Hakim-hakim Uram 3
3
Kanaan nang kobdoba minob a kuramnyi ninyi asi kum obmai deyok
3:1-6
1Er Iya Erebdobnyi biryi sun Israel nang asi, Kanaan dam minob talak ordaramnyi dinyi asing kum eiamnyi nang asi, “Sun kubkwanunga nun,” tenen ukurdenkwamnyi ati, teneboka kabloamwe. 2Ba, a nang ab ordanmangnya biriman aryi, Er Iya Erebdobnyi biryi sun Israel nang minob mar ordaramnyi dinyi kum bingnamnyi nang asi mar ordana kelerdeiramwe. 3Tuba kabloamnyi atei nang ara Filistin weik atei amubaryi kuramnyi ninyi ab, Kanaan mutuk ninyi nirya ab, Sidon kuramnyi ninyi ab, Hewi ninyi Libanon kon aryi kubde baramnyi ani, Baal-Hermon aryi kuboka Hamat bisik bana kuramnyi nang ab asi takdongoamnyi. 4A kuramnyi nang deici liknibdongoboka Iya Erebdobnyi biryi, “Sun abwe Musa deici aryi, ‘Ukubdarur-ukuna mem,’ ebdeianse uram kunubkwaming do? Kum do?” tenen ukurderamwe.
5Ukuboka sun Israel nang kuramnyi ara Kanaan nang ab, Het nang ab, Amori nang ab, Feris nang ab, Hewi nang ab, Yebus nang ab kankan dam kuramnyi. 6Ba, sun Israel nang nermabwe ara anda atei nang doramnyi ura, anda atei nang nermabwe ara Israel nang doramnyi. Ukuboka dordaramiryi yuk kwemdeina asi moloramnyi.
Otniel deyok
3:7-11
7Sun Israel nang aryi sun Nai Iya Erebdobnyi urasintam aryi manmaliramnyi. Ara, sun Nai Er Iya Erebdobnyi bisi luba kiboka yuk kwemdeina si Baal ab, Asyera ab akwe moloramnyi. 8Moloramnyi ura, Er Iya Erebdobnyi biryi sun Israel nang asi yu weik kubmouci, Mesopotamia sienyi si Kusyan-Risyataim biryi, “Ur obdur,” tenen mundu lobmou. Ba, kwalina inbaryi Kusyan-Risyataim biryi mar boamwe. 9Ba, sun Israel nang aryi Er Iya Erebdobnyi bisi u eboka molobmai ba, sun lebkwamunyi Kenas mi Kaleb er weit Otniel bisi Er Iya Erebdobnyi biryi tikeibmou. 10Ura, Er Iya Erebdobnyi Kanya Roh aryi er Otniel koukwe olokmou. Ba, sienyi kibmouci, Israel nang asi malyi deyok liliboka kalingnamwe. Ura, Mesopotamia sienyi si Kusyan-Risyataim bisi ibinmou ba, Er Iya Erebdobnyi biryi ersi milibmou aryi anyi bisi bindoka obkabmou. 11Ato kubmou akiryi sun Israel nang kwalina 40 baryi mangkau asa akwe kuroramnyi ani, Otniel dibmou.
Ehud deyok
3:12-30
12Sun Israel nang aryi Er Iya Erebdobnyi urasin dam asi tubto malyi kimdamnyi. Ura, er Moab weik sienyi si Eglon bisi Er Iya Erebdobnyi biryi Israel ninyi mar bobkwamwe ati, mikib dongobdeibmou. 13Ba, Eglon sienyi biryi Amon yala nang ab, Amalek nang ab asi, “Mar dobnindarur,” eboka molobmou ba, mar dobmilibmai ura, antaniboka, Israel nang asi mar bobmaici Israel nang obkiriboka, Yerikho weik atei si co si “Korma Duba,” eboka doramnyi atei asi arabdobmai. 14Ba, Moab weik sienyi si Eglon biryi Israel nang asi kwalina 18 baryi ara lebesekokman kum asa kuramiryi, erci ebne to akwe kunuramnyi. 15Bok, Israel nang aryi Er Iya Erebdobnyi bisi, “Lebdeibsurum,” eboka molobmai ba, sun lebkwamunyi Gera mi Ehud tikeibmou. Anyi bira Benyamin yalanyi kuramwe ba, er taruk ara kwanimnyi bisi tikeibmou. Ura, Israel nang aryi tukwe dengna bulubdeibni ura, Ehud biryi Moab sienyi Eglon bisi dengbaramwe. 16Ani, Ehud biryi ninyi on ya si tam babyi, amyok tam babyi si ketebmou. A ninyi on ya kiklina ara meter tentok kiklibmanto bok bumang to ya nun asi kikniboka si ketebmou. Ura, er ongon aling umbura siriktam mirikna yok bisik kikibdobmou. 17Ura, Ehud ab Israel nang ab aryi Amon sienyi si Eglon bisi tukwe dengna ati karerbinmai. A sienyi bira mundu kwebdikamuryi, ilila lungkun biriamwe. 18Ehud biryi sirya bindoka karebmou ura, tukwe dengna tonkwa bobinmai nang ati, “Bindobkwayeb,” ebmou. 19Ura, yangaramnyi ani, Ehud bira Gilgal dam keil asi telebde kikniramnya dam yanabiryok yumkuna Eglon sienyi bisi tamurbinmou. Binmou ura, ato ebmou, “Nai sienyi tol uram nun ton boyanman,” ebmou. Uca, a sienyi Eglon biryi ato ebmou, “Yuk nang dam a tikabing ati kilikabminyi ani, nun yuk uca, ebdum,” ebmou. Ba, er wa irmilin nang dam a tikabyi nang nirya sakweteboka bindobmai. 20Ba, Ehud ai wengbindoka, im dub ai weleboka diramwe uca, kumwe terem-terem ena ati kiknibdeiamnyi ai umbura a bukmou. Asi, bindoka ato ebmou, “Er Iya Erebdobnyi biryi ebmar uram tol boyanman,” ebmou. Ura, a sienyi tikokmou. 21Tikokmou ura, Ehud kwanimtam taruk aryi siriktam mirikna tam kuboka ya kibmoua dobdobwe ura, a sienyi mundu kwebdikmoua tam iboka lukdongobmou. 22Ba, ya taleraminga ababyi buboka wekdobmou. Ba, anyi minta aryi libdobmou aryi a ya kum kwinibdobmou. Eda, a takloboka dongtam bisik sakweteboka bindobmou. 23Ukubloboka atolong atei tingdoryanmou ura, im dub atei wengweleban bublan tirikdongoboka darabdongobokmou. 24Sakweteboka barou ura, a sienyi er wa irmilin nang yanmai. Uca, im dub ai bublan ara tirikdongoboka dakdongobokmou aryi bublan kukman kum kubmou. Ura, sienyi wa irmilin nang aryi ato ebmai, “Nun sienyi deibar binmar kum aryi bublan tirikdongobmar,” ebmai. 25Ebmaici, dinmai uca, im dub ai bublan asi kungna kum kubmouci, uki weik kubmou ura, “Una kubmar do?” tenebmai. Ato kuboka uki weik kubmou ura, bublan kungna keica dobmaici, kukoka dinmai uca, sun sienyi ai yangamna deici a dibmou asi asing eibmai. 26A dibde tingmai talak ara Ehud cukaboka keil asi teleramnyi dikum bisik dinibkaboka Seira dam bindobmou. 27Ura, Ehud bira Efraim mutuk kon bindobmou. Ura, trompet aryi buu eboka, sun Israel nang asi nabmou. Ba, Israel nang er dam yanmai ba, mutuk kon akiryi yuryandoka akatei asi mar iyanmai. Mar ibanmai ura, Ehud erdamnyi mar boboka menekmou. 28Ehud biryi, “Nun Nai Iya Erebdobnyi biryi nun taruk dam karebkwamasir ati, ni milibnindarur,” ebmou. Ba, Ehud bisi milibmai ura, mutuk kon aryi yurbindoka, me Yordan kin bindoka bisik me kouna dukuba sekmaici, Moab ninyi nirya obkiribmai. Ba, ninyi tentok ababyi ton lo asa yibarona kum kubmai. 29Ura, Moab ninyi yin doun nang dabdob akwe onmai ara yubwa 10.000 baryi dikum obmai. Ba, ninyi tentok ababyi lobdeibne ba, me kouboka barona kum kubmai. 30Ukuboka Israel ninyi aryi, Moab ninyi asi malyi kiboka obkiribmai. A deyok aryi kwalina 80 baryi ur mangkau asa akwe kuroramnyi.
Samgar deyok
3:31
31Ehud sirya dibmou talak aryi Anat mi Samgar malyi dinyi lilin sienyi kibmouci, Filistin nang asi bisam lembu yangdongon kama aryi ninyi yubwa 600 baryi obmou. Ukuboka Samgar biryi ninyi obkiribmouci, Israel nang lebdeibmou.
Currently Selected:
Hakim-hakim Uram 3: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
