Hakim-hakim Uram 9

Er Abimelekh Sikhem mutuk sienyi kibmou deyok

9:1-49

1Gideon si akwe Yerubaal, er mi Abimelekh biryi er kwin yala ai nang nirya asi Sikhem atei dam bindoka ato ebmou, 2“Sikhem atei nang asi ato ebdarur, ‘Sunda Yerubaal mabwe 70 baryi nang aryi talebkwansing do? Tentoknyi biryi talebkwansir do? Nira sun ining kunun ara ton bikamuncok ebmar,’ ebdarur,” ebmou. 3Ura, er kwin er malnang aryi a deyok asi Sikhem atei nang dam nirya ebde yibinmai. Ba, sunci, “Abimelekh biryi nunsi talebkwansir,” tenebmaici, “Abimelekh bira nun ining aca,” ebmai. 4A sirya ebmai ura, sunci Abimelekh bisi keil perak aryi kikniamnyi uang 70 baryi kwemdeina si Baal-Berit molon ai aryi doboka karebmai. Ura, a keil uang ara wa diboka ina kum uca, talyitam kuramnyi ninyi asi, er milibmai nang dekwamou ati keil uang karebmai. 5Ura, er Abimelekh anaboka er nai atei si Ofra dam binmou. Bindoka, Yerubaal mabwe yubwa 70 baryi nirya, er weit yabwe er du yabwe asi tentok keil deici aryi obukmou. Bok, Yotam kelenyi bira inibdobmou aryi kum obmou.

6Ukubmou ura, Sikhem atei ninyi nirya ab, Bet-Milo ninyi nirya ab Bet-Milo dam akwe bulubmai. Ura, co tarbantin deyok dam Abimelekh bisi weik sienyi tingdeirbinmai. A dikum ara Sikhem dam teneirden dinyi kikniamnyi keica dam asi tingdeirbinmai.

7A deyok ara Yotam bisi ebmai ba, kekebmou ura, mutuk kon si Gerizim dub welebindoka tikmouci, uram dobmou. Ara, sunsi ato ebmou, “Sikhem atei nang a, Er Imtamnyi biryi kekenkwamasir ati, ni uram kekenmandarur e!” eboka uram dobmou. 8Ura, kebdeiboka ato ebmou, “Co yubwa aryi sun sienyi kiboka talebmantonyi tingdeirirbinmatingiryi, co zaitun bisi ato ebting, ‘Kanda nun sienyi kiboka talebsurum,’ ebting. 9Uca, a co zaitun aryi sunsi ato ebdur e, ‘Er Imtamnyi ab, ninyi ab asi kanya teleb kimna me bok asi, co dubdub talyi da kengkeng erandur e?’ 10Uca, yuk-yuk co aryi kwarang bisi ato ebnunge, ‘Nunsi sienyi kimyasurum!’ ebnunge. 11Ebingnyi uca, co kwarang biryi sunsi ato ebdur e, ‘Ni du teleb ab, ni yung minmin ab aia kuna talyitam takloboka, yuk-yuk co dub asi kengkeng ebtinyi do?’ ebdur e. 12Ura, yuk-yuk co yubwa aryi co anggur asi, ‘Nun sienyi kibsurum!’ ebnunge. 13Uca, a co anggur aryi, ‘Ni du teleb ab ni yung minmin ab ara Er Imtamnyi babyi, ninyi babyi kanya teleb kimna co yung bobse. Ati, ni yung aia kuna talyi yuk-yuk co dub kengkeng ebtinyi do?’ ebdur e. 14Ba, a co yubwa aryi tiling co asi ato ebnunge, ‘Nun sienyi kibsurum!’ ebnunge. 15Uca, a tiling co aryi a co yubwa asi ato ebdur e, ‘Sunci nisi me kisok likoka dib sienyi tikeibkwanumunyi ura, ur ni boukwe dam wengyandarur. Kum tikeibkwanumunyi ura, tiling co deici aryi uk aboka Libanon kon kurur co nirya yaliboka yibkwande,’ ebdur e,” ebmou. Ara, Yotam biryi Sikhem nang asi ato eboka nunung nukdeibmou.

16Ura, dikum uram ara ato ebmou, “A deyok aryi ukura sun kanya teleb kuboka Abimelekh bisi sun sienyi tikeibdobmandaturyi, ni nai Yerubaal-Gideon er ai ninyi asi kibmandate ura, moubmandate. Ara, ni nai sun deyok ati, il doransou dinyi ati dengninto kubmandate ara kikiman. 17Ni nai Gideon biryi sunsi lebdobkwansou ati, Midian nang mar boramwe. Uca, ni nai kam kun dinyi wanikdanamwe ara teneirdena kum kubdau. 18Ato kubwe bok, ukura sunda ni nai er mabwe asi mar iboka, er mabwe 70 baryi asi tentok keil dub aryi obdau ara malyito kubdau. Ani, Abimelekh bira ni nai er ner aminda dortabangni ner aryi deiamwe mi aryi, Sikhem ninyi sienyi kibmasir. Ara, erda sun weit kobdoba deyok aryi sun sienyi kibmasir. 19Ati, ni nai Yerubaal-Gideon ab, er mabwe ab ati, kanya deiboka teleb kuransici ura, Abimelekh ab, sun ab ur kanya deibdandoka teleb asa da kurandarur. 20Ucab, ato kum kuramunyi ura, Abimelekh deici aryi uk buk aboka Sikhem atei kunung ninyi ab, Bet-Milo atei kunung ninyi ab nirya uk yaliboka yibkwande. Ani, tamuboka Bet-Milo atei ninyi deici ab, Sikhem atei ninyi deici ab aryi uk abci dinyi ara Abimelekh erbabyi yaliboka yibkwande,” ebmou. 21Er Yotam bira Abimelekh weit kuramwe deyok aryi ato tenebmou, “Nun weit yabwe silib nirya asi mar ibsou bok asi, uram karebman ati, ni du Abimelekh biryi obneicei,” tenen cukoka Beer mutuk bindoka kuroramwe.

22Abimelekh biryi Israel ninyi weik sienyi kiamuryi, kwalina winiryi taleamwe. 23Taleamwe bok, Er Imtamnyi biryi Sikhem nang ab, er Abimelekh ab asi mar ibdeibmou ba, mar ibdanmai. Ura, Abimelekh bisi kanya kum deibmaici, yu bobmai. 24Ato kubdeibmou ara Yerubaal-Gideon mabwe 70 baryi nang asi, sun du Abimelekh ab, Sikhem nang ab aryi oamnyi dinyi kisok dakwamnyi ati yu dinyi kibdeibmou. 25Ato kuboka mar ibdanmaici, Sikhem ninyi ara Abimelekh bisi, “Obkwayeb,” tenen mutuk kon dam bisik tingnamnyi. Ba, yuk ninyi a bisik yibaronmangnyi ninyi ara taleboka sun bona daluroramnyi. Ato kuramnyi deyok ara Abimelekh bisi, “Ukunung,” ebmai ba, kekebmou.

26A talak aryi Ebed mi Gaal ab, er du weit yabwe ab Sikhem mutuk tingdorbinamnyi. Ba, Sikhem mutuk nang nirya ersi bikataamnyi. 27Akiryi sun anggur wa dam binmai ura, anggur du dakmaici, yung uruboka weik li dobmai. Ara, yina yiboka, me yiboka kwemdeina molon ai umbura wekmaici, Abimelekh bisi, “Dibdur!” eboka submai. 28Submai ura, Ebed mi Gaal biryi ato ebmou, “Abimelekh bira unatonyi nun kurur ati, nunda er wa irmilin nang kibdeibsou do? Erda Yerubaal-Gideon mi kurur atikwe, erebdobnyi kuma. Eda, Zebul bira er amwetamnyi kurur. Sun Sikhem er nai Hemor deibdoba nang ara Abimelekh wa irmilin nang kibman kum. 29Ati, nisi sienyi kiboka Sikhem atei nang taleantinyi ura, Abimelekh bira dobkweteantinyi,” ebmou. Ura, erci Abimelekh tam asi ato eboka uram dobmou, “Kan ab, kan yin doun nang ab mikib dongoronmamunyi ani, mar iyanindarur e! Mar iyanindarur e!” eboka uram dobmou. 30Uram dobmou ba, Zebul Sikhem atei sienyi kiamunyi kekenmou uca, Ebed mi Gaal uram donmou asi kekebmou ura, er yu wekmou. 31Ura, Zebul biryi ninyi ton wiboka mutuk si Aruma dam Abimelekh bisi bokeibmou. Ura, ato ebdeibmou, “Ebed mi Gaal ab, er du weit yabwe ab iyankwamakingci, Sikhem atei ninyi asi yandoka bul yungdongonmang. 32Ba, sun ab tonkwa kansi iyanganmaking ati, kan ab kan atei ninyi ab lukunda kobdob anaboka, minob mutuk wa dam asi bindoka bisik marorbindarur. 33Mabmamunyi ani, berekci ba, kiting ururuk en ara Sikhem atei mar ibinkundarur. Ibamunyi ba, er Gaal ab, er atei nang ab iyangasingnyi ura, sunci ukubkub teneabmunyi to kuboka obkwandarur,” ebmou.

34A deyok aryi Abimelekh ab, er atei nang milibmai nang ab lukunda kobdob anabmai. Ura, Sikhem atei dina-dina aknabkwamai ninyi deici dumbaryi wibmaici, minob Sikhem atei aknaboka bisik tingbinmai. 35Bindoka bisik kalikmai asi Ebed mi Gaal ab, er milibmai nang ab ara Sikhem atei lika bublan dam tingyangai. Ba, Abimelekh ab, er atei nang ab ababyi bisik kalikmaia dam aryi anaboka bublan dam tingbinmai. 36Gaal biryi ninyi iyanganmai asing eibmou ura, Zebul bisi ato ebmou, “Ninyi ilinto mutuk kon aryi ei yuryanganmang dibderum,” ebmou. Uca, Zebul biryi, “Mutuk kukumna ati, ‘Ninyi aca,’ tenen enmarim do?” ebmou. 37Uca, Gaal biryi tubto, “Ninyi ilinto mutuk kon bukwe deyok bisik ton, co tarbantin kankan kunurdein mutuk bisik ton yanganmang dibdendarur,” ebmou. 38Ato, ebmou bok, Zebul biryi ersi ato ebmou, “Kancok tola ati enmarim. Abimelekh bira unanyi, bitonyi biti er wa irmilin nang kibkwantibyi da? A nang ara kan malyi kimkunung nang a kunum yanganmang ati ibirum,” ebmou. 39Ba, Gaal bira menekoka Abimelekh bisi mar ibinmou ba, Sikhem atei nang ara mar dobmiliboka aminda tikmai. 40Uca, Abimelekh biryi Gaal bisi dombinmou ba, Gaal menekoka cungdorbinmou. Ba, yuk nang ilinto asi akatei bisik wengbana lika bublan dam aryi bindoka obukmai. 41Ani, Abimelekh bira atei si Aruma a kuramwe. Uca, Zebul biryi Gaal ab, er du weit yabwe ab yakdonokmou deyok aryi Sikhem dam kum kuramnyi.

42-43Mabmai ani, berekmou ura, a weik atei Sikhem ninyi nirya, wa in dam binmai. Ura, Abimelekh kekenmou uca, “A weik atei ninyi nirya wa dam binmang,” ena kekebmou ura, er atei ninyi yin doun nang boboka olong winiryi wibmou. Ura, anaboka wa dam mar ibinmai. Bindoka bisik ibmai dam aryi diramnyi uca, a weik atei ninyi atei aryi anaboka, yangai asi daluboka nirya obkiribmou. 44Er Abimelekh ab, er milibmai yin doun nang ab ara ola anaboka weik atei lika bublan dam mar ibinmai. Ba, ton yin doun nang olong bitinyi ara wa dam dombindoka orbinmai. 45A tum berekmoua nirya ara Abimelekh biryi a weik atei ninyi asi mar bobmou. Mar bobmouci, ninyi nirya obkiriboka akatei arabdobmou. Ani, akatei dakiriboka atei urana garam yamubmou.#9:45 Urana garam yamubmai ara, “Ninyi yina ab, bisam yina ab utotoa nirya lukluk ebde ana kum uca yalkwandura,” tenen ato kubmai.

46Ba, Menara-Sikhem ninyi kekenmai uca, “Abimelekh biryi weik atei Sikhem ninyi obkiriboka arabdobmar,” ena kekebmai. Ura, Menara-Sikhem atei ninyi a kuramnyi tok nirya anaboka, sun kwemdeina si El-Berit moloramnyi ai keil siling umbura inirorbinmai. 47Uca, Abimelekh dam asi, “Menara-Sikhem nang nirya kwemdeina molon keil siling um wengbinmang,” ebmai. 48Ura, Abimelekh ab, er milibmai yin doun nang nirya ab ara mutuk si Zalmon kon welebinmai. Ura, Abimelekh bira ya kala aryi co toukwe seksek eboka dakmouci, takuboka boyanmou. Ura, er ab tonkwa kunmai yin doun nang nirya asi, “Ni kubmanto, sunbabyi ola co borbindoka yandarur,” ebmou. 49Ba, sunbabyi Abimelekh kubmou to, co toukwe sekoka bobmai ura, er banmou to milibmai. Milibmai ani, sirya binmai ura, Menara-Sikhem ninyi ner sal wekmai keil siling um bublan dam asi bobindoka deibmaici uk sekmai. Ukuboka uk sekmai ba, Menara-Sikhem ninyi ner sal yubwa 1.000 baryi dibsekmai.

Keil aryi Abimelekh tolobmou ba, dibmou deyok

9:50-57

50Abimelekh biryi sirya uk dongobmou ura, muruboka Tebes atei bindoka mar bobmou. 51Uca, a weik atei noutam asi kat keil aryi ilila ai nun dukdandoka doamnyi aryi, Tebes nang nirya wengyandoka bublan dakdongoboka, akatei dub weleboka imtam lamna akwe inibsekdobmai. 52Ba, Abimelekh bira, “Ninyi obkwan,” tenen cukoka a wekdobmai atei bublan dam ibinmou. Bindoka, “Uk dabkwan,” tenen tingbau. 53Asi, ner tentok aryi roti kiknin keica gandum teingna keil dobkwetebmou. Ba, Abimelekh kisok tam yandoka toloboka donokmou. 54Ura, Abimelekh biryi er milinanyi ninyi on ya bobmounyi bisi ato ebmou. “Yuk ninyi aryi nisi, ‘Ner aryi obwe,’ ebningnyei ati, a doubmarim ninyi on ya aryi nisi lukoka obnurum!” ebmou. Ba, a milinanyi er ninyi on ya doubmoua aryi Abimelekh bisi lukoka obmou ba, dibmou. 55Ura, sun Israel ninyi dinmai uca, Abimelekh sirya dibmou asing eibmai ura, sun atei bindobmai. 56Ara, Abimelekh biryi er nai mabwe yubwa 70 baryi nang asi neik keil dub aryi oamnyi ati, erbabyi Er Iya Erebdobnyi biryi kisok dakmou. 57Ani, Sikhem ninyi ababyi, sunci malyito dinyi kunuramnyi deyok aryi, Er Iya Erebdobnyi biryi sunbabyi submou. A dinyi ara Gideon mi Yotam biryi minob ukubkwaming eboka suamwe to kunubmou.

Currently Selected:

Hakim-hakim Uram 9: MTG

Highlight

Copy

Compare