Hakim-hakim Uram 20

Sun Israel nang aryi Benyamin yala nang asi mar bobmai deyok

20:1-48

1Ura, sun Israel nang nirya, Dan yala tam mutuk aryi kuboka Bersyeba mutuk dam nirya ab, Gilead mutuk nang nirya ab bulubmaici, Er Iya Erebdobnyi urasin dam aryi tentok kanya boboka Mizpa dam wekmai. 2Ura, Israel nang yala sien nang nirya ara Imtamnyi uram keken nang yubwa 400.000 baryi nang anaboka mar ibinmai. A yin doun nang nirya ninyi on ya doubmaici, tukwe bisik mar ibinmai. 3Ba, Benyamin yala nang aryi kekenmai uca, “Sun Israel nang ara Mizpa dam akwe bulubmang,” ena kekebmai. Ura, Israel nang aryi ato ebmai, “A ner obmai deyok ara una kuboka obmai da? Nuksindarur,” ebmai. 4Ba, Lewi yalanyi a obmai ner er akenyi biryi ato ebmou, “Ni ab ni ner ab yanganmanoumwe ani, Benyamin yala nang atei si Gibea dam maryanmanoumwe. 5Uca, lukunda aryi Gibea atei nang aryi nun bukmanoumwe atei yandoka aknabmaseici, nisi, ‘Obkwayeb,’ tenen iyanganmanei. Uca, nira kum obmanei eda, ni dortabangni ner asi taleboka yoronmai ba, dibmou. 6Ura, ni ner dibmoua tukwi asi yok kurande tok nirya ya kungang dakoka nun yala Israel nang kundarur mutuk nirya asi bokeibmase. Ara, sun Benyamin yala nang ara sunbabyi Israel yala nang kunung bok asi, mining yala ninyi malyi kiboka ni ner yonmai deyok ati ukubmase. 7Ati, sun Israel nang ukura, a bulubmarum uca, uram sisikokabmunci, ‘Ukubkwayeb,’ ebdarur,” ebmou. 8Ura, Israel nang nirya diririb eboka tikokmai ura, ato ebmai, “Ninyi tentok ababyi nun atei yuk-yuk tamuboka kum binkwayeb. 9Gibea nang asi mar bobkwayeb ati, mar ibinkwamangnyi nang ara yamin deibdeboka wibkwayeb. 10Ato kuboka wibkwayeb, yin doun nang 100 baryi olong ara takubaryi wibkwayeb. Ba, yubwa 1.000 baryi nang olong ara yubwa 100 baryi wibkwayeb. Ani, tonda yubwa 10.000 baryi nang olong ara yubwa 1.000 baryi wibkwayeb. Ba, a nang ara mar ibinkwamabyi nang yin kwaning borbinkwansing. Boyasingnyi ura, Benyamin yala nang mutuk Gibea atei asi, nun Israel nang asi malyi kibdongoansungwe to sunbabyi kisok dakwayeb,” ebmai. 11Ukuboka Israel nang aryi, “Gibea atei nang mar bobkwayeb,” eboka bulubmai.

12Sun Israel nang aryi Benyamin yala nang atei nirya asi uram deibmai, “Una deyok ati yu wekmasou ba, a ner asi obdau do? 13Ati ukura Gibea atei ner yona ibuk ilinto ninyi ara obkiribibyi ba, kum dankwaming. Nun Israel ninyi mamun kankan dam bok asi malyi kibdongobsei ninyi ara obkiribkwayeb,” ebmai. Uca, Benyamin yala nang ara sun kwit yabwe Israel nang uram kum kekebmai. 14Uca, danguboka Benyamin yala nang aryi yuk atei-yuk atei nang nirya Israel nang mar bobkwabmaici, Gibea atei dam akwe bulubmai. 15Ura, a tum aryi Benyamin yala yuk atei-yuk atei aryi buluryanmai. Ura, ninyi on ya doun nang nukmai ara yubwa 26.000 baryi kibmou. Ba, Gibea atei nang kobdoba ara ninyi dubsi aci tenena akwe wibmai ara yubwa 700 baryi wibmai. 16Ura, a ninyi on nang nirya ara kwanimtam taruk aryi keil asi tabwe biribdongoboka ninyi ona co biriamwe nang yubwa 700 baryi asi wibmai.

17Ani, Benyamin yala nang ab nungna kum uca, sun Israel nang koklombaryi yala nang yin doun nang akwe, yubwa 400.000 baryi bulubmai. Ba, sun nirya ara ninyi on ya akwe doubmai. 18Ura, sun Israel nang ara Betel dam binmaici, Imtamnyi bisi ato eboka asibmai, “Nun kankan dam aryi una yala nang aryi mar bo meneksingnyi ba, Benyamin yala nang asi mar bobinkwayeb do?” ebmai. Uca, Er Iya Erebdobnyi biryi, “Yehuda yala nang asi menengbinkwanung,” ebmou. 19Ura, Israel nang belekuna bukoka anabmaici, banmai ani, Gibea atei dam bindoka atei doboka mabmai. 20Ani, berekwe ura, Israel nang leleboka Gibea dam aryi Benyamin yala nang asi mar bobmai. 21Uca, Benyamin yala nang Gibea dam aryi sunbabyi yin dobmaici, Israel nang asi, a tum aryok yubwa 22.000 baryi obmai. 22Ato kuboka obukmai ura, Israel nang yin doun nang yuma bulubmai dikum akwe tubto mikib deiboka bulubdobmai. 23Ura, sun Israel nang Er Iya Erebdobnyi bisi molonmaici, engenmai tok asi sintam danmou. Ura, Er Iya Erebdobnyi bisi ato eboka asibmai, “Nun kwit yabwe Benyamin yala nang asi mar tubto ibinkwayeb do?” ebmai. Ba, Er Iya Erebdobnyi biryi, “Ur mar ibindarur,” ebmou. 24Ba, uki bitinyi tum ara Israel nang aryi Benyamin yala nang atei dam mar ibinmai. 25Uca, uki bitinyi tum ababyi Benyamin yala nang yin doboka Gibea dam aryi Israel nang yin doun nang akwe tubto yubwa 18.000 baryi obukmai. 26Ba, Israel nang nirya tubto Betel dam bulubmaici, Iya Erebdobnyi urasin dam engeboka, yina si teboka bukmai tok asi inibmou. Ura, “Nun malyi kun dinyi kilibsurur,” tenen bisam oboka sun dama deirin dinyi ab, bisam oboka uk dan dinyi ab Iya Erebdobnyi urasintam oboka uk dabmai. 27Ukubmai ura, Israel nang aryi Er Iya Erebdobnyi bisi, “Ukubdarur-ukuna mem,” eamwe uram deirin co sangkol dam bindoka asibmai. 28A talak ara Harun mi Eleazar biryi deibmou mi si Pinehas bira Imtamnyi ai wa inanyi kuramwe. A talak aryi Er Iya Erebdobnyi bisi ato eboka asibmai, “Nun kwit yabwe Benyamin yala nang asi mar tubto ibinkwayeb do? Taklobkwayeb do?” eboka asibmai. Uca, Er Iya Erebdobnyi biryi, “Ur mar ibindarur! Ambutum ara Benyamin yala nang asi sun taruk dam dobkarebkwamasin,” ebmou.

29Ura, sun Israel nang ara bisik minob iniboka tingban nang ara Gibea atei aknaboka kalingbinmai. 30Uki winiryi tum ara Israel nang aryi Benyamin yala nang asi Gibea atei min tum mar bobmai to kuboka mar bobmai. 31Uca, Benyamin yala nang aryi Israel yin doun nang asi weik atei Gibea atei aryi neneboka, Betel ban bisik ton Gibea atei ban bisik lu ton minob ukubde oramnyi to kuboka, ninyi Israel nang yubwa 30 baryi dikum obmai. 32Ura, Benyamin yala nang aryi ato ebmai, “Min tum obkiriboubwe to kuboka anda nang ababyi obkiribokwayeb,” ebmai. Uca, sun Israel nang ara minob ato eboka moun yibdamnyi, “Atei dam aryi nenebokabibiryi, bisik ban ai-bisik ban ai bobde yankwanub,” eamnyi to kunubmai. 33Ukuboka Israel nang sun mabmaia dam aryi anaboka, Baal-Tamar dam yin deiboka kiknibmai. Ba, ton minob anaboka Gibea atei dam minob iniboka tingbinmai nang anaboka Geba dam lak tingyanmai. 34Ani, Gibea atei dam bindoka, Israel nang dubsi aci tenena akwe, yubwa 10.000 baryi iwekmaici, obdanmai. Bok, Benyamin yala nang ara sun nirya orbunkwabmaia kum bikmai. 35Ura, Iya Erebdobnyi biryi, “Benyamin yala nang asi, Israel nang aryi obkiribnung,” tenen mikib kibdeibokmou ba, obkiribmai. A tum ara Israel nang aryi, Benyamin yala nang asi, ninyi on ya doun nang akwe 25.100 baryi obukmai.

36 # 20:36 A ayat 36 aryi kuboka ayat 41 kerek sekyi dinyi ara minob ukubmai dinyi ayat 24-35 sekyi dinyi atikwe tubto tamuboka a nukyi. Benyamin yala nang aryi dinmai uca, sun tam nang nirya obkiribmai asi asing eibmai. A talak ara Israel nang ara mitikanun neneboka Benyamin yala nang kibmai tam libdobmai. Ara, minob bisik irbinmai nang aryi “Gibea atei wengbinkwaming,” tenen teneboka, neneboka libdobmai. 37Ba, bisik ibmai nang ara Gibea atei ola bindoka arabdobmai. Wengbinmai ura, weik atei a doramiryi kuramnyi ninyi nirya, ninyi on ya aryi obukmai. 38Israel nang ara minob bisik irbinmai nang aryi, “Gibea atei uk dabmunyi ba, tulum ara akurya bunkwabmarur,” eboka minob sisikdamnyi. 39Akiryi Israel nang ara teneboka, neneboka libdobmai. Ba, a nenebdobyi talak uca, Benyamin yala nang aryi Israel nang asi, yubwa 30 baryi nang obmai. Sun kanya ara, “Israel nang minob orkirinub to obkiribokib,” tenebmai. 40Ura, Benyamin yala nang dinmai ba, sun atei asi tulum akurya bunintoto kubmouci, sun atei nirya uk buk ara imtam lemberengmou asi asing eibmai. 41Ura, Israel nang tamuboka aminda domyanmai. Ba, Benyamin yala nang ara, “Talya obkiribkwansing,” tenen aryi sirim talebmou. 42Ba, akiryok cukoka yinimwe mutuk bai burorbanmai. Uca, Gibea atei wengyandoka onmai nang aryi obde banmai ara lebdobman kumto kubmou. Ba, atei orbunmai nang ara ninyi iya kum dandeibmai. 43Ani, Benyamin yala nang a obde banmai asi Gibea dam yaletam bindoka sirya obukmai. 44Benyamin yala nang ninyi dubsi aci tenena akwe ara yubwa 18.000 baryi obmai.

45Benyamin yala ton nang ara tamuboka yinimwe bisik Rimon kon diniboka bindobmai. Uca, ninyi 5.000 baryi nang asi weik bisik dam aryi obkiribmai. Ba, ton nang baronmai asi aminda dombinmai ani, Gideom dam bindoka ninyi yubwa 2.000 baryi nang obkiribmai. 46Benyamin yala yin doun nang asi a tum aryi obmaia nirya ara ninyi dubsi aci tenena akwe yubwa 25.000 baryi obmai. 47Ba, Benyamin yala nang 600.000 baryi nang ara cukoka yini mutuk tam Rimon kon dam asi bindoka wala dumbaryi kuroramnyi. 48Ba, sun Israel nang ara tamuboka Benyamin yala nang atei dam yanmai ura, ninyi on ya aryi Benyamin yala nang takdongobmai dinyi asi nirya obkiribmai. Ara, ninyi babyi, bisam babyi tonda sun deiramnyi dinyi nirya obukmaici, a mutuk doramnyi atei ababyi nirya uk dabmai.

Currently Selected:

Hakim-hakim Uram 20: MTG

Highlight

Copy

Compare