Hakim-hakim Uram 4
4
Debora ab Barak ab deyok
4:1-24
1Ehud sirya dibmou ura, sun Israel nang aryi, Er Iya Erebdobnyi urasintam asi tubto manmaliramnyi. 2Ba, Er Iya Erebdobnyi biryi sun Israel nang asi, sienyi si Yabin taruk dam karebmou. Anyi bira Kanaan mutuk asi atei si Hazor atei sienyi kiamwe. Ba, sun Kanaan yin doun nang sienyi si Sisera bira Haroset-Hagoyim mutuk kuramwe. 3Ura, sienyi si Sisera bira kat dinyi besi aryi kongkong eboka ninyi orbana keica yubwa 900 baryi deiamwe. Ato kuamuryi, Israel nang asi ercok akwe to kiboka, kwalina 20 baryi iya talebnuruamwe. Ba, Israel ninyi aryi Er Iya Erebdobnyi bisi uu eboka molobmai. 4A talak ara ninyi si Lapidot er ner si Debora biryi Er Imtamnyi uram ermurun ner kiamwe. Ukuamuryi, Israel ninyi sien ner kiamuryi, malyi dinyi liliramwe. 5Debora bira weik atei Rama kan, weik atei Betel kan Efraim mutuk kon dam kuramwe. Ba, sun Israel nang malyi dinyi er dam yandoka lak ebingnyi ura, lilirdeiramwe. 6Uki tentok tum aryi Debora biryi Naftali yala nang mutuk si Kedesh dam Abinoam mi Barak kuramwe asi, “Inirbindarur,” eboka ninyi bokdonokmou. Ba, sirya iniboka yanmai ura, Barak bisi ato ebmou, “Israel nang sun Nai Iya Erebdobnyi biryi kansi ato ebmakir, ‘Naftali yala nang ab, Zebulon yala nang ab yubwa 10.000 baryi buluboka Tabor kon bobirum. 7Ba, Niryi kan mar ordan nang Kanaan mutuk sienyi si Yabin er yin doun nang sienyi si Sisera bisi kan dam neneboka boyankwamakin. Ara, er kongkong ena ab, er yin doun nang nirya ab me Kison kin neneboka kan taruk dam boyankwamakin,’ ebmakir,” ebmou. 8Ba, Barak biryi Debora bisi ato ebmou, “Kan ab tonkwa mar ibinkwamanimnyi ura, nibabyi mar ibinkwaman. Uca, kanbabyi mar kum ibinkwamaminyi ura, nibabyi takokwaman,” ebmou. 9Ato ebmou asi Debora biryi ersi ato ebmou, “Nibabyi tonkwa mar ibinkwamanim. Eda, arub mar ibinkwamanim ara kanci Sisera kum obkwamarim aryi kansi si kum erebkwamaking deyok atiba. Er Iya Erebdobnyi biryi sienyi Sisera bisi ner tentok taruk dam karebci ba, a ner aryi obkwande ati ebman,” ebmou. Ura, Debora ab, Barak ab anabdobmareici, Kedesh mutuk binmarei. 10Ba, Barak biryi Naftali yala nang ab, Zebulon yala nang ab asi, “Kedesh dam mar ibinkwayeb,” ebmou ba, ninyi yubwa 10.000 baryi nang milibmai. Ani, Debora bibabyi milibmou ba, mar tonkwa ibinmai.
11Er Heber bira Keni yalanyi kuramwe. Ba, Keni yala ninyi ara Musa er yamal Hobab deibdoba kuramnyi. Ura, Heber biryi a ninyi takloboka, ai a mutuk bindoka doabne ani, yuk dikum bindoka doabne ani, kibde yibaramwe. Ani, sirya ara Zaananim mutuk asi Kedesh dam co tarbantin kankan bindoka keis ol aruma atei dobde kuramwe.
12Sisera kekenmou uca, “Abinoam mi Barak biryi Tabor kon iyangakir,” ebmai asi kekebmou. 13Kekebmou ura, er ninyi orban kongkong ena yubwa 900 baryi ab, er atei nang yin doun nang ab, Haroset-Hagoyim dam aryi anaboka me Kison kin mar iyanmai. 14Mar iyanmai ura, Debora biryi Barak bisi ato ebmou, “Arub tum ara Er Iya Erebdobnyi biryi Kanaan yin doun nang sienyi Sisera kan taruk dam karebkwinkir tum berekde ati anarorum. Er Iya Erebdobnyi biryi Barak kansi kum takwamakir. Eda, Er menekoka mar bobmilibkwamakir,” ebmou. Ato ebmou ura, Barak ab, yin doun nang yubwa 10.000 baryi nang ab tonkwa Tabor kon aryi yurbindoka me si Kison kin mar ibinmai. 15Mar ibanmai asi bisik noutam ebwanwanubdandoka obdanmai. Ba, Er Iya Erebdobnyi biryi sienyi Sisera ab, er yin doun nang nirya ab, er kongkong ena ab asi, daldalubkaboka ya sekbukmou. Ba, Sisera kongkong ena deici bukmou ani, sakweteboka tukwe bisik bai bukoka bindobmou. 16Bindobmou bok, Barak biryi Sisera er kongkong ena ab, er yin doun nang ab baronmai asi dombinmou. Ani, Haroset-Hagoyim dam bindoka nirya ninyi on ya aryi ya sekoka obkiribmou. Ba, Ninyi tentok ababyi ton kum taklobmai. 17Uca, sienyi Sisera bira cungmou tok ani, Keni yalanyi si Heber ner si Yael ai wengdorbinmou. Anyi Hazor sienyi Yabin bira sun minob ninyi bun burdaramnyi deyok aryi Heber atei bindoka wekdobmou. 18Sisera akatei dam yandobmou ura, Yael sakweteboka anyi bisi, “Nai, ni ai ur a wengdoryarum, ilil kukina mem!” ebmou. Ato ebmou ba, ai wengbinmou ura, Yael biryi kaluna aryi kalubdeibmou. 19Ura, anyi biryi Yael bisi ato ebmou, “Ni me utanmanir ati, me ton karebnurum,” ebmou. Ba, Yael biryi sapi moum yung me kikniboka kiraming aling kibdeibmou aryi yoktaleboka karebmou ba, yibmou. Ura, tubto kaluna aryi kalubdeibmou. 20Ura, Sisera biryi Yael bisi ato ebmou, “Ai bublan dam tikoka diraminyi ba, ninyi ton yandoka, ‘Ninyi ton a yanmang do?’ eboka asibkingnyi ura, ‘Ninyi ton a kum yanmang,’ ebkwandum,” ebmou. 21Ebmou ura, anyi Sisera yanganmoua mitang aryi mablukmou. Mablukwe talak ara Yael bira keis ol ai aruma kubkub tabwe biriboka tukwe ingdongoraming co taci ab, bing dangna dinyi si martil ab dobdobwe ura, nimalyi er dam tingyanmou. Ura, a keica aryi o yok tam simdongonmou ba, kulubkaboka dinatam tikmou ba, dibmou. 22A talak aryi Israelnyi si Barak biryi Kanaan sienyi Sisera bisi domyanganmou ani, akai dam tingbinmou. Ura, a ner Yael sakwetebmou ba, ebdanmareici, ato ebmou, “Kan ingkiringmarimnyi eterebkwankin ati a yarum,” ebmou. Ba, Barak a ner dam binmou ura, akai umbura wengbindoka diramwe uca, Sisera, o yok asi keis ol ai donmangiryi tabwe biriboka ingnaming co taci aryi o yok bikmou tok a dibmou asi asing eibmou. 23A tum aryi Er Imtamnyi biryi sun Israel ninyi asi milibmou ba, Kanaan mutuk sienyi si Yabin atei nang nirya obkiribmai. 24Ura, Israel nang aryi Kanaan sienyi Yabin bisi yu yariboka mar boamiryi obde baramnyi ani, sirya obkiribmai.
Currently Selected:
Hakim-hakim Uram 4: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)