Ayub Uram 11
11
Ayub er kwit si Zofar biryi Ayub bisi ebmou uram deyok
11:1-20
1Ura, Naama ateinyi si Zofar biryi uram dobdobmou ura, Ayub bisi ato ebmou,
2“We, Ayub a, kanda uram mandibna sisingduma ara nunci tamuboka kansi uram kum dekeibkwankunub darib?
Kan si angdongna ilinto angdongdumnyi uram erum ati, nunda yuk nang aryi kanti, ‘Malyi dinyi kum kunurur,’ ebkwamakitibyi do?
3Ayub a, kan tenesurum ara, ‘Sunci ni enun uram ara dekeibmaning kum,’ tenesurum do?
Ani, Kanci nunsi durungdongosurum ara,
nunda ur dem kekeboka burlonkwanub do?
4Kanci Er Imtamnyi bisi ato ebmoumwe, ‘Ni tenen dinyi asi ara diba, tola dinyi kuma.
Ani, nira Imtamnyi, Kan urasin dam kunun ara sunglona kum uca lek kanya akwe bobde kunun,’ ebmoumwe.
5Bok, niryi tenekunun ara Er Imtamnyi biryi kansi uram ekina teleb.
Ani, Erci uram doboka kansi erkarekina teleb.
6Ani, Er Imtamnyi biryi bukdob bingna dinyi kan dam lak kibdeibkici ura, bukdob bingna dinyi iniboka mitik kum kurur dinyi ababyi bikdobkwandim.
Ara, Er Imtamnyi biryi kan malyi kurum dinyi ara ton nungdekina kum kukurur dinyi asi bikdobkwandim.
A bikdobkwandim dinyi ara ninyi aryi ola bikman kumto dinyi kurur asi, kan dam lak kimdeikina teleb.
7Er Imtamnyi inibdeianci bingna dinyi ara kanda bingdum darib?
Ani, Er Iya Mikibnyi mikib kursungbarur ai ara kanci liliboka lak kimdeirirum darib?
8Er mikib dinyi ara imtam bisirur dinyi ara kanda una kuboka talebkwamatum do?
Ba, Er mikib dinyi ara ninyi din nang wengbaraming mutuk bakan bisiboka eratoto kurur ara kanci bikwamatum do?
9Ani, tukwetam mutuk bukoka likwa kiklina ara bisibkaboka iya mikibnyi kurur.
Ani, Er mikib dinyi asi temda kiklina aryi weik me kwan deibwa temda ara bisibkaboka iya mikibnyi kurur.
10Er Imtamnyi biryi kansi taruk tabwe deboka deyok lilin ai bobanmakute ura,
unanyi biryi ilil kum asa aryi Ersi bisik sekwamote do?
11Ara, ato deyok ati ebman. Sun tola uram en nang ara Erci bingdur to kanbabyi Er bingkurur.
Ani, sunci yu dinyi ukuraminga ara Er urasin dam aryi leiboka yuk ai kunung dinyi ton kum kurur.
12Bai bisam keledai aryi ninyi mi kum deibte.
A neiktoto, sun walwal nang aryi bukdob dinyi bingna nang kum kibkwamating.
13Bok, Ayub a, kanda kan walwal dinyi takloboktum ura,
kan taruk lakoka Ersi molobdobkwamatum.
14Kanci yu dinyi kuraminyi ara bai donokoktum.
Ani, tonda malyi kun dinyi ara kan ai umbura dam aryi yakdonokoktum.
15Ato kubtum ucab, kanci malyi kun dinyi kuna kumnyi kikniboka alyi kum asa aryi asok ereboka dibdenkwamatum ara kiboka kubkwamatum.
Ani, kanci darabdongoboka tikwamatum ani, ilil kum kubkwamakute.
16Ba, kan malyi kun dinyi bai donokminyi ura, kanda kisal dangna dinyi dobdobkwandim.
Ba, kan mambul dorandim dinyi ara luba kibokwandum.
Ato kubminyi ura, kan mambul doraminyi dinyi ara me obmaci dilaka dem eiraming ato kubkwandum.
17Kan aminda kubkwandim uki ara kitingtam berengnande berengna ara bisibkaboka iya berengna dinyi dobdobkwandim.
Ba, lukunda ara ibna talak berengnande ato kubkwankir.
18Kanci, ‘Aminda talak ara teleb dinyi kunubdeibkwanir,’ tenen deyok aryi dibde bunkwandum.
Ba, sirya kunubdeibkici ura, kanda ur mangkau asa kubdobkwandim.
Ani, kanci kan kuraminyi ai a nirya dibkankanikdeminyi ba, teleb akwe kubci eibminyi ura,
ur mangkau asa aryi maboka bukoka kibkwandim.
19Kan wi mabkwandim ai ara yuk nang aryi dumderyangana ton kum kubkwanking.
Eda, ninyi ilinto ara kansi kanyi deiboka kan tam dem urasin deibkwaming.
20Bok, sun yu dinyi akwe kuraming nang ara sun asing oba lilibkwande.
Ba, sunda cukoka lemdarorbana kum kubkwaming.
Sun walwal kubci ba, buklobkwaming nang ara, ‘Ola diboktibyi,’ tenen dibde bukwaming,” ebmou.
Currently Selected:
Ayub Uram 11: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
