Hakim-hakim Uram 5
5
Debora ab Barak ab aryi ninyi kasun mot sebmarei deyok
5:1-31
1A tum aryi Debora ab, Abinoam mi Barak ab aryi ninyi kasubmareici mot ato eboka sebmarei,
2“Israel yin doun nang anaboka mar ibanung. Talyi nang ababyi mundu loboka anaronung.
Akiryi, Er Iya Erebdobnyi bisi si weik eboka mot sebnim.
3Sien nang-sien nang ab, bisik menengna nang ab se! Sun amol biti takeiboka kekendarur.
Nunci, nun Israel ninyi molonubnyi, Er Iya Erebdobnyi, bisi kisal dangna mot sebkwinim.
4Nai Iya Erebdobnyi Kan Seir dam aryi anaboka
Edom dam baminyi ura,
tukwe lulungdur, im botorur.
Ani, duwa ababyi nunurur.
5Mutuk Sinai dub Er Iya Erebdobnyi dam aryi mutuk lulungdur.
Israel nang nun molonubnyi Er Iya Erebdobnyi urasin dam aryi lulungdur.
6Anat mi Samgar sienyi kuramwe talak babyi,
Heber ner Yael kuramwe talak babyi, ninyi yubwa nirya kum danaramnyi.
Nong bisik mangkau asa barona kum uca,
aknabmangnya sibura yungdarbaramnyi.
7Israel weik atei uram dingdang eamwe asi Debora kan tikmarim uca,
Israel nang sun kwin kibmarim.
8Israel nang yuk kwemdeina moloramnyi ura,
ninyi yubwa 40.000 baryi nirya weik bisik bublan dam aryi obkiriamnyi.
Ba, ninyi ton lebkaboka ting ab, ninyi on ya ab ton doboka, sunbabyi leboka kum obmai.
9Niryi sun Israel yin doun sien nang, sunci sulbalyi kanya kum uca,
busul asa aryi mar borandau,
ati, niryi Er Iya Erebdobnyi biti si weik ebman.
10Sun bona bon nang aryi kurun bisam keledai deici bukoka yibanmamunyi nang babyi,
ur wa dona kum ninyi atei bukmamunyi nang babyi,
bona kum aryi tukwe bisik yibanmamunyi nang babyi,
‘Ukuboka ninyi obkiriboubwe,’ eboka nukde yibindarur!
11Me kweraminga dam aryi uram lilim enmang ara mot semang.
Er Iya Erebdobnyi biryi Er mabwe Israel nang diblilibdeboka kunurdeirur ati mot semang.
A deyok aryi Er Iya Erebdobnyi uram keken nang weik atei bisik bublan dam bindoka lelebmang.
12Debora tikokabminci, mot semdum!
Abinoam mi Barak kanbabyi bukokabminci,
tabwe deboka dongobyi ninyi asi dorkweterum!
13Israel yin doun nang orkiriramnyi ani, kablobyi nang ara sun sienyi dam yanmang,
Akiryi, a nang ara Er Iya Erebdobnyi mar bormilin nang kikniboka yuryanmai.
14Efraim yala nang tam aryi sun Benyamin yala nang ara mutuk bakan dam yanmai.
Ura, sun Benyamin yala nang yin doun nang ab antaniboka yanmai.
Ani, Makhir yala ninyi yin doun nang sien nang yanmai,
Zebulon yala nang ninyi demna kama doun nang ababyi yuryanmai.
15Isakhar yala sien nang ara ni, Debora milibmanei.
Ba, Isakhar yala nang Debora tam milibmai to akwe, Naftali yala ababyi Barak milibmai.
Sunda aminda bindoka a mutuk bakan dam mar bobmai.
Uca, Ruben yala tam nang ara sun kanya ninika kubmou ba, kum milibmai.
16Bisam domba kalingnanyi#5:16 Ruben yala nang mar dormilina kum kuamnyi ati kiklibmou biryi er bisam domba namaca lilim asi,
unati domba ai kankan kekebde burandau do?
Sun Ruben yala tam yin doun nang ara
sun kanya olobum ena kum aryi mar bormilina kum kubmai.
17Gilead nang ara Yordan kouboka dinatam akwe iya kuramiryi mar bormilina kum kuramnyi.
Dan yala nang ababyi, me deici yibarande aia dam kuramiryok, unati mar ordana kum milibmasei do?
Asyer yala nang ababyi weik me kwan kubkub ab mutuk dolona kuronungci, lulukman kum kuboka mar kum bormiliramnyi.
18Zebulon yala nang ara dukuta asa dabub deiboka mar ibanung.
Naftali yala nang ababyi mutuk kon dam kunungci dabub deiboka mar ibanung.
19Israel ninyi aryi Kanaan sien nang-sien nang mar iyanmai ba, ordanmai.
A tum ara sun Kanaan sien nang Taanakh dam, mutuk si Megido me urambok asi ordanmai.
A ordanmai talak ara keil si perak ton ukula daluboka borona kum kubmai.
20Imtam ara kurya yubwa naliboka mar bobmai.#5:20 Imtam kurya ababyi mar bobmai. Ara, Imtamnyi biryi sun Israel nang asi milibmou aryi ato kubmou.
Ara, kurya talbalyi kweboka Sisera bisi mar bobmai.
21Me Kison ara minob uca, bikdob me eramnyi me yibarur.
Me Kison aryi sun mar ordana nang asi me oboka yibmou.
Se, ni nong dam mikib weikanun ku titiknurum.
22Kuda bisam bonanyi biryi kuda asi, kulabingnyi ba,
kuda cukoka yan busal demdamwe.
23Meros atei ninyi ara Iya Erebdobnyi bisi mar bormiliryangana kum kubmai.
Er Iya Erebdobnyi bisi milin yin doun nang kum kibmai ati,
Er Iya Erebdobnyi uram erbananyi biryi, ‘Meros ninyi obseknung,’ eboka submou.
24Keni ateinyi si Heber ner si Yael bira yuk-yuk nerabwe bisibkaboka erebdob ner kurur.#5:24 Heber ner si Yael biryi sienyi si Sisera oamwe deyok aryi si erebdeibmou.
Keis ol ai yuk-yuk kunung nerabwe nirya bisibkaboka, a ner asi erebdob ner kurur. Ba, Er Iya Erebdobnyi biryi kisal dangdur.
25Sienyi Sisera Yael bisi bindoka me sirik molobmou. Uca, sapi moum yung me karebmou.
Sien nang yina kikiman meyok aryi moum yung me kikniboka karebmou.
26A ner taruk lakoka keis ol ai don co taci dororbinmou,
ura siriktam taruk aryi bing dangna martil dobdobmou.
Ura, sienyi si Sisera o yok tam asi sibdongobmou,
ba, kuluboka dinatam bebmou.
27Ba, a ner er yan yanibmoua dam a sienyi a dibmou.
A ner yan dam a sienyi a dibmou.
A ner dam aryi anyi isin dakdobmou.
28Weik sienyi Sisera er kwin biryi ai boton bisik dibkweteboka, ato ebmou:
‘Ni mi er kongkong ena kum boyanmar ara una kubmar do?
Er kongkong ena yubwa yan bisal lilim tunim ebmar ara una kubmar do?’ ebmou.
29Ucab, a ner er wa in nerabwe etekdob ner tentok aryi, Sisera er kwin tenebmou to akwe uram doblilibmou.
30‘Minob kum yanmar ara ninyi ordanmanguryi, bona dalubmang bona bongmang.
Ani, ner kabir ara yin doun nang tentoknyi bira bitinyi-bitinyi kiboka bongdonmang.
Ba, Sisera bira ongon aling bol tibna-tibna aling ngang kwatina bitinyi wibdobmar,
ara ni mi Sisera biryi niti wiboka bobkwamanirarya?’ ebmou.
31Nai Iya Erebdobnyi Kan mar ordan nang nirya ukuboka obkiribyi.
Bok, Nai Iya Erebdobnyi Kansi boukwe kimdanking nang ara im dub kiting deirande to ninyi kunung.
Ukuboka Israel nang kwalina 40 baryi mangkau asa akwe kuroramnyi.”
Currently Selected:
Hakim-hakim Uram 5: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)