Hakim-hakim Uram 18
18
Mikha biryi kiknibdeiboka moloramwe kwemdeina asi, ninyi si Dan yala nang aryi ukula dalubdobmai deyok
18:1-31
1A kuramnyi talak ara Israel nang aryi sienyi kiboka talena ton kum kuramnyi. Ani, a talak ara Dan yala nang sun iya kubkwamnyi mutuk tuba ingkiringnamnyi. A talak ababyi sun Israel nang kankan aryi sun mutuk ton kum dobdobmai. 2A deyok aryi sun kubdobkwamnyi mutuk dirmeimbinkwamai ati, Dan yala ninyi dabdob akwe wiboka bokeibmai. Ara, Zora dam kuramnyi nang ab, Esytaol dam kuramnyi nang ab asi sun yala kuramnyi tok nirya asi ninyi amubaryi wibmai. Ura, “Dirmeimbindarur,” eboka bokdonokmai. Ba, banmai ani, Efraim mutuk kon dam binmai ura, Mikha atei bindoka mabmai.
3Uca, Lewi yalanyi kamnyi nun ton a kuramunyi er uram danguna asi kekebmai. Ura, anyi bisi bindoka ato ebmai, “Kanda unanyi biryi boyakou ba, a mutuk yandoka kurum do? Ani, una wa ibde kurum do?” ebmai. 4Uca, anyi biryi sunsi ato ebmou, “Mikha biryi, ‘Ni molonunyi ai wa inanyi imam kibdum,’ eboka wa karebnouci dengnurur. Ba, akai wa ibde kunun,” ebmou. 5Ura, sunci ersi ato ebmai, “Nun a yanmab dinyi minob bikwayeb ati, Imtamnyi bisi asibderum!#18:5 Efod ara Er Iya Erebdobnyi ai wa in nang imam nang taram karangnamiryi, yamin deiboka Er Imtamnyi bisi asirderamnyi. Ba, yamin du bitinyi deici aryi kunubkwamaci dinyi ara, “Yo,” eramwe. Ba, kum kunubkwamaci dinyi ara, “Kum,” eboka lak eramwe keica. kunubkwamar do? Kum kunubkwamar do?” ebmai. 6Uca, akai wa inanyi imam biryi ato ebmou, “Sun a yanmarum ara Er Iya Erebdobnyi bibabyi teleb tenebmasir ati, mangkau asa, akwe bindobkwabmarum,” ebmou.
7Ura, sun amubaryi nang anaboka binmai. Ani, mutuk Lais dam bindoka diramnyi uca, Sidon mutuk ninyi sun minob kuramnyi to iya mangkau asa akwe kuroramnyi. Ura, sun Lais ninyi ababyi a mutuk bindoka mangkau asa akwe kubdobmai. A kuramnyi nang utotoa bulung ton kum buramnyi. Ani, Sidon nang ab uram sisikde kuna ababyi kum kuramnyi. Eda, sun yuk kanya wisiboka mangkau asa akwe kuroramnyi.
8Sirya sun atei nang Zora dam Esytaol dam binmai. Ura, sun weit yabwe ab, sun du yabwe ab aryi ato ebmai, “Sunda mutuk tukwe ton eibdobmasurum do?” ebmai. 9Uca, sunci ato ebmai, “A mutuk bindoka dibdenmab uca, mutuk teleb asing eibmab. Ati, minob a mutuk kunung ninyi ara obkaboka, mutuk arabdobkwayeb ati, anarminingmandarur! Sun kanya sulbalyi kuboka daldala birisina mem. A mutuk dam minob wengdorbindoka kubdobkwayeb,” ebmai. 10“A mutuk wengbitibyi ura, siriktam mutuk babyi, kwanimtam mutuk babyi asi kuronungci, mangkau asa kuronung asi asing eibdaute. A mutuk asi Imtamnyi biryi nun taruk dam karebsici ura, utotoa nirya bulung kum mutuk tukwe asi kubdobkwayeb,” ebmai.
11Ura, Dan yala nang ara mutuk Zora dam ab Esytaol mutuk dam ab aryi ninyi yubwa 600 baryi ninyi on yin nirya doubmaici, anabmai. 12Banmai ani, Yehuda mutuk asi Kiryat-Yearim dam bindoka ai dobmai. Ato kubmai deyok aryi a mutuk si ara, “Mahane-Dan,”#18:12 Nun uram ara, “Dan yala nang ai dona olong,” enung. eboka si dobmai. A mutuk si ara ukubabyi tuba si enung. A mutuk ara Kiryat-Yearim dam kitingbantam mutuk kuboka asi bukwe. 13Otam bisik kuboka yanganmai ani, Efraim mutuk kon dam Mikha atei yanmai.
14Ura, minob Lais dam dirmeimbinamnyi nang amubaryi nang aryi, sun yala nang asi ato ebmai, “Nun dirmeimyibanmabuburyi, akatei ara sun Er Imtamnyi ai wa in nang imam nang taram karangnaming karakna ab, ninyi atoa kikniraming dinyi kikniboka deinung asi eiboka yibinmoubwe. Ati, akai asi una kubkwayeb teneandum da?” ebmai. 15Ura, anaboka akai dam bisik binmai ani, a kamnyi Lewi yalanyi kuramwe ai Mikha atei binmai. Ura, sunci Lewi yalanyi akai kuramunyi bisi, “Kanda teleb akwe kurandim do?” eboka asibmai. 16A talak ara Dan yala yin doun nang yubwa 600 baryi nang ara lika bisik bublan dam yandoka tikoka kalikmai. 17Ba, ninyi amubaryi nang akatei dirmeimbinmai nang ara wengbindoka akai wa in nang taram ongoramnyi keica ab, ninyi atoa kikniraming keica deiramnya nirya ab ukula daluboka dobmai. Ba, akai wa iramunyi imam bira lika bisik bublan dam yin doun nang yubwa 600 baryi nang ab uram sisingmai talak aryi ai umbura wengbinmai. 18Ani, a nang ara Mikha ai wengbindoka anda keica ukula doronmai ani, anaboka yangai asi akai wa iramunyi biryi ato ebmou, “Sunda una kunmarum da?” ebmou. 19Uca, sunci ato ebmai, “Uram ena mem, kilikoka o barum! Milibsiminci, nun nai kiboka nun Imtamnyi ai wa inanyi imam kibkwansirim. Kanda una dinyi asi kan teleb do? Tentoknyi ai ninyi asi sun nai kiboka talena asi teleb do? Israel yala nang nirya asi sun nai kiboka Imtamnyi ai wa ina asi teleb do?” ebmai. 20Ba, akai wa iramunyi er kanya teleb kubmou ura, taram karangna ab ninyi atoa kikniboka deiriramnya nirya doboka sun Dan yala nang kankan wengdoryanmou. 21Ura, sun mabwe ab, sun bisam yabwe ab, bona-bona iya bikdob dinyi ab ara minob menekoka bobinmai.
22Banmai ani, era mutuk lulubmai talak ara Mikha atei dam kuramnyi nang bikmaici sun ab, Mikha ab tonkwa anaboka, Dan yala nang asi dombinmai. 23Bindoka Dan yala nang asi uram donmai asi, sunci danguboka Mikha bisi ato ebmai, “Unato ati ninyi ilinto yanganmarum da?” ebmai. Uca, erci, 24“Ni kikniboka moloranwe dinyi ab, akai wa iramunyi ab bobde baronmarum ara nira una kubkwan do? Ni moloranwe dinyi nirya bobde banmarum cok asi, ‘Unato ati yanganmarum,’ enmanurum do?” ebmou. 25Uca, Dan yala nang aryi ersi, “Nun kan uram kekebibyob ati, kilikokdum. Uram ertabangminyi ura, kekebkingiryi, sun yu wekci ura, iyandoka kan ai ninyi nirya obkabkingnyei,” ebmai. 26Ura, Dan yala nang banmai asi Mikha dinmou uca, sun mikib mak asi eibmou ura, tamuboka er atei yandobmou.
27Ba, Dan yala nang Mikha kikniramwe keica ab, ninyi aryi kikniboka molon ai wa iramunyi imam ab ara boboka banmai ani, atei si Lais dam boboka wengbinmai. A atei ninyi sun mangkau kuramnyi asi ninyi on ya aryi obkiribmaici a weik atei uk dabmai. 28Akatei Lais atei ninyi asi yuk nang aryi ton kum lemdeiryanmai. Ara, Sidon mutuk ara dam kum deyok ab, akatei nang ab uram tonkwa sisikoka ninyi bun ababyi ton kum buramnyi deyok ab aryi kum lebdeibmai. Akatei Lais doramnyi dikum ara Bet-Rehob mutuk lu dam doramnyi asi, Dan yala nang aryi yumkuna dobtabakdobmaici sun atei kibdobmai. 29Akatei minob si ara Lais eramnyi bok, ukuryok si ara sun abwe kisok Yakub mi Dan si makmak akwe, “Dan,” eboka si dobmai. 30Dan yala nang aryi ninyi atoa kikniamnyi kwemdeina bobinmai dinyi ara sun biyuk molonkwamnyi ati, bindoka tikeibmai. Ba, Musa mi Gersom mi si Yonatan ab, er mabwe ab ara Dan yala nang anda keica molon ai wa in nang imam nang kibmai. Ukuamnyi ba, Israel nang a kuramnyi bok asi, sun mar ordan nang aryi yuk mutuk boboka binamnyi.#18:30 Israel ninyi asi sun mar ordan ninyi aryi boboka weik atei si Babel bobinamnyi. 31Ukuboka Mikha biryi kikniamwe kwemdeina, sun biyuk molonkwamnyi ati, Er ukuryok, “Dan,” eboka si dobmai atei deiboka moloramnyi. Mikha biryi kikniamwe kwemdeina moloramnyi talak ara Er Imtamnyi ai kobdoba Silo dam tuba doamnyi.
Currently Selected:
Hakim-hakim Uram 18: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
