Hakim-hakim Uram 2

Er Iya Erebdobnyi uram eryuryangananyi Bokhim dam yanmou deyok

2:1-5

1Er Iya Erebdobnyi uram eryuryangan nang sienyi si Malaikat Tuhan#2:1 Er Iya Erebdobnyi biryi Er uram eryuryangan nang sienyi deici liknibdongobokabdiryi, lak tingyandoka uram eramwe. tentok Gilgal aryi kuboka weik atei Bokhim binmou. Ura, Israel nang Bokhim atei kuramnyi ninyi asi ato ebmou, “Niryi sunsi Mesir dam aryi iniboka boyasise. Ura, niryi sun abwe yabwe asi dib en uram aryi, ebdeianse mutuk dam boyandoka, ‘Niryi minob eanse dinyi kum takwan, eda iya kunubdeibkwansin,’ eanse. 2Bok, a mutuk nang ab, antaniboka sun moloramingnyi to tonkwa molona mem. Eda, sun Kanaan ninyi kwemdeina biti dama deiboka molonung keil dungna asi dalubkabokdarur. Ato ebse bok unati, kum dalubkabdau do? 3Ni Imtamnyi biryi ton ebkun ara kekendarur, ‘Kanaan ninyi sun mar ordana ninyi asi sun kankan dam tuba kunung ninyi ara yangdonongna kum kubkwan. Eda, Niryi teneboka yanlobloanyi ba, sun dam tuba a kunkwaming. Ba, akuramingnyi aryi sun Israel ninyi asi, Kanaan ninyi moloramingnyi kwemdeina asi sunbabyi a kwemdeina tonkwa molobkwaming. Ukuboka molobmunyi ura, sun a ninyi kwemdeina aryi ena kuna neneboka youbkwansing,’ ” ebmou. 4Er Iya Erebdobnyi uram eryuryangananyi biryi sun Israel nang nirya asi ato ebmou. Ba, sun Israel nang nirya ngolokoka engebmai. 5Ura, a mutuk si ara Bokhim#2:5 “Talyi kubkwayeb,” eboka engebmai ati a mutuk si sun uram aryi, “Bokhim,” eboka si dobmai. eboka si dobmai. Dobmai ura, Er Iya Erebdobnyi biti dama deiboka karebmai.

Yosua sirya dibmou talak aryi sun Israel ninyi kwemdeina moloramnyi deyok

2:6-23

6Yosua biryi sun Israel nang asi mutuk yuk-yuk taleboka kuronkwamnyi to kuboka bokdonokmou. Ba, mutuk yuk-yuk bindoka talebdobmaici, kubdobmai. 7Sun Israel ninyi ara Yosua kam kuramuryi, malyi dinyi lilinanyi kiboka taleamwe talak ara Er Iya Erebdobnyi bisi si weik eboka moloramnyi. Ba, Yosua sirya dibmou ba, kam tuba kuramnyi nang asi Er Iya Erebdobnyi biryi ilil tenen dinyi kikniramwa asing eiriramnyi nang babyi, aminda aryi deiboka nebmai nang babyi ara Er Iya Erebdobnyi bisi si weik eboka moloramnyi. 8Ani, ninyi si Nun, er mi si Yosua bira Er Iya Erebdobnyi wa irmilinanyi kiboka, malyi dinyi lilinanyi kibmou. Ukuamwe talak ara kwalina yubwa 110 baryi kwalibmou ura, dibmou. 9Sirya dibmou ura, er mining mutuk si Timnat-Heres dam tukwe dongobmai. A mutuk ara Efraim mutuk kon dam Gaas kon diniboka eitam kuboka asi tukwe dongobmai.

10Ura, Er Iya Erebdobnyi biryi sun Israel nang asi ilil tenen dinyi kunuramwe dinyi asing eiriramnyi nang ara sirya dibsekmai. Ura, aminda aryi deibmai ba, nebmai nang ara Er Iya Erebdobnyi biryi sun Israel ninyi asi ilil tenen dinyi kikniramwe dinyi asing eirina kum kuramnyi. A deyok aryi Er Iya Erebdobnyi uram kununa kum ninyi kibsekmai. 11Ura, sun Israel nang aryi Er Iya Erebdobnyi bisi malyi kibmaici, kwemdeina si Baal ninyi aryi kiknin dinyi asi kikniboka molobmai. 12Er Iya Erebdobnyi sun abwe yabwe Mesir dam aryi boyanamunyi bira takloboka, sun kankan dam kuramnyi nang moloramnyi kwemdeina asi luknubdongoboka molobmai. Ato kuboka molobmai deyok aryi, Er Iya Erebdobnyi bisi kanya malyi kibdeibmai. 13Ukuboka Er Iya Erebdobnyi bisi taklobmaici, kwemdeina si Baal ab, si Asytoret ab asi molobmai. 14Ato kubmai deyok aryi Er Iya Erebdobnyi biryi Israel nang ati yu weik kubmou. Ura, Erci sun Israel nang asi ninyi talyi on nang ab, sun mar ordan nang sun dam a kuramnyi nang ab ati dobkarebmou. Ba, sun mar ordan nang ab ordanmana ababyi, Israel nang aryi sunbabyi leboka obman kum kuramnyi. 15Ani, mar ibinmangnyi tum nirya ara Er Iya Erebdobnyi biryi minob sunsi ebdeiamwe to kuboka, sunsi tiliba mengerdeirongdamwe. Ba, sun mambul kanya bororamnyi. 16Ura, Er Iya Erebdobnyi biryi sunsi ninyi on nang aryi oramnyi ati, malyi deyok liliboka lemkwamnyi nang tikeibmou.

17Tikeibmou bok, a tikeibmou nang aryi eramnyi uram kum kekebmaici, takloboka yuk kwemdeina asi molobmai. Sun abwe yabwe aryi Iya Erebdobnyi bisi moloraminyi bira takloboka sun molobman kum kwemdeina asi molobmai. 18Er Iya Erebdobnyi biryi sun Israel nang asi, malyi deyok liliboka kalingkwamnyi nang wibokaburyi, a nang asi miliramwe. Ba, sun Israel ninyi asi sun mar ordan ninyi aryi il arukoka titik-titik eramnyi ba, mambul kanya boramnyi dinyi asi, Er Iya Erebdobnyi biryi malyi deyok liliboka kalingna nang deici liknibdongoboka lemdeiriramwe. 19Bok, a sienyi kiboka malyi deyok liliboka kalingnandinyi dibci talak ara sun abwe yabwe aryi malyi dinyi kunuramnyi dinyi ara sangtoto bok, a talak ninyi ara iya taba deiboka yuk kwemdeina akwe iya moloboka miliramnyi. Ani, iya taba deiboka yuk kwemdeina moloramiryi, sun nirya iya malyito dinyi akwe kunuramnyi. 20Ato kunuramnyi ura, Er Iya Erebdobnyi Er yu kubci talak ara ato eramwe, “Israel nang ara Niryi sun abwe yabwe ati, ebdeianse to kuboka kum kununung aryi, Ni ab, sun ab tonkwa kuna sirya seksinibnei. 21Yosua sirya dibwe talak ara Niryi sun kankan dam tuba kunung nang kum yakdonokwan. 22Eda, a nang asi milibniryi, sun Israel nang asi dubdenkwan. Ara, ‘Sun abwe yabwe aryi Ni moloranei to kubkwaning kum? Yuk kwemdeina molobkwaming kum?’ tenen teneboka dubdenkwan,” ebmou. 23Ura, Er Iya Erebdobnyi biryi Kanaan nang sun Israel nang kankan dam a tuba kuramnyi ninyi ara Yosua bisi dorkarena kum kubmou. Ba, a ninyi asi orkana kum kubmai. Eda, teneboka a taklobokamwe ba, Sun Israel nang kankan dam iya a kuramnyi.

Currently Selected:

Hakim-hakim Uram 2: MTG

Highlight

Copy

Compare