Hakim-hakim Uram 10
10
Tola deyok
10:1-2
1Abimelekh sirya dibmou ura, Isakhar yalanyi si Dodo mi Pua biryi mi si Tola deiamwe. Ura, Tola biryi Israel nang malyi deyok liliboka kalingnanyi kiamuryi, sunsi lebdeibmou. Erda Efraim mutuk kon Samir dam asi kuramwe. 2Ura, erci malyi deyok liliboka kalingnanyi kiboka kwalina 23 baryi Israel nang taleamwe. Ani, dibmou ba, Samir dam tukwe dongobmai.
Yair deyok
10:3-5
3Tola sirya dibmou ura, Gileadnyi si Yair biryi Israel nang asi kwalina 22 baryi, malyi deyok lilinanyi kiboka kalingnamwe. 4Ba, er mabwe ara sal akwe 30 baryi deiamwe. A mabwe ara bisam keledai yim deici akwe bukoka yiban nang kiamnyi. Tonda sun weik atei ababyi 30 baryi taleamnyi. A mutuk ara ukubabyi Hawot-Yair enung, ara Gilead mutuk dam asi bukwe. 5Yair bira kuramwe ani, dibmou ura, Kamon dam asi tukwe dongobmai.
Israel nang asi Amon nang aryi malyi kibmai deyok
10:6-18
6Ura, Israel nang aryi Er Iya Erebdobnyi urasintam asi malyi dinyi tubto kuramnyi. Ara, sunci kwemdeina si Baal ab, Asytoret ab asi moloramnyi. Ara, Aram nang kwemdeina ab, Sidon nang kwemdeina ab, Moab nang kwemdeina ab, Amon deibdoba nang kwemdeina ab, Filistin nang kwemdeina ab sun moloramnyi dinyi asi Israel nang ababyi moloramnyi. Uca, Er Iya Erebdobnyi bisi molona ara kum kuramiryi, deibloamnyi. 7Ba, Er Iya Erebdobnyi biryi Israel nang asi ikin weik dinyi karebmou. Ara, Israel nang asi Filistin nang ab, Amon yala nang ab taruk dam dobkarebmou. 8A kwalina talak aryi Israel nang asi malyi kiboka yanisitamdamnyi. Ara, kwalina 18 baryi Israel nang asi me Yordan kitingbantam kouboka Gilead mutuk dam Amori yala nang kankan kuramnyi uki nirya ara Filistin nang ab, Amon yala nang ab aryi sun Israel nang asi yanisitamnamnyi. 9Ani, tonda Amon yala nang aryi Yordan kouboka atam kuramnyi nang asi mar bobmai. Ara, Yehuda yala nang ab, Benyamin yala nang ab, Efraim deibdoba nang ab asi mar bobmai. Ato kuramnyi ba, sun Israel nang nirya sun kanya mambul weik kuramwe.
10Ura, Israel nang aryi Er Iya Erebdobnyi bisi ato eboka molobmai, “Nunci Kansi malyi kibdongobkoubwe. Ara, nunci nun Nai Imtamnyi Kansi takloboka yuk kwemdeina dinyi asi molonub,” ebmai. 11Uca, Er Iya Erebdobnyi biryi Israel nang asi, “Sun abwe yabwe asi Mesir nang taruk dam ab, Amori nang taruk dam ab, Amon nang taruk dam ab, Filistin nang taruk dam ab, 12Sidon nang taruk dam ab, Amalek nang taruk dam ab, Maon nang taruk dam ab aryi malyi kimdansei talak aryi Nisi molobmanindau ba, Niryi sunsi kum lebdeiansise darib? 13Ati, sunci Nisi deibloboka yuk kwemdeina dinyi molondarur. A deyok aryi Niryi sunsi tubto lemdeina kum kubkwansin. 14Ati, sunci sun wibdobdau kwemdeina dinyi asi molororbindarur. Ba, sun molorondarur dinyi aryi sun mambul kubsici dinyi lebdeibkwansir,” ebmou. 15Uca, Israel nang aryi Er Iya Erebdobnyi bisi ato ebmai, “Yo Nai, diba nunci Kansi malyi dinyi sirya kunuboubwe ati, teleb aryi Kan tenebminyi to ur kunubdeibsurum. Ucab, arub tum atikwe lebdeibokabsiminyi ani se,” ebmai. 16Ato ebmai ura, sun moloramnyi kwemdeina dinyi sun kankan dam aryi deiblobmai ura, Er Iya Erebdobnyi bisi molobmai. Ba, Er Iya Erebdobnyi Er kanya kataboka, “Sun yuk mambul a donmanung,” tenen kum taklobmou.
17A ordanmai talak aryok Amon nang ara bindobmaici, anaboka Gilead dam yandoka keis ol ai dobmai. Ba, Israel nang ara Mizpa dam ai dobkwabmaici, bulunmai. 18Bok, Israel nang asi Gilead mutuk kuramnyi sien nang aryi sun mamun asibdanmai, “Unanyi biryi akata kuboka Amon nang ab obdankwabmang do? Anyi bira Gilead sienyi kibkwandur,” ebmai.
Currently Selected:
Hakim-hakim Uram 10: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
