Hakim-hakim Uram 12
12
Yefta ab Efraim yala nang ab deyok
12:1-7
1Sun Efraim nang anaboka mutuk Zafon dam mar ibinmaici Yefta bisi bindoka, “Una deyok ati, nun kum nabmasumci kan yuk Amon nang mar ibinmoumwe do? Nun kum nabmasumwe ba, mar tonkwa kum bobibwe ati, kan ab, kan ai ab uk dabkwankib,” ebmai. 2Ato ebmai bok, Yefta biryi sunsi, “Ni ab ni atei nang nirya koubdobmabuburyi, Amon nang ab weikto ordana ordanmoubwe talak ara sunsi nabmasise uca, kum lemdoryanmanindau.#12:2 “Miliryanindarur,” eboka nabmou dinyi ara a Er Imtamnyi uram kerek sengna umbura lak ton kubwe. Eda, Hakim 7:24 ara Yefta biryi Efraim yala nang asi, “Miliryanumunyi ba, Midian nang mar bobkwan,” ebmou dinyi akwe kubwe. Ati, Hakim 11:32 umbura ara, “Amon yala nang asi mar bobkwan ati miliryanindarur,” eboka kerek sengna ton kum kubwe. 3Yankwamanunga tenen dinmasise uca, kum miliryanmanindau ura, ‘Da obningnyi ababyi malyi,’ tenebmase ura, Amon nang asi ni yuk ibinmase. Ba, Amon nang asi Iya Erebdobnyi biryi ni taruk dam karebmanou ba, obkiribmase. Ato kubmase bok asi unatoa ati arub ara nisi iyanganmanurum da?” ebmou. 4Ato ebmou uca, Efraim ninyi aryi Gilead ninyi asi, “Sunbabyi nun Efraim yala ninyi kurandau cok asi, a mutuk Gilead dam tingyandau,” eboka durukmai. Ura, Yefta biryi Gilead nang nirya buluboka Efraim yala nang ab, Manasye yala nang ab asi mar bobmaici, obdanmai. 5-6Ura, Gilead nang ara, “Sun Efraim yala nang Yordan kouboka bindobingnyei,” tenen me koubmanto dikum asi kalikde kuramnyi. Asi Efraim nang tentok-tentok cungdonman tok bindoka, “Lobdeibnindarur ni me koubdobkwan,” eramnyi. Uca, Gilead nang aryi anyi bisi ato eramnyi, “Kanda Efraim yalanyi do?” ebne uca, anyi biryi, “Kum ni yuk ateinyi bica,” ebci ura, “Syibolet ebdenderum,” eramnyi. Uca, diboka katabum ena kumci si ikin asa aryi, “Sibolet,” ebne nang ara taleboka oramnyi. Ukuboka me Yordan kin, me koun dikum aryi Efraim nang asi yubwa 42.000 baryi obkiribmai. 7Yefta bira kwalina nabaryi Israel nang asi malyi deyok liliboka kalingna sienyi kiboka taleamwe. Ani, Gileadnyi Yefta bira dibmou ba, Gilead mutuk atei tentok dam tukwe dongobmai.
Ebzan deyok
12:8-10
8Yefta sirya dibmou ura, Betlehemnyi si Ebzan malyi dinyi lilin sienyi kibmouci, Israel nang taleamwe. 9Ebzan mabwe ara sal 30 baryi deiamwe. Ba, nerabwe ababyi 30 baryi deiamwe. A nermabwe 30 baryi nermabwe ara yuk atei nang akikwe kabdeiamwe. Ba, er mabwe 30 baryi nang ara yuk atei nerabwe akwe doyandoka kabdeiamwe. Sun nai Ebzan bira kwalina tabaryi Israel nang malyi dinyi lilin sienyi kiboka taleamwe. 10Ani, dibmou ba, Betlehem dam tukwe dongobmai.
Elon deyok
12:11-12
11Ebzan sirya dibmou ura, Zebulon yalanyi si Elon malyi dinyi lilin sienyi kibmouci, Israel nang asi kwalina takubaryi taleamwe. 12Ani, Zebulon yalanyi Elon sirya dibmou ura, Zebulon yala nang mutuk si Ayalon atei dam asi tukwe dongobmai.
Abdon deyok
12:13-15
13Elon sirya dibmou ura, Hilel mi si Abdon Piraton mutuknyi malyi dinyi lilin sienyi kibmouci, Israel nang talebmou. 14Er mabwe ara yubwa 40 baryi deiamwe. Ba, er mabwe aryi yaldangna ara yubwa 30 baryi yaldakamnyi. A nang ara keledai bisam yim akwe kum deici bukoka borkiringni nang kiamnyi. Ba, kwalina inbaryi ara Abdon biryi sienyi kiboka Israel nang asi taleamwe. 15Hilel mi Abdon Piraton mutuknyi sirya dibmou ura, Amalek nang mutuk kon wiliba dam Efraim nang mutuk si Piraton dam tukwe dongobmai.
Currently Selected:
Hakim-hakim Uram 12: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
