Hakim-hakim Uram 13

Simson deibmou deyok

13:1-25

1Sun Israel nang aryi Er Iya Erebdobnyi urasin dam tubto manmaliramnyi. A deyok aryi Er Iya Erebdobnyi biryi kwalina yubwa 40 baryi ara Filistin nang taruk dam kareamwe. 2A talak ara Dan yala Zora ateinyi si Manoah a kuramwe. Ba, er ner ara mi you ner kuramwe aryi mi ton kum deiramwe. 3Asi Er Iya Erebdobnyi uram eryuryangan nang sienyi si Malaikat Tuhan a ner dam lak kibdanmouci, ato ebmou, “Kanda mi you ner kurumci, mi kum deiminyi bok, kanci mi mundu bobminyi ura, sal mi ton deibkwandim. 4A deyok aryi kan dam ner kalingdaraminci kunkwandum. Ara, anggur du me ab, walina talerande me yala nirya ara yina mem. Ani, Imtamnyi biryi, ‘Yina mem,’ eanci dinyi nirya ara yina mem. 5Ara, kan mundu bobminci sal mi deibkwandim ati ebman. A deibkwandim mi ara otong kuraming but aryi er otong kum kobkwaming mi deibkwandim. A mi ara Er Imtamnyi biryi minob wiboka er wa inanyi nazir kibkwande. Ba, a mi deici aryi Israel ninyi asi Filistin nang taruk dam kunung asi lebdeibkwande ati, ebman,” ebmou.

6Ba, a ner er akenyi dam yanmou ura, ato ebmou, “Imtamnyi uram eryuryangananyi bitonyi nun ni dam yanmar aryok ni ilil kubmanir. ‘Kan dantam aryi yanmarim do?’ eboka kum asibdenman. Ani, er si ababyi ni si anyi ena kum kubmar. 7Eda ato ebmanir, ‘Kanda mundu bobminyi ura, sal deibkwandim. Ati, anggur du me ab, walina talerande me nirya ab ani, Iya Erebdobnyi biryi yina mem eanci dinyi ara yina mem. A mi ara kan mundu umbura aryi kuboka deibkwandim talak ara Imtamnyi biryi minob wiboka memnyi kibkwande,’ ebmanir,” ebmou.

8Ba, Manoah biryi Er Iya Erebdobnyi bisi ato eboka molobmou, “Nai Imtamnyi, nun Israel nang molonubnyi kan wa inanyi bokeibmoumnyi bira tubto bokeibdum. Ba, yumkuna yandoka, ‘A deibkwande mi asi ato kubkwandarur,’ eboka eterebkwansir ati bokeibdum,” eboka molobmou. 9Ba, Er Iya Erebdobnyi biryi Manoah molobmou asi kekebmou ura, Malaikat Tuhan tubto er ner er kikwe wa dam bukmou asi yanmou. 10Ba, a ner ara ola cukaboka er akenyi bisi yandoka ato ebmou, “Nisi min tum yanmounyi bira tubto yanmar,” ebmou. 11Ba, Manoah anaboka er ner ab anyi dam binmarei. Ani, anyi dam binmarei ura, Manoah biryi ato ebmou, “Kanda ni ner asi yandoka sisingmarimnyi a kunum do?” ebmou. Uca, anyi biryi, “Yo, diba!” ebmou. 12Ba, Manoah biryi ato ebmou, “Kan ebmarim to sirya kunubci ura, a mi kubde binkwanci tam ara una kubkwanub do?” ebmou. 13Ura, Malaikat Tuhan biryi Manoah bisi, “A ner ara niryi ebman dinyi nirya asi diboka kalikwandur. 14Ara, erci anggur du me ab walina talerande me nirya ab Imtamnyi biryi mem en yina ab ara yina mem. Niryi mem ebman dinyi nirya ara kununkwandur,” ebmou. 15Ba, Manoah biryi Malaikat Tuhan bisi ato ebmou, “Bisam kambing mi obdeibkinyi ba, birum,” ebmou. 16Bok, Iya Erebdobnyi uram eryuryangananyi biryi Manoah bisi, “A talebdeibmaniminci yina karebniminyi ababyi, yina ni kum yibkwaman. Eda, Imtamnyi biti dama deiboka uk dabkwandum,” ebmou. Manoah bira, “Iya Erebdobnyi uram eryuryangananyi bica,” kum tenebmouci, ato ebmou. 17Ura, Manoah biryi Malaikat Tuhan bisi, “Kan si ara unanyi da? Kan ebmarim dinyi kunubci ura, kan si weik eboka molobkwankunub ati ebman,” ebmou. 18Bok, Iya Erebdobnyi uram eryuryangananyi biryi ersi, “Unati ni si asirtonmanirim do? Ni si ara talyi sisiraming si kuma,” ebmou. 19A sirya ebmou ura, Manoah biryi bisam kambing mi oboka, Er Iya Erebdobnyi biti yina dinyi ab, dama keil deici uk dabmou. Ura, Manoah ab er ner ab direi ba, ilil tenen dinyi kunubmou. 20Imtamnyi biti dama yaliboka dabmarei keil dungna uk buk imtam welebmou deici aryi Iya Erebdobnyi uram eryuryangananyi a uk buk dub welebinmou. Ba, Manoah ab, er ner ab aryi ato kubmou asi asing eibmarei ura, sun kisok luknubdongoboka tukwe deici urasin deiboka molobmarei. 21A talak ara Malaikat Tuhan bira Manoah ab, er ner ab dam asi urasin lak kimdena ton kum kuramwe. Ba, Manoah biryi, “Iya Erebdobnyi uram eryuryangananyi bica,” tenen bikmou. 22Ura, Manoah biryi er ner asi, “Iya Erebdobnyi asing eibnoumwe ati dibkwanim kum,” ebmou. 23Uca, er ner aryi Manoah bisi, “Iya Erebdobnyi biryi nunsi obkwansute ura, Imtamnyi biti dama uk dabmanumwa asi, ‘Teleb,’ kum tenebmasuturyi, ‘Ilil tenen dinyi eibdurung,’ tenen kum kubsute. Tonda uku talak aryi ‘Kekebdurung,’ tenen ebdeibmasir dinyi kum kubmasute ura, dibkwantinimnyi ati kubmasuturyi,” ebmou.

24Kurandei ani, a ner mundu boboka sal deibmou ura er si ara, “Simson,” eboka si dobmarei. Ura, a mi sirya nebmou ura, Iya Erebdobnyi biryi ersi kisal dangnamwe. 25A mi ara Dan yala nang atei Zora kan Esytaol kan noutam kuramwe talak ara Iya Erebdobnyi kanya Roh aryi er kanya mikib kibkalibmou.

Currently Selected:

Hakim-hakim Uram 13: MTG

Highlight

Copy

Compare