Hakim-hakim Uram 14

Simson ab Timna atei kabir ner ab deyok

14:1-20

1Simson atei si Timna binmou, ura Filistin mutuk kam ner tentok asi asing eibmou. 2Asing eibmou ura, yandoka er nai ab, er kwin ab asi, “Timna atei Filistin ner asi eibman ner ara iniboka yarurumci nisi kabdeibnururumnyi ba, ni dobkwan,” ebmou. 3Bok, er nai ab er kwin ab aryi ato ebmarei, “Nun atei nerabwe ara ton kum kunung ati, Filistin ninyi Er Iya Erebdobnyi bisi dib kum tenenungci, den bam kum sengdanung atei nerabwe asi dobkwandim do?” ebmarei. Bok, Simson biryi er nai bisi, “A ner asi ni kanyi kubmanir ati, iniboka boyanururum,” ebmou. 4Bok, er kwin ab er nai ab ara Er Iya Erebdobnyi biryi, “Simson a boyaringnyi talak aryi Filistin ninyi asi mar bobkwan,” tenen ati ato ebmou uca, sun kum bikmarei. A talak ara Filistin nang aryi suncoka akwe kiboka Israel nang asi malyi kimnamnyi deyok aryi teneboka dubmou.

5Ura, Simson ab, er nai ab, er kwin ab tonkwa Timna atei binmai. Bindoka anggur wa dam bai asi bai kam singa ukuryok nebmou kam aryi yandoka Simson bisi ngaruru eboka obmanto kubmou. 6A talak ara Simson bisi Iya Erebdobnyi Kanya koukwe olokmou aryi a bai kam asi, kambing mi kotongloraming to kuboka kotoktaleboka der seklobmou.#14:6 Er Imtamnyi biryi memnyi kibdeianci nang ara nimininga kobola ab, dibmaci dinyi ab ara boldeina mem eamwe bok asi boldeibmou. Utotoa ton douna kumkum eda taruk dem aryi ato kuboka obmou. Ukubmou dinyi ara er nai ab er kwin ab asi, “Ukubman,” eboka lak kum ebmou.

7Ura, Simson a ner asi binmou ura, uram sisingmarei uca, er kanya, “A ner asi dobkwan,” tenebmou. 8Uram sisingmarei ani, sirya sisikmarei ura, a ner dobkwamwe ati, tamuboka bindobmou. Ura, bisik dandanya bindoka bai kam oblobmoua bindoka diramwe uca, limbum amunmouci, du deina takal kikninmou asi asing eibmou. 9Ura, limbum aia takal bindoka doubdobmouci, bisik ai yibdoro binmou. Ani, er nai ab, er kwin ab asi a kwiryi du aia doubmouci, yibde banmou limbum du aia takal karebmou ba, yibmarei. Ura, er kwin ab, er nai ab asi, “Bai kam oblobmonwe ba, limbum unamnya amunmoci, aia takal asi doboka boyanmana,” eboka lak ena kum kubmou.

10Ura, er nai bira Simson biryi, “Ni dobkwan,” tenebmouci, er kanyi kubmou ner asi binmou. Ura, Simson bira sun kam nang minob ukuramnyi to kuboka me yin li doboka me yinmai. 11Ba, Simson me yin li dobmou ara Filistin nang bikmai ura, kam nang 30 baryi er milibkwamai ati bokeibmai ba, Simson bisi yanmai. 12Ura, Simson biryi a nang asi ato ebmou, “Niryi asibdenkwansin to nun. A asibkwamasin dinyi ara me yin uki tabaryi talak akiryok lak ebmunyi ura, niryi dengna kait bol aling ab, alib ongon aling ab ton dinyi 30 baryi-ton dinyi 30 baryi kiboka karebkwansin. 13Bok, a asibkwamasin dinyi asi kum bikmunci, kum dekdeibnumunyi ura, sunci nisi kait bol ongon aling 30 baryi ab, alib ongon aling 30 baryi ab karebkwanurum,” ebmou. Ba, sunci, “Ur ebdemimba, nun kekebdenkwayeb,” ebmai. 14Ura, ato ebmou,

“Yinmaci dinyi aryi yina kimdande, mikib dinyi aryi minmin dinyi anarande,”

ebmou. Ba, uki winiryi nirya a asibmou dinyi kum lak ebmai. 15Uki tabaryi tum ara Simson ner asi ato ebmai, “Kan akenyi bisi teleb-teleb eboka takeibokminyi ba, er asibmasir dinyi kan dam lak ebkwande. A ebmab to kum kubmaminyi ura, kan ab, kan nai ab, sun ai ninyi nirya ab uk dabkwamasib. Kanda nunsi utotoa kum nang kibdeibkwansirim ati, nabmasirim tenebmab?” ebmai. 16Ba, Simson ner ara engeboka er akenyi kwalibdobmouci, ato ebmou, “Kanda ni li tenenurum, kanyi kum deibnoumwe. Kanci ni atei nang asibumwe dinyi ni dam lak kum ebmarim,” eboka engebmou. Ba, er akenyi biryi, “Ni nai ab, ni kwin ab ababyi lak kum eantiniryok, kan tikwe lak ebkitinyi do?” ebmou. 17Uca, er ner ara a uki tabaryi me yin li doamnyi uk nirya ara erda tuba engermururamwe. Tabaryi tum ara taba deiboka titik-titik erongmou ba, lak eterebmou. Ba, a ner aryi er atei nang asi er asibmou dinyi lak eterebmou. 18A uki tabaryi tum ara kiting kum wekabwe bok, a weik atei nang aryi Simson bisi asibmai,

“Kwiryi me minmin ara mitikto. Ba, unatoa asi minmin weikto kurur do?

Ani, bai kam mikib ara mitikto. Ba, unatoa asi mikib weikto kurur do?”

eboka tubto asibmai. Ba, Simson biryi sunsi,

“Ni ner deici kum liknibdongoboka kum asibmandaute ura,

ni asibmasunwe dinyi lak kum ebmandaute de,”

ebmou.

19Ura, Simson bisi Er Iya Erebdobnyi kanya Roh er koukwe olokmou ba, Askelon atei bindoka ninyi 30 baryi obmouci, sun ongon aling teleb aling asi kwiriboka boyanmou. Ura, a asibmou ba, lak ebmai nang asi yandoka bokeibmou. Er yu ilinto tuba wekmou bok asi er nai ai wengbinmou. 20Ura, Simson er yamal biryi er ner asi yuk nang a ninyi 30 baryi ninyi er ab tonkwa me yiboka kunmai ninyi sal tentoknyi biti kabdeibmou.

Currently Selected:

Hakim-hakim Uram 14: MTG

Highlight

Copy

Compare