun ninyi dama deirin nang imam nang kuramingnyi asi dobkweteboka alyi kimsinirur.
Ani, sun mikib sasibdob nang ara Erci dalukoka mardeirirur.
20Sun uram sisingna bikamingnyi nang ara Erci uram kum danardeirirur.
Ani, sun atei dua kibdob nang bingna dinyi ara kum danardeirirur.
21Sun atei nunukoka si ererdeiriramingnyi nang asi Erci alyi kimdeirirur.
Ani, sun mikib nang kimdaramingnyi dinyi ara dorkarongdur.
22Kunuk kankan iniboka kurande dinyi ara Erci lak kimdeirirur.
Ani, kunuk tilib ilinto kurande ai ara Erci sinarya urungdeirirur.
23Sun im dangna nang tukwe dangna mutuk nang asi ninyi ilinto kibdeibmaci ani, tubto kum danardeirirur.
Ani, yuk atei nang-yuk atei nang asi ninyi ilinto danabdeibmaci ani, Erci daluboka yuk mutuk yangdonongdur.
24Sun tukwetam ninyi bobde menengna nang kanya asi Erci waningminingsinirur.
Ani, sun bindobmanto bisik ara Erci kum daneibci ba, dungkankaningdanung.
25Sunci berengna kum ai, kunuk kankan asi talerbisinung.
Ani, Erci sunsi walina me yibmangnyi ba, dokoka wali-wali eryibaraminga ato nang kurdeirur ba, dokoka wali-wali eryibanung,” ebmou.
Currently Selected:
Ayub Uram 12: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
